زبانحال حضرت زینب کبری(سلام الله علیها) به جناب رقیه در خرابه شام
سوال و جواب
.
✍️ #زبدةالاشعار ✍️
.
🆔: @nohe_torki
.
مرحوم آصف تبریزی
.
.
///زبانحال حضرت زینب(س)///
.
آغلاما ای زینبین صبر و قراری آغلاما (1)
جانیمه اود سالدی بو آهون شراری آغلاما
.
قوی دیزیم اوسته باشون نازلی رقیّم چکمه آه
آغلاما ای قارداشیمین یادگاری آغلاما
.
ای خزان اولموش گولوم سولدون سارالدون غصّه دن
اولموسان چوخداندی آخر غم دچاری آغلاما
.
غم کشیده عمّن ئولسون سن هارا بو شام هارا
تارمار اولسون گوروم شامین دیاری آغلاما
.
گوزلرین قربانیم یات بیر دقیقه راحت اول
ائتمه اشگین صورت گلفامه جاری آغلاما
.
بو گیجه نولموش سنه چوخ اضطرابون وار قیزیم
حالتین آلدی الیمدن اختیاری آغلاما
.
مرغ بسمل تک پر و بالین سینوب چوخ تیتروسن
ای جفا صیّادینین پوزقون شکاری آغلاما
.
قلبیمی ایتمه پریشان قوی دیزیم اوسته باشون
تپراقا قویما بو زلف مشکباری آغلاما
.
بلمورم نیلوم الیم قوم و قبیلمدن چیخوب
بیر نفریوخ بو غریبین غمگساری آغلاما
.
چوخ مکدّر اولموسان اکبر غمینده سن قیزیم
نسگلین چوخ یاندورور بو اشکباری آغلاما
.
آغلیاندا سن تمام آغلور حرملر گورموسن؟
آغلادور دردین سنون من دلفگاری آغلاما
.
قولّارون باغلی اؤزون آج یر خرابه فرش یوخ
آز دگول دردون بالا صبر ایله باری آغلاما
.
.
///جواب حضرت رقیه(س)///
.
.
عمّه جان تا جاندا وار تاب و توانیم آغلارام
آغلارام عمّه چخینجا خسته جانیم آغلارام
.
بیکسم من نه آتام وار نه عموم نه قارداشیم
سندن اوزگه کیمسیه گلمز گمانیم آغلارام
.
پر شکسته بلبلم آیریلموشام گلزاریدن
جور خاریله پوزولموش گلستانیم آغلارام
.
عزّتیم گیتدی الیمدن اعتباریم قالمادی
خوار و زار اولدوم داغیلدی خانمانیم آغلارام
.
ناز ایدردیم هر زمان اکبر کیمی قارداشیمه
خولی و شمر اولموش ایمدی پاسبانیم آغلارام
.
من نجه آرام اولوم صبر ایلیوم راحت یاتوم
وار درون دلده بیر درد نهانیم آغلارام
.
عمّه جان قربانوام از بس آجام گلمز یوخوم
بی سببدور سانما بو آه و فغانیم آغلارام
.
«آصفین» چخماز خیالیندن رقیّه نسگلی
اولسا قان باغریم کیمی اشک روانیم آغلاما
.
.
(1) در این مورد بخوانید
#آغلاما_ای_لفظ_عصمت_اعتباری_آغلاما از #سعدی_زمان
.
.
#حضرت_رقیه_آصف_تبریزی
#حضرت_رقیه_شهادت
#آغلاما_ای_زینبین_صبر_و_قراری_آغلاما
#عمه_جان_تا_جاندا_وار_تاب_و_توانیم_آغلارام
#ترکی
.
✍️ #زبدةالاشعار ✍️
.
🆔: @nohe_torki
نظر دهید