زبدةالاشعار

بیر گونکه امّ سلمه اولوب تنگ حوصله

ورود به مدینه
.
✍️ زبدة الاشعار ✍️
.
🆔: @nohe_torki
.
مرحوم حافظی تبریزی
.
بیر گونکه امّ سلمه اولوب تنگ حوصله
سس دوشدی یثربه قییدوب غملی قافله
.
پیغمبر خدا حرمیدی او باوفا
تشریف گوئیا آپاروب درب منزله
.
گوردی بشیری گورمیه گوزلر نجه بشیر
گرد غم اگلشوب هامی شکل و شمایله
.
جاریدی قان آتین قولاقیندان اوزی ملول
آغلور دانیشدورولّا ولی گَلموری دله
.
قاره گیوب سالوبدی آتین بوینونا قرا
بیر پرچم عزا که قرادور آلوب اله
.
چرپندی قلبی حالی پوزولدی او حالیده
حیرتده دور دیور گوره سن وار نه مسئله
.
ایستور حسینیمون خبر مرگینی ویره
بیر اوزگه حادثه یتیشوب یوخسا حاصله
.
ویرسه خبر حسین اُلوموندن بشیر اگر
ناخوشدی اکبرین باجیسی قورخورام اُله
.
اکبردن اوتری تیتروری قلبی گئجه گونوز
گاهی شکایت ایلوری گاهی ایدور گله
.
جاروب زلفیله اطاقین اکبرین سیلور
گرد و غبارینی یووور اشک زلالیله
.
شیرین یوخی گوزینه بو مدّتده گَلمیوب
هجران غمی گئجه گونوزون دوندروب ئیله
.
وعده ویروب عراقه آپارسون بو مضطری
یارب دیور نه وقت اولاجاق اکبریم گَله
.
عبّاس آناسی نیلیه جاق بُلسه مطلبی
اونلان نه نوع چرخ ایده جاقدور معامله
.
دورت اوغلینون گوزتلوری امّ البنین یولون
نیلر او عمری قاره خبر ویرمیه هله
.
ایوای منه بو غم خبری اُلدورور اونی
ای کاش اوجالمیه بو هیاهو و غلغله
.
وار بالخصوص علاقه سی آرتوخ حسینینه
دائم سراغ ایدر که سلامت لیقین بُله
.
سویلر دوشنده سوز که حسیندور امیدیمیز
کشتی عمری دوشمیه ای کاش اونون گِله
.
بو فکریدِیدی گوردی گَلور سس آنا سلام
سس آشنا گَلوبدی گیدوبدی تامّله
.
ناگه تانیدی زینبی سسلندی جان قیزیم
من اُلمدیم نیه سنی گوردوم بو حالیله
.
قولّارین آچدی جان کیمی بیر باسدی باغرینا
شیون اوجالدی حشره کیمی قوپدی غائله
.
بیر بیر سوروشدی باشلارینون ماجراسینی
ویرموردی اشک ریزشی هرچند فاصله
.
زهرا عزیزی دردینی بیر بیر بیان ایدور
اوّل سوزی بو اولدی او بانوی کامله
.
بیر گونده چوخ دونرمیش آنا دور روزگار
مشکل آچانلارین ایشینی سالدی مشکله
.
مهمان آدیله کوفه لیلر دعوت ایتدیلر
دوندی قوناقلیق اولدی جدال و مقاتله
.
اوّل سویون کَسوبله یولون اوچ گئجه گونوز
آل علی و آل پیمبر بُله بُله
.
اوچ گون اوشاق بویوک هامی قالموشدی تشنه لب
باخ گور نولور سو اوچ گون اگر ویرمه سن گُله
.
گُل غنچه سی کیمی سارالوب سولدی چوخ بالا
اوج ایتدی عرشه ناله و فریاد و هلهله
.
منجر اولوبدی جنگه ایشین آخِری آنا
نه جنگ من نه عرض ایلیوم نه مقابله
.
نه شرح ماجرایه سن ایسته نه من دیوم
کشف اولماسون نه ظلم ایلیوب شمر و حرمله
.
قانه بویاندی پیر و جوان یاد و آشنا
ظلمون یتوردی کوفه نون اهلی تکامله
.
لشکر داغلدی، خیمه تالاندی، وورولدی اود
زرتار خیمه یاندی مبدّل اولوب کوله
.
گُل تک وورولدی نیزیه باشلار بویوک کیچیک
تقسیم اولوندی باشلار امیر قبایله
.
یل قانلی زلفینه توخوناندا جوانلارین
تبدیل ایدردی دللری ریحان و سنبله
.
اولدوخ فرنگ اسیری کیمی دشمنه اسیر
قولدا طناب ظلم، بویونلاردا سلسله
.
بیر تازه داغ داغلی دل اوسته چَکیردیلر
غم کاروانی که یتیشوب هر منازله
.
شام اهلینون الیندن امان ای آنا اولار
پیشوازه کوی و برزنه چخدی گوله گُله
.
حاضر اذیّته اولار اولدی که اولمادی
حاضر آتا بالالاری ایتسون مباهله
.
زلفوم حکایت ایلوری باخسان ملالیمی
بسدور اشاره یاخشی دیوبلر که عاقله
.
اوغلانلی قیزلی نچّه بالا کم گَتورمیشم
یولدا شهید اولوبلا بدون مجادله
.
بسدور نه فاش ایده بُلوسون نه نهان سوزی
اوخ تک یاخوندی سوز توخونوب قلبیوی دَله
.
ای حافظی او صادقه ویر هی دعای خیر
چون یاخشی فرق قائل اولور حقّ و باطله
.
.
.
#ورود_مدینه
#بیر_گونکه_ام_سلمه_اولوب_تنگ_حوصله
#حافظی_تبریزی
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  مرده روحه جان گلوبدی #17ربیع_ابراهیم_پور_خویی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی