زبانحال جناب فاطمه صغرا(ع) در مدینه منوره
.
✍️ #زبدةالاشعار ✍️
.
🆔: @nohe_torki
.
مرحوم حاج رضا صراف تبریزی
.
آغلارام سندن صورا قارداش علی زار آغلارام
آغلارام تا هر قدر جانیمده جان وار آغلارام
.
.
سن گئدن گوندن وطن، سنسیز منه زندان اولوب
سر به سر معمورۀ عیشیم علی ویران اولوب
دامنیم تر، روزگاریم تیره، اشکیم قان اولوب
اولموشام سر تا به پا بیر ابر خونبار آغلارام
.
.
آغلارام چون آغلاماق راز و نیازیمدور منیم
یالقوز ائوده گوشۀ غم، بزم رازیمدور منیم
تار زولفون حاصل عمر درازیمدور منیم
نئیلییم چنگیمده اوندان یوخدی بیر تار آغلارام
.
.
سن همیشه بالش ناز اوسته قوی باشون على
شمع تک دورؤنده یانسون قوم و قارداشون على
اولموشام بو کنج غمده منده نقّاشون على
چکرم دیواره نقشون رو به دیوار آغلارام
.
.
نه طبیبیم وار اولا غم بسترونده دادرس
نه انیسم وار اولا آخر نفسده هم نفس
آغلاموم نئیلیم اولوب دنیا منه کنج قفس
گئتدی گول، خوار اولدی بلبل، سولدی گلزار آغلارام
.
.
ظاهره صورتده گر چه شور سودور گؤز یاشی
عاشق بی رنگ و بویه رنگ بودور گؤز یاشی
بولموشم چون اهل عشقه آبرودور گؤز یاشی
اولموشام درد و غم عشقه گرفتار آغلارام
.
.
من مریض درد عشقم، یوخدی درمانیم منیم
چوخ خوشام بو دردیلن راحتدی چون جانیم منیم
قورخارام دوتسون اجل آخر گریبانیم منیم
دوشمه سون بیرده الیمه دامن یار آغلارام
.
.
خسته و رنجور و تبدارم، علیلم، ناخوشام
من سنون بیماریوام دنیاده بیر دنیا خوشام
آتش عشقیله چون یانماقدا سر تا پا خوشام
بولورم سو تؤكسن آرتار شعلۀ نار آغلارام
.
.
رشتۀ صبریم چیخوب چون اختیاریمدن منیم
اهل یثرب زاره گلمیش آه و زاریمدن منیم
قوم و قارداشیم کنار اولموش کناریمدن منیم
یوخ کناریمده بغیر از اشک گلنار آغلارام
.
.
اولموشام غملر اسیری بیر دگول آخر غمیم
درد هجرون مونسیم اولموش، خیالون همدمیم
بیر نفر باد صبادن اؤزگه یوخدور محرمیم
شرح حالیمدن سنی ائتسون خبردار آغلارام
.
.
شیوه دور چون دردمند بی قراره آغلاماق
آغلارام ائیلر گئنه هر درده چاره آغلاماق
یتورور قارداش علی چون یاری یاره آغلاماق
قسمتیم بلکه اولا دیدار دلدار، آغلارام
.
.
گؤزده بو گؤز یاشی ای صراف اگر چه خاردور
آب شور کم بهادور، جنس بی مقدار دور
باطنأ هر قطره سی بیر لؤلؤ شهواردور
بو متاعه چون پیمبردور خریدار، آغلارام
.
.
#حضرت_صغری #صراف_تبریزی
#آغلارام_سندن_صورا_قارداش_علی_زار_آغلارام
#ترکی
.
✍️ #زبدةالاشعار ✍️
.
🆔: @nohe_torki
نظر دهید