زبانحال حضرت علی (ع) بر بالین حضرت زهرا (س)
.
✍️ #زبدةالاشعار ✍️
.
🆔: @nohe_torki
.
#سبک_زینبم_جان_اوستیم (4 سبک سینه و زنجیر )
.
مرحوم حافظی تبریزی
.
عالم عالم ایسترم عالم بُلور زهرا سنی
نیلرم آلسا الیمدن بی وفا دنیا سنی؟
.
.
سن منیم جسمیمده شیرین جانیمه تشبیه سن
یوخدی شبهه بوالحسن زهرادی، زهرا بوالحسن
روح سن، روحیه سن، سن اولماسان نه سن، نه من
فرد و بی همتا یاراتمیش ذات بی همتا سنی
.
.
حقّدور ئولماق سوزوم یوخ، لیک وار بیر مسئله
ضربت دردن سنون سینونده یاره وار هله
وار یری درده دل پیغمبر رحمت گله
گورسه بو پوزقون پریشان حالیله حالا سنی
.
.
کاش اجلدن مهلت اولسون، دردیوه اولسون دوا
قولّارون سینون بیر آزجا توختیوب تاپسون شفا
محضریندن چکمه سین خجلت علی المرتضا
درّ تک سالم امانت تاپشوروب طاها سنی
.
.
ماسواللهده یگانه تکیه گاهیم سن منیم
دولتیم بختیم امیدیم دادخواهیم سن منیم
ایل قبیله طایفه، آرخام پناهیم سن منیم
بیر جهان نیرو گتورّم خاطره تنها سنی
.
.
سن دیدوقجا ناخوشام مندن اولور سلب قرار
غصه لب قلبیم دوشور چرپنمیا بی اختیار
نیلیوم چاره ئولومدن قویمیوب پروردگار
نیلرم ویرسم الیمدن بلمورم آیا سنی؟
.
.
ئولماقی خردا بالالی مادرین آسان دگل
کیم بیله بیر درده دوشسه قابل درمان دگل
طولی ایللردی بش اون گونلر دگی بیر آن دگل
آغلاسا ایتام هاردان ایلرم پیدا سنی؟
.
.
سرپرست ائودن که گیتدی اولدی آسایش حرام
صبح تک نه صبحدور صبحی، ائوین نه شامی شام
کیم ایدر روشن چراغی کیم ایدر طبع طعام؟
ایلمیشدی حق عطا بیر نعمت عظما سنی
.
.
کیم حسن مادر دیَن دمده وئرور آیا جواب؟
کیم حسینون باشی اوسته سو قویور هنگام خواب؟
زینبین نازین چکور کیم توکسه اشگناب؟
نه دیوم دوتسا خبر مندن بو مه سیما سنی؟
.
.
اولماسان بیر گون بو ایوده، ایو منه زندان اولار
باور ایله لاله تک هجرونده باغریم قان اولار
بوینی چگننده قالار اطفال سرگردان اولار
منده منلوق قالماز اولسا دورت بالا جویا سنی
.
.
زلف شبرگوندن اولسا بیر سر مو قدری کم
درد الیندن بو دل غم پروریم باغلار ورم
غصه مرگ اولام مریضه جانوه اولسون قسم
قلب عالملقدا بولم قلبیمه یارا سنی
.
.
خاطریمدن چخمیان سوزدور گورن ساعت سنی
دائم ابلردی احاطه نکهت جنت منی
اولسا عطروندن معطر خلد اعلا گلشنی
آرزو عمرینجه ایلر عالم سفلا سنی
.
.
اوّلیندن آیریلیق سالماخدی چرخین شیوه سی
یرده قالماز لیک بیر مظلومین آه و ناله سی
تیز چکه آخر امیدیم وار محبت جذبه سی
بیرده پیدا ایلیاق یا سن من، من یا سنی
.
.
«حافظی» شکر ایله، نعمت شکری نعمت آرتیرار
رتبه نی شانی مقامی، حسن خدمت، آرتیرار
خدمت ارزنده هر انسانه قیمت آرتیرار
ایلیوب یاخشی موفق، خالق یکتا سنی
.
.
#فاطمیه_شهادت
#عالم_عالم_ایسترم_عالم_بلور_زهرا_سنی
#حافظی_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید