حالات حضرت قاسم (ع)
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
.
آغلا او جوانه اونا صاحب زمن آغلار
هم آغلار حسین بن علی هم حسن آغلار
.
.
مظلومیدی مظلوم آنانون اوغلیدی قاسم
محنتله بقیعده یاتانون اوغلیدی قاسم
.
.
یوخ بقعه سی قبرینده یاتوبدور آتا مغموم
نه کرب بلاده بالانون مرقدی معلوم
عرضیم بودور اولدی آتا مظلوم بالا مظلوم
هیچ گلمدی گل یوزلرى بو دار فناده
پوزقوندی بقیعده بیریسی کرب و بلاده
.
.
وار خیمۀ شهده بیر اطاق نقشه سی عالی
کاشیدور اطاقون کفی دیواری حنالی
تشبیهدو طوی حجله سینه ظاهر حالی
دائم او اطاق ایچره ولی مجلس غم وار
زوارلر اوردا باش آچوب قاسمی اوخشار
.
.
ای محنت و غمدن اون اوچ ایل خاطری ناشاد
وی نامزدیندن ال اوزن غصه لی داماد
غمدن اولاجاقدور اوزمان گوگلمز آزاد
هو مشکلی دنیاده اگر حل ایده بلسوک
بو قاره لباسیله اطاق گورمووه گلسوک
.
.
بو رسمیدی عاشق ایلیر عشقیله الفت
طی ایلیر عشقون یولونی اهل حقیقت
گوردی علی اکبر گینوب قرمزی خلعت
قارداش بالاسی تز عمونون حالینه یاندى
تعظیم ایدوب ال سینه سی اوستنده دایاندی
.
.
گلدی دله عرض ایلدی سلطان حجازه
گلدوم عمو درگاهوه من اخذ نیازه
دعوایه حضوروندن ایدم کسب اجازه
تحصیل ادب قاسمون اکبردن ایدوبدور
بیر یولدى بو یول اکبر عم اوغلومدا گیدوبدور
.
.
اول گونکه عمو ظلمیله مسموم آتام ئولدی
دل یاندی دوداق پارچالانوب قدی بوکولدی
زهرون اثریندن جگری طشته توکولدی
دلدارلیق هر غصه لی وقتیمده ویروبسن
اکبر له منی دائمی بیر گوزده گوروبسن
.
.
بیداریدو روحیم نجه آخر یاتا بلّم
یا که آتالیق حقّیوی باشدان آتا بلّم
گرچه آتام ئولموش سنی اما آتا بلّم
قلبیمده ئولومدن ابدأً واهمه یوخدی
سنّیمده آز اولسا عمو عشقیم سنه چوخدی
.
.
وار روح شهامت عمو جان منده بلورسمن
تأیید ایده جک عرضیمی آینده بلورسن
حق عاشقیم من بلورم سنده بلورسن
جان ملکنی عشقونده ایله ترک ایدرم من
واللهی عمو جنگه زرهسیز گیدرم من
.
.
بو کوینگیلن من گیدرم آرتا وقاریم
اوخلار دگه فوراً پوزولا نقش نگاریم
گیرم دیری قالدوم وطنه دوشدی گذاریم
دریای مصیبت ده نه نوعی اوزرم من
یوخ اکبر عم اوغلوم عمو کیمله گزرم من
.
.
شایسته دگل سن منی ایللردن آیرسون
سولقون گلی یا که گل احمردن آیرسون
رخصت منه گر ویرمه سون اکبردن آیرسون
حاشا وطنه عزم ایلیم دشت بلادن
بیر باش نجفه من گیدرم کرب و بلادن
.
.
یالواردی اجازه آلوب اول قلبی شکسته
سلطان اوزی دامادینی میندیردى آت اوسته
گتدی یارالاندى یارالار ایلدی خسته
آهو کیمی صیادلرون دامنه دوشدی
سیمرغیدی درّنده لرون کامینه دوشدی
.
.
میدانه حسین گیتدی نوا عالمه سالدى
اوضاعی یاخندان گوروب آیری حالا قالدى
آتلار ایاقندان داغیلان پیکرین آلدی
ایجاده سبب شیونه ایجادی گتوردی
طوی حجله سینه طوی گونی دامادی گتوردی
.
.
اکبر کیمی اطرافین آلوب آل پیمبر
زلفینی پریشان ایلدی قزلار حرملر
یوز دوتدی دیدی زینبه گویا شه محشر
دقتله باخوب گورنجه طوی مجلسی خوشدی
افسوس حسن قارداشیمون تک یری بوشدی
.
.
بیرده باجی بیر ناقصی وار سن ایله اکمل
داماد آناسیلا اولی طوی بزمی مجلل
گیت قاسم آناسین گتوروب مجلسه تز گل
اما دئ عروسون باشینا قاره نی سالدى
گل مجلس جشنی بالاوون کوفیه قالدی
.
.
#قاسمیه #انور_اردبیلی
#قاسمیه_شهادت
#آغلا_او_جوانه_اونا_صاحب_زمن_آغلار
#ترکی
.
✍️ #زبدةالاشعار ✍️
.
🆔: @nohe_torki
نظر دهید