زبدةالاشعار

آقام عباس اوجا منصبدی اوجا قامتدی #عباسیه_امانی_اردبیلی

شجاعت حضرت ابوالفضل العباس علیه السلام
اشاره به #مجلس_ولید
.
.
حاج علیرضا امانی مجد اردبیلی
.
.
آقام عبّاس اوجا منصبدی اوجا قامتدی
شهرۀ شوکت و خشم و غضب و غیرتدی
.
بندۀ صالح اولوب منصبین الله وِئردی
صاحب معرفت و عزّت و حریّیتدی
.
علم پیکاریده الله اَلی اُستادی اولوب
سیف مَسلولی زبانزدی بلا شهرتدی
.
ئوزی قاچمازدی جَدَلدن ، قاچانی قومازدی
علوی ملّته البتّه هدف رحمتدی
.
نسباً قارداشیدی مَنصَبی دربان حسین
خالصانه ائلییَن قارداشنا خدمتدی
.
ایکی وارسته دوغولموشدی ایکی فاطمه دن
هر بیری صُنعِ تکِ بی بَدَلِ خلقتدی
.
بیری گون اولدی بیری آی اِئوُن آباد علی
عالمه هر بیری بیر سایۀ امنیتدی
.
تازه قویموشدی او گونلر کی قدم دنیایه
گوردولر اهل مدینه نه گوزل صورتدی
.
کوچه لردن سووشان حالدا خانوم اُمّ ِبنین
گوردی عباسه تماشا اِ ئلییَن ، ملتدی
.
کوچه نسوانی چکور صف باخالار عبّاسه
دِییلَن شأن و شرفدی وِئریلَن قیمتدی
.
گورن عباسی دییَردی نه گوزل گوزلری وار
آی خانملار باخون اَبرولرینه فرصتدی
.
سود امر وقتی دی امّا نه اوزون قولاّری وار
اَ نّی دور شانه هنر جسمیده جمعیّتدی
.
خیری اولسون ننه سی ام بنین چاتدی گونه
بختور گور نئجه بو دهریده خوش قسمتدی
.
وِئریب الله نه گوزلّیکده اوغول بختوره
متّصل قاشلاری یوزده عَلَمِ وحدتدی
.
بله بیر اوغلی اولان سایماز اِئوینده ئوگِیین
اوکی هر لحظه ئوگِیدن آزالار قیمتدی
.
ایندی زینب بیله جک دوغما ئوگی فرقی نَدی
ننه لیک خوشدا دانشسا ئوگیه محنتدی
.
ائشیدردی دِییلَن دیل یاراسن ام بنین
طعنه نین باعثی آگاهیدی ضدیّتدی
.
روحین اما ائلیوردی نگران دیل یاراسی
گوردی بیر ایش کی برازندِۀ شخصیّتدی
.
دوتدی تصمیمین اباالفضلین آلوب آغوشه
بو گون اوغلوم دِئدی روز شرف وشوکتدی
.
آلدی اطرافه خانم فاطمه نین دورد بالاسن
ننه لیک صحبتی بیلسونله یالان صحبتدی
.
اوتورون سیز دئدی عباس دولانسون باشوزا
بالامون مکتبی اَوّ لدَن حسینیّتدی
.
ننه ده اولماسام امّا ننه لیگ اِیلَمرم
منیم حقّیمده سیزه کیم نه دِئسه تُهمتدی
.
بالالاریم سیزه خاطر آدیمی دوندَردیم
کیم سورشسا منی سیزدن بویورون کلفتدی
.
هر آنا هر بالیا وِئرسه بِئلَه تربیتی
نوکر اولماخدا اِئله بیر بالیا منّتدی
.
اودی عباس ئوزونه دِیدی حسین نوکریم
خدمتیم اولسا قبولی منه حیثیّتدی
.
عشق عباسی، حسین گور نجه جبران ائله دی
بیلدی چون قارداشی سرچشمۀ حُریّتدی
.
وِئردی عباسه عَلَم اِئتدی علمدار ئوزونه
بیلسون عالم بو عَلَم ، شاه عَلَمِ نصرتدی
.
بولارون فکری محبّتدی نه نوکر نه آقا
عملون باعثی باطنده اولان نیّتدی
.
نیت باطنی عباس عملاً وئِردی نشان
خطّ ِ سیریم بویوروب دایرۀ عزّتدی
.
انتخاب ائیله دی اون یدّی نفر آزاده
آل هاشمنن اولاردان کی شرف کسوتدی
.
پیشمرگان حسین ابن علی قویدی آدن
جان نثار اتمگه حاضر دئِدی بو امّتدی
.
شاهین ائیلردی حفاظت بو محافظ لرنن
یعنی فرماندهِ جنگ بئله بیر دولتدی
.
دولت عشقی فلک تنگه سالان گونلرده
گوردی عبّاس ، حسینی قویا تک غفلتدی
.
عرض اِئدَردی آقا دنیانی فلک وِئرسه منه
منی سنّن آیرا ، آلسام اگر خفّتدی
.
بو محبت نه دی بیلمم ، ولی ایمانیم وار
نه وراثتدی دلیلی نه ده قومیّتدی
.
خواهشیم وار آقا گیتسون هارا ، من سیز گیتمه
سنه کیم ائتسه جسارت منچون ذلّتدی
.
بونا سوز یوخ کی مسلّطدی الون شمشیره
اولماقم سنله ضرورتدی ، منه حاجتدی
.
بیلورم بزم ولیده ائلیوبلر دعوت
اذن وئِر منده گلیم ، لطف ائله سون منّتدی
.
هچ تقاضا آقا ، سنّن ، بیلوسن ائتمه میشم
بونودا ایستین عباس دگول ، غیرتدی
.
قویماسوندا بیلوسن امری اطاعت اِئدَرم
نگرانم ولی دنیا گوزومه ظلمتدی
.
دئدی عباسه حسین ، اولما ، برادر ، نگران
چاره بو مسئلیه سنده اولان همّتدی
.
منتظر قال سنی وقتینده ئوزوم سَسلیَرَم
تک اگر بزم ولیده گِئدورم حکمتدی
.
به به اندازۀ ایثار اباالفضله باخون
امتحان وقتی ئوزون گور نه گوزل گورستدی
.
سیر نظمینده فلک ساعت موعوده چاتوب
دشمنون بزمینه ظاهرده حسین دعوتدی
.
بیر عمارتدی مقابلده نگهبان دایانوب
خفقان شهری دوتوب کوچه دولی وحشتدی
.
مجلسه تکجه حسین ابن علی داخل اولوب
دانشور مجمعِ اشراریله بیر مدّتدی
.
اُمَوی نسلین ایاق آلتدا لگد مال اِئلیور
چون علمدار کیمین قارداشی وار،راحتدی
.
هامی آگاهیدی بیر توطئه دور بو دعوت
یوخسا سوز اصلیده یا مرگ ویا بیعتدی
.
پیشمرگان حسین ابن علی چولده قالوب
هامی شمشیره مسلّح دی قوی صولتدی
.
هله عبّاس محافضلری آرام ائلیور
شهری قان ائتمه گه آماده بو جمعیّتدی
.
هامی گوزلور بیر اشاره اولا فرمانده دن
ماهِ هاشم ولی در حال مدیریّت دی
.
قَدَم اوستن قدم آتدخجا اوپور یِئر قدمین
مرتضا اوغلودی باشدان ایاقا هیبتدی
.
درِ دَربارِ ولیده اِئلَه دقّتله باخور
گوزلرین یومّاغا کیپریکلرینه نوبتدی
.
اونداکی قارداشی مجلسده اَلین وُردی اله
اِئلَه بیل بحر بلا موج اِئلییَن ساعتدی
.
پیشمرگان حسین آتدلار اَل شمشیره
مسئله مسئلۀ جانِ شهِ اُمّتدی
.
هله ایستوردی بولار حملیه آماده اولا
درگهِ ظلمه ، مهِ هاشمی، غیرت گَتدی
.
یا علی سسله دی اوّل قاپیا وِئردی تکان
عالمه غیرتی تفسیر ائلیوب ئورگتدی
.
جنگ خندقدی علی خیبری ایستور داغدا
قان همان قانیدی ، غیرتده همان غیرتدی
.
وُردی بیر ضربه ایکی اَل ، ائله با هم قاپیا
سندی ارکانی آچوق طاقه لرین تیترَتدی
.
مجلسه داخل اولوب ، قاچدی هره بیرطرفه
گوردی فرصت ائله،ئوز ایسته دیگی فرصتدی
.
دولانوب باخدی اَوَل دقتیلاً قارداشنا
طلعتین گوردی بولودلار بورییَن طلعتدی
.
بله معلوم اولور اَعدا اونی تهدید ائلیوب
رنگ رخساری بیان ایلوری ناراحتدی
.
مرتضا قانی جوشوب ایله دی عبّاسه اثر
لقبی چوخدی بو شیرین بیری کم طاقتدی
.
دوتدی مَروانی اَل اوسته یئره گویدن وُردی
گوز گوزه باخدی بوگوز قاندی اوگوزحیرتدی
.
بویوروب فکر ائله دوز تکدی بو مجلسده حسین
سسوزی قوزادوز اطرافی دِئدوز خلوتدی؟
.
چپ باخامّز اُمَوی لر علوی ملّتینه
دشمن آل علی حشره کیمین لعنتدی
.
فاطمه اوغلی سیزون حاکیموزه باش اگمز
کیمسه میخواره و سگ باز اولا بی غیرتدی
.
اموی نسلی هامی بیر یئره ، یکجا یغشا
تکجه پَر قدری هراس اولسا، منه ، ذلّتدی
.
اولان آلان اِئشیدوب اولمیانا نقل اِئله سین
قارداشم قانیله آمادۀ بیر نهضت دی
.
پرچم نهضتینه اولاّم ئوزوم پرچمدار
اللّهن لطفی اوزون قولاّرما قوّتدی
.
ئولموشم ؟ قارداشما بیعتی تکلیف اِئدوسوز؟
ئورگدیم قوی سنه بیعت نجه بیر بیعتدی
.
چکدی شمشیری گلوب موجه او دریای غضب
ائله بیل ماریدی میداندا یخان ساعتدی
.
گوردی مروان یاخاسی قالدی چتین اللرده
فاطمه ساحتی بیلدی نه گوزل ساحتدی
.
دئدی زهرایه قسم جرمیمی عفو ایله حسین
منی آزاد اِئله بو شیر قَدَر قدرتدی
.
دشمنون آندی حسینی اِئله دی ناراحت
گون یاخونّاشدی آیا یئرده دَمِ وحدتدی
.
قارداشن بوینونا آهیله سالوب قولاّرینی
بویوروبدی ایکی عالمده آدون عزّتدی
.
غیرت و همّت و احساسوه احسن قارداش
بوشلا گِتسون بونی ، زهرانن آدی رحمتدی
.
گلدی زهرا آدی باغلاندی اباالفضلین اَلی
بو آدین لازمی هر یئرده دئِدی حرمتدی
.
دِئدی شمشیری، اوزون اللره،رحم اِیلَمیون
آغلیوب پنجه لر امّا دئِدیلر عادتدی
.
فاطمه آدینه عبّاس او قَدَر عاشقیدی
ننه مین ارثی دیَیردی منیچون حسرتدی
.
اونا ئورگتمیشیدی ام بنین اوخشاماسی
گورمیوب فاطمه خوش گون ،گورَه نی حسرتدی
.
اودییَنده خانمم وای بو دییَردی ننه وای
هاردا گورسیدله زینب گِئدوب اِئو خلوتدی
.
اودئدی محسنه لای لای بو دِئدی جان قارداش
او دِئدی گیزلیدی قبری بو دِئدی جنّتدی
.
اودییَنده قاپودا فاطمه دیلدن دوشدی
بو دیَیردی منه نیسگل اولان اول ساعتدی
.
قاپودان هر گئجه خلوتده سوآل ایلَردی
دوزدی اود وُرسالا یانماق سنه ماهیّتدی
.
ای قاپی محسن ئولَنده نئجه باخدون ننمه
محسنی گوردون ئولوب فکری ولی عفّتدی
.
ساخلامشدون اودی مظلوم آنامی گیزلینده
بیلدون اوباش آراسی قانه باتان عصمتدی؟
.
ای قاپی سیّدِۀ محشری من گورمه میشم
منه بو باره ده بیر سینه دولی رقّتدی
.
گوره بیلسیدیم اوپردیم ننه مین مقدمینی
خاک پایی منه گر قسمت اولا منّتدی
.
✔️ اجابت آرزوی حضرت ابوالفضل علیه السلام در لحظه شهادت
.
دوزدی زهرانی گرک محشر کبرا ده گورم
“بیلمگ اولماز ائله ممکندی بو دنیاده گورم”
.
بو سوزی بسکی فلک قسمته تکرار اِئلَه دی
بخت سرگشته نی آخر ئوزونه یار ائِلَه دی
.
علقم اوسته چاتوب عباس ئورگین آرزوسنا
اوردا زهرای جوان مرگیله دیدار ائله دی
.
پرده لر اولدی کانَّه او گون علقمده کنار
عشق ئوزون عالم معناده پدیدار ائله دی
.
اوندا کی دگدی آت اوسته باشنا آهن عمود
ائِلَه قولسوز بدنین لنگره وادار ائله دی
.
اوجا یئردن یخلاندا دِئدی زهرا وای اوغول
غصّه زهرانی فغان اِئتمگه ناچار ائله دی
.
تشنه سقّا خانومی بو وای اوغولدان تانودی
او دئدی سینمه گل بو بئِله رفتار ائله دی
.
ذهنیده اِئتدی مجسّم در و دیوار آراسن
فاطمه یاره لرین ذهنیده معیار ائله دی
.
یوزی اوستونده دوشوب تپراقا اوپدی قدمین
“یادنا دوشدی قاپینان نجه گفتار ائله دی”
.
دِئدی بالینیمه گلدون نه یامان یئرده ننه
خوش گلوبسن قَدَمون فیضیمی سرشار ائله دی
.
من بو دیداره اوتوز دورد ایل آنا صبر ائله دیم
بخت سرگشته محلّینده چوخ اِصرار ائله دی
.
کیم دیَیردی سنی بو حالیده من گورمه لیم
منّن آیا نیه بختیم بِئله رفتار ائله دی
.
آنا من علقمه گلدیم آپارام قیزلارا سو
دشمن امّا منی جنگ ائتمگه ناچار ائله دی
.
ایکی قول بیرگوزی وِئردیم آچالار خیمه یولون
یول کَسَن مشگیمیده داخل بازار ائله دی
.
اوخلیوب مشگیمی اونّان منه یول آچدی قوشون
کوفه نامردیلری سود امری زار ائله دی
.
ایندی دای گئتمه گیم اولماز آقامون خیمه سینه
مشگیمین شرمی منی گور نه گرفتار ائله دی
.
#عباسیه_شجاعت
#عباسیه_شهادت
#آقام_عباس_اوجا_منصبدی_اوجا_قامتدی
#امانی_اردبیلی #عباسیه
#ترکی
#زبدةالاشعار

متن پیشنهادی:  نئجه عمه توز باسوبدی گور نیزه ده قلم قاشین #راه_شام_یحیوی_اردبیلی

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی