حالات امام حسن(ع)
.
✍️ زبدة الاشعار ✍️
🆔: @nohe_torki
.
مرحوم انور اردبیلی
.
حجّت دوّم حق وارث طاهادی حسن
جانشین شه مردان شه والادی حسن
خلف ارشد صدّیقۀ کبرادی حسن
صدف بطن بتولین اوّلین گوهریدور
عرش گواشواره سی آغوش نبی زیوریدور
.
.
اوزی معصوم چهارّم هدفی صلح و صفا
نفر چارّم خوش انجمن اهل کسا
بذلی چوخ بخششی چوخ شاکر و تسلیم و رضا
آسمان ادب و علمه یوزی مطلع نور
ذات معبوده اولان عاشق و صدّیق و صبور
.
.
سَنۀ سوّم هجرتده او سرچشمۀ نور
گلدی ایجاده وجودیله شرفلندی وجود
طالع اولدی افق حقدن او مهر مسعود
جدّی خاتم آلوب آغوشه ائدوب مهر علن
هفتمین روز تولّده آدین قویدی حسن
.
.
ایتدی اعلان بو سوزی خلقه رسول مدنی
حقّیمه عارف اولوب ایستیور هرکس که منی
اونا لازمدی گرک ایستیه اوغلوم حسنی
بالاما دوست اولان اخذ ائده جکدور حَسنه
من اوزوم یار و محبّم حسنی ایستینه
.
.
منبر اوستونده ائشیتدی حسنون ناله سسین
دوشدی فوراً یئره تعطیل ائلدی موعظه سین
گُل خوش منظرینه ائتدی علاوه هوسین
سینه سی اوسته قویوبدور باشینی رام ائلدی
ایگلدی اوپدی سیلوب گوزیاشین آرام ائلدی
.
.
کتفینه چیخدی نماز اوسته او دلبند بتول
طول وئردی او قدر سجده سینه ختم رسول
یئره دوشدی بالاسی اولمادی غمگین و ملول
او جلالتده نبی روز جزا مؤتمنی
دیزی اوستونده اوتورداردی همیشه حسنی
.
.
نئچه ایل محضر جدّینده ائدوب کسب مقام
محضر شیرخداده ائلیوب رشد تمام
آتاسیندان صورا تا یئر یوزونه اولدی امام
تابناک اولدی هدایت گونی نور ازلی
پخش فیض ایلدی فرزند برومند علی
.
.
مردم کینه صفت کینه سینی قیلدی عیان
سیندیروب بیعتینی قویدی امامی نگران
معاویه ائتدی پس پرده ده هر گون هیجان
مکر و تبلیغ کذائیله ائدوب خلقی جری
راغب اولدی اونا کوته نظرانون نظری
.
.
زداۀ ختم نبی گورمدی مردمده وفا
اولمادی چاره سی آخرده اولوب صلحه رضا
فرصت ظلمی سالوبدور الینه اهل جفا
باطنی دشمن اولان اولدی مخالف علنی
هر گلن ائتدی مذمّت او شه ممتحنی
.
.
بیر نفر کسدی قباقین دئدی بی ربط و دلیل
ایلدون صلحیله مؤمنلری عالمده ذلیل
قیلدی فرمایش او طعن ایلینه فخر خلیل
کمکیم اولمادی اثبات دیانت ائلیه
قویمارام یوخسا معاویه خلافت ائلیه
.
.
حتک حرمتده حریص اولدی ز بس اهل جفا
خطر جانیده گوردی اوزینی صبح و مسا
هر زمان مسجده ایستردی گئده میر هدا
سوء نیّت بویوراردی بولورم واردی منه
زرهین زیر قبادن گیونردی بدنه
.
.
مجمع عامیده دشمنلر عداوت ائلدی
توکولوب خیمه سینه ظلم و اهانت ائلدی
قباقیندان بیری سجّاده نی غارت ائلدی
بیری ووردی بیری چیگنیدن عباسین چکدی
دئدیلر بیربیره مجرمدی جزاسین چکدی
.
.
پیروی اولدی معاویه کج اندیشه سینه
دوتدی تصمیم ادامه وئره بد پیشه سینه
تیشه بیر دفعه ورا فاطمه نون ریشه سینه
کشور رومه سفارش ائدوب اول شوم و دنی
گتوروب زهر کشنده ائده مسموم حسنی
.
.
زهری گیزلین یتوروب جعدیه چوخ وئردی نوید
زندگیدن ائلسن گر حسنی قطع امید
ازدواج ایلیه جک عهد ائدورم سنله یزید
دوتارام مقدمیوی شامیده محبوب و عزیز
قاباقوندا دایانار ال الی اوستنونده کنیز
.
.
او نویداتیله جعده ائلدی ترک وفا
نفسینه تابع اولوب عقلی ائدوب ظنّ خطا
بیر گئجه فرصت ائدوب الده همان زهر جفا
سوء قصدیله دوروب منزل دلداره گلوب
صورت یاریده ظلم ایلمگه یاره گلوب
.
.
گوردی بسترده یاتوب پادشه عرش وقار
نور حُسنیله مزیّن دی دل لیلۀ تار
زهری داخل ائلیوب کوزیه تئز اولدی کنار
سمّ مهلک اثری کوزه ده حل ایلدی سو
مجتبی حالینه باجادی دئسم یاندی سبو
.
.
عطشون شدّتی رؤیادن اویاتدی حسنی
ایچدی سو یاندی اورک لرزیه گلدی بدنی
پوزولوب حالتی آق رنگی اولوب یاسمنی
کامینه چکدی آلو تک جگرین سمّ جفا
دئدی دینجلدوم الهی ائدورم حمد و ثنا
.
.
طاقتی اولمادی بیر لحظه ایاق اوسته دورا
بسترینده یاتا یا اینکه صداسیز اوتورا
سورونوب گلدی خانم زینبی داده چاغورا
سسلدی سوزش آهیم فلکه چیخدی باجی
خواب ناز ایلمه جعده ائویمی یخدی باجی
.
.
آچدی زینب گوزینی هولیله شیرین یوخودان
مجتبایه او خانم ایتدی نظاره دئدی جان
قیل منی حالی نه قاندور بو دوداقونده کی قان
لبلروندن آنام اوغلی گورورم قان توکلور
یا سینوب جعبۀ قلبون یئره مرجان توکولور
.
.
دئدی احضار ائله قارداشلاریمی جان وئرورم
محضر جدّیمه من گئتمه لی اولدوم بولورم
قان دگول بو جگریم پارچالانوبدور ئولورم
ایستورم آلسون حسینیم دیزی اوسته باشیمی
سسله گلسون غمی مندن چوخ اولان قارداشیمی
.
.
گلدی سرعتله حسین گوردی حسن قارداشینی
گوردی قانلی دوداقین توکدی یوزه گوزیاشینی
آلدی قارداش دیزینون اوستونه قارداش باشینی
دئدی جبراً اوزولور دامن وصلوندن الیم
دئمدی چارم آزالدی دئمدی سیندی بلیم
.
.
قالدی بو اوخشامالار قلبی سینان وقته دئدی
بولسوز هانسی زمان؟ قلبی سینان وقته دئدی
نهر علقمده ابوالفضلی تاپان وقته دئدیپ
اولدی مأیوس او قولسوز بدنه چاتدی حسین
بلینه قویدی الین دشمنی آغلاتدی حسین
.
.
«انورا» جاه جهان عاریه دی یوخ ثمری
اهل معنادی او کس اولماسا مادّی نظری
پرخطردور ، حسنات ایستوری عقبا سفری
آستان شه مظلومه غلامه ائت اوزوی
روز محشرده حق آغلاتمیا شاید گوزوی
.
.
#حسنیه_میلادیه
#حسنیه_شهادت
#حجت_دوم_حق_وارث_طاهادی_حسن
#مردان_جاوید_انور
#ترکی
✍️ #زبدةالاشعار ✍️
🆔: @nohe_torki
نظر دهید