ورود به مدينه
.
✍️ زبدة الاشعار ✍️
.
🆔: @nohe_torki
.
مرحوم محمد حسن تابع دين (تابع تبریزی )
.
نی کیمی ای اهل یثرب باشلیون شور و نوانی
پیشواز آغلار گوزیله ایلیون آل عبانی
.
ایلدی شاه حجازی کوفیان دعوت عراقه
سالدیلار بو دعوتیله ناله عرش نه رواقه
سو یولون اولده کسدی بی مروتلر قوناقه
سو دیدی یاندی سوسوزدان آل طاها گلستانی
.
روز عاشور محرم ئولدی انصاری حسینون
ظهر عاشوراده قالموب بیرجه غم خواری حسینون
سو کنارینده سوسوز جان ویردی سرداری حسینون
قلب عالم قلبی اولدی تیر محنتله نشانی
.
قالدی لشگر سیز کمک سیز عالمینون پادشاهی
آلدی هر بیر دوت طرفدن دوره سین کوفه سپاهی
بیر ایله لشگردن اولموب بیر نفر اولسون پناهی
قلبینی بیر تیر آلدی یاندیروب قلب جهانی
.
بیر حسینی کی اولوبدور جبرئیل فخریله دایه
گور نه حرمت ایلیوبلر نور عین مرتضایه
کسدیلر باشین قفادن ویردیلار نوک جدایه
آغلادوبلار مجتبانی یاندیروبلار مصطفانی
.
کوفه و شامون سپاهی ظلم ایدوبدی بی نهایت
ختم اولان ساعت شهادت ویردیلار فرمان غارت
اود ویروبدی خیمه گاهه کوفیان بی مروت
هر بالا قوش تک ایدردی قورخودان ترک آشیانی
.
تیر محنت قلب زار عترت طاهانی دلدی
آغلییون آل عبایه باشوزا کوللر الندی
عزتیله کوچ ایدنلر یثربه دل داغلی گلدی
داغلی دللرده بو محنت حک اولوندی جاویدانی
.
گور نه محنت لر ویروب یوز عترت خیر الانامه
ویردیلار بیر غل جامه ظلمیله بیمار امامه
ناقه اوسته دست بسته چکدیلر بازار شامه
کوفه ده زندان اولوبدی شامیده ویران مکانی
.
شامیده ویرانسراده یر ویروب آل امیه
نالیه گلدی بنات مصطفا نازلی صفیه
عمه سی زینب دییر کی غصه مرگ اولدی رقیه
جان ویروب توپراقلار اوسته ئولدی قارداشیم نشانی
.
زینبی بیر حاله سالموش گردش دور زمانه
مشگ تک زلفی آغارمیش قامتی دونموش کمانه
تیر محنتله ایدوبدی قلب زارین شانه شانه
تک به تک زینب گوروبدی هر غم کرب و بلانی
.
قانلي بیر یاشل عمامه ایلیوب لیلا بهانه
سینه سینده داغ اکبر آغلور اوخشور یانه یانه
سسلنور حسرتده قالدیم ای اوغول سن تک جوانه
ایلدون لیلانی مجنون گزدی هر کوی وفانی
.
قاسمون آلقان اولوبدی طوی گونونده طوی حناسی
اولدی لیلا تک سریه درد و غملر آشناسی
دلده شیون گوزده اشگی باشدا دامادین قراسی
نو عروسی یانه یانه اوخشوری نوکد خدانی
.
شیونیله سینه داغلور اصغرین بیکس آناسی
جلوه گر دور گوزلرینده حلقینون پیکان یاراسی
چخمیوب چخماز یادیندان باغلانان ال ماجراسی
راه چاره بوندا گوردی بیر زادا گلموب گمانی
.
اوخلانوبدی مشگ عباس ظلمیله کرب و بلاده
خیمه ده عطشان اوشاقلار گلدیلر فریاد و داده
ناله ایلیور ام کلثوم قارداشی دوشدوقجا یاده
الده مشگی گوزده اشگی یاد ایدیر صاحب لوانی
.
عترت آل عبایه ایلسه هر کیم نظاره
بی تحمل جاری ایلر چشمه تک اشگین عذاره
اودلی دللردن آلار اود جسم و جانه قلب زاره
آتشین اهیله اودلار فرش و عرش کبریانی
.
بومصیبتده آچون باش باشه قاره باغلیون سیز
کاروان غم یتوشجک سینه غمدن داغلیون سیز
سس ویرون زینب سسینه بیر دویونجا آغلییون سیز
واحسینا وا اماما ناله سی دوتسون جهانی
.
یثربه گلدی یتوشدی کاروان درد و محنت
بیر اوجادان آغلاشوبلار گوزلرینده اشگ حسرت
باشلارا توپراق سپوبلر اولدی هنگام قیامت
تابع دین خامه یازمور ختم قیل بو ماجرانی
.
#سبک_ای_ویرن_ویرانه_یرده … 3 سبک
.
#ورود_مدینه
#نی_کیمی_ای_اهل_یثرب_باشلیون_شور_و_نوانی
#تابع_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید