زبدةالاشعار

آغلاما منده قالمادی طاقت و تاب عم اوغلی جان #فاطمیه_حافظی_تبریزی

زبانحال حضرت زهرا سلام الله علیها
.
.
.
#سبک_واردی_باشیمدا_یا_حسین #سبک_ای_حرمینه_ناز_ائدن #سبک_عطری_گلور_محرمون و …
.
مرحوم حافظی تبریزی
.
آغلاما منده قالمادی طاقت و تاب عم اوغلی جان
توکمه سرشک حسرتون مثل سحاب عم اوغلی جان
.
.
باخما منه من آغلورام سن بیله پوزما حالوی
گوزلریوه فدا اولدوم توکمه سرشک آلوی
شائقم استماع ایدم من او گوزل مقالوی
گرچه یوخومدی قدرت ردّ جواب عم اوغلی جان
.
.
ایستر آتا فلک منیم عالم هجره داشیمی
چکمز او قدر سن منیم بوش گوره سن فراشیمی
بیرجه قبول زحمت ایت آل دیزون اوسته باشیمی
عم قیزی سن خطاب ایله منده خطاب عم اوغلی جان
.
.
اولدوم عم اوغلی دوقّوز ایل باغوه باغبان سنون
تربیت گل ایلدیم دولدی گلیله گلشنون
بسلدیم ارغوانی و یاسمنیله سوسنون
حیف دویونجا دوتمادیم عطر و گلاب عم اوغلی جان
.
.
ایمدی سموم غم منی گلشن و گلدن ایلوری
آتش هجره یاندیرور، شغلومی شیون ایلوری
یعنی اجل گلوب منی جبریله سندن ایلوری
یانّام اودور سیزیلدارام مثل کباب عم اوغلی جان
.
.
فکر ایلورم من اولماسام غنچه ده گللریم سولار
دردسریم هدر گیدر رنج و شکنجه مفت اولار
علّت اودور بولود کیمی اشکیله گوزلریم دولار
سیلی ایدر سراچه ی صبری خراب عم اوغلی جان
.
.
طول و دراز صحبتین یوخدی بو قدری حاجتی
فاطمه نین حضوریوه واردی نچه وصیّتی
جان سنون ایمدی جان منیم گللریمون امانتی
من کیمی قیل مواظبت ایله ثواب عم اوغلی جان
.
.
قویما سولا بالالاریم فرض ایله غنچه گلدولر
چون که بالا بو گودماقین زحمتینی آنا بولر
آغلاسا تلخکام اولار، گولسه بالا آنا گولر
قوی منی راحت ایلیوم قبریده خواب عم اوغلی جان
.
.
بیرده منی دانیشدیروب پرسش وضع حال ایله
گوگلومی آل ترحّماً رفع غم و ملال ایله
سوءِ ادب مشاهده ایلموسن حلال ایله
قورخورام ایتمه سن حلال اولسون عذاب عم اوغلی جان
.
.
رسمیدی دوره سین دوتار جان ویره نین قبیله سی
محتضره او حالیده خوش گلور آشنا سسی
صوتیوه من فدا اولوم گل اوخی جمعه سوره سی
صوتیوه وار علاقه بی حدّ و حساب عم اوغلی جان
.
.
روز ازل بلائیله گرچه خمیر اولوب گلیم
عرض ایلیوم نجه بلا یوخ ولی طاقت دلیم
یاندورار اهل عالمی پخش اولا گر بو نسگلیم
یاندوران اوددی واقعاً مرگ شباب عم اوغلی جان
.
.
بیرده منیم جنازه مه ویر گجه غسل قیل کفن
ایتگین ایله مزاریمی ایلمه دفنیمی علن
بولسه لر هاردادور منیم قبریم اولار گلوب گیدن
دشمنیم ایتمه سین ایابیله ذهاب عم اوغلی جان
.
.
حافظی وقت ضیقدور تیز ایله صحبتون تمام
گرچه نظامیله دوشور رشته ی نظمه بو کلام
فاطمه نین دلینجه قیل بو سوزی ورد صبح و شام
آغلاما منده قالمادی طاقت و تاب عم اوغلی جان
.
.
.
.
#فاطمیه_شهادت
#آغلاما_منده_قالمادی_طاقت_و_تاب_عم_اوغلی_جان
#حافظی_تبریزی
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  منزلیم هر چند ویراندور بابا خوش گلموسن #حضرت_رقیه_صافی_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی