زبدةالاشعار

آلتی قرن اولدی ز میلاد مسیحا سپری #پیامبراسلام_انور_اردبیلی

حالات حضرت رسول اکرم (ص)
.
✍️ #زبدةالاشعار✍️
.
🆔: @nohe_torki
.
مرحوم انور اردبیلی
.
آلتی قرن اولدی ز میلاد مسیحا سپری
قالمادی جامعۀ توحید اثری
چکدی درنده کیمی کامه جهالت بشری
ظلمت شرک دوتوب قلبلری ایلدی تار
نور ایمان چکلوب قالمادی انساندا وقار
.
.
آلدى انصاف و عدالت یرینی ظلم و جفا
کشت و کشتاریله گتدی آرادان صلح و صفا
نه حیا قالدی بشرده نه صداقت نه وفا
شرق و غربین آراسی جهل و خرافتله دولوب
حال انجیل او زمان ایندیکه قرآن تک اولوب
.
.
کاهن و کاهنه لر رهبر اولوبدور بشره
رمل رمالیدی تمییز ویرن خیر و شره
ملل عالمی سالمشدیلا چاه خطره
تیره ایتمشدی دیانت افقین دود فساد
حکم فرمائیدی بخل و حسد و ظلم و عناد
.
.
زورمندیدی کیمون پنجه سی اولمشدی امیر
صاحب درهمدی جامعه ده شخص کبیر
عقلا زمره سی منفوریدی اولسیدی فقیر
جنگل واهمه و وحشته بنذوردی جهان
چار پاتک اونون اوستونده یاشوردی انسان
.
.
کعبۀ اقدس و اعظم حرم امن خدا
که خلیل الله اونی سجده گه ایتمشدی بنا
یوخودی بیر کس ایده ساحت معبوده ثنا
مطلع جلوۂ ایمانیدی اول بیت متین
عوض ایتمشدی صنم صورت روحانیتین
.
.
ایله بی قیمتیدی گوهر اعلای خرد
موقع سختیده مخلوق خداوند احد
لات و عزا و هبلدن گیدوب ایستوردی مدد
زهی اظهار تأسف یری واردور بو سوزون
صاحب روح تیکه قالب بی روحه گوزون
.
.
غار حراده همان عصرده بیر شخص امین
کفر و کثرتدن اوزاق عالم وحدتله قرین
مغزی روشن سوزی عالی اوزی محبوب و متین
پارسای ثقلین علت ایجاد وجود
نام نامیسی محمددی حبیب معبود
.
.
آسمان ملکوتیده او فخر ملکوت
فکر توحیدیله تاپموشدی جلال و جبروت
ذات حقی اوزی اوز نفسنه قیلمشدی ثبوت
هستی خالق نامرئیه ایتمیشدی یقین
که اونون حیطۀ حکمنده دی افلاک و زمین
.
.
بذل ایدوب لطفی اونون ثابت و سیاره نظام
گیجه نی گوندوزه تبدیل ایلیور گوندوزی شام
بشری نطقیله ایلوبدی بیر اندازه مقام
مه و خورشیدی اودور مایه آسایش ایدن
نیلگون گویلره اولدوزلاری آرایش ایدن
.
.
زنده داریدی دل غاریده تنها دل شب
گرمدی عشق حقیقتله او پاکیزه نسب
مبدأ عالی حقدن کمک ایلوردی طلب
خلقی آگه ایلیه حقه دل آگهیله
لا اله نفینی اثبات ایده الهیله
.
.
اورک آئینه سنه ویرمشیدی بسکه صفا
وجه معبودینه اولموشدی او دور چهره نما
اولدی ثقلیّت وحى حقه اول قلبده جا
ایله قلبیدی اونا لطف خدا شاملیدی
فیض فیاضی افاضه ایلسون قابلیدی
.
.
#بیست_و_هفت_رجب اول صاحب اخلاقی جمیل
درس وحیی ایلدی جانب حقدن تحصیل
غاری پرنور ایلیوب نور خداوند جلیل
حامل وحی الهی اونا عرض ایتدی سلام
یاریدن یاره ایدوبدی صورا روحانی پیام
.

متن پیشنهادی:  قسم به سوره ی والشّمس یعنی روی محمّد #پیامبراسلام_سعدی_زمان

اقرأ بسم سسی سالدی دل حرّایه طنین
روح پیغمبری جذب ایتدی او کلمات وزین
هیبت وحی خدا سینه سین ایتدی سنگین
جلوۀ یاری گوروب غارده مدهوش اولدی
یار بی مثل نبوتله هم آغوش اولدی
.
.
دامن کوهدن اندی او بیر اندازه مقام
حالتین گوردی خدیجه دیدنی ای میر گرام
بو جبینونده که نوری سنه کیم ایتدی کرام
دیدی مبعوث ایلیوبلدور منی خلاق عقول
کلمۀ طیبه ایله ائله اسلامی قبول
.
.
مدت اوچ ایل او دلباختۀ راز و نیاز
بیر على بیرده خدیجه بیر اوزی قیلدی نماز
دعوته بعثتون اوچ منجی ایلی اولدی مجاز
مجمع اوّله افواهنی دعوت ایلدی
بیت عمرانده تشریح رسالت ایلدی
.
.
ای منیم قوم و قبیلم گلون اللهه طرف
شرف دین مبینیله تاپون عز و شرف
ایتمیون عمروزی سیز کفر و گناهیله تلف
من سخن گوی الهم سوزومه گوش ایلیون
سُنن سابق و اصنامی فراموش ایلیون
.
.
اهل مجلسده بو سوز ایلمدی ذرّه اثر
بولهب گلدی دیله ایلدی اظهار نظر
گتدیگون دین بیزه لازم دگل ای فتنه سیر
لات و عزا و هبلدن نجه بیز ال گؤتورَک
گوزه گورسنمین اللهوه ایمان گؤتورَک
.
.
قیلدی تکرار پیمبر گنه اوز دعوتنی
قویدی آغزیندا ابوجهل اونون صحبتنی
مغز کوته نه بلور نغز سوزون قیمتنی
رد ایدر منطقی آئینۀ دل دوتسا کدر
منعکس ایلیه بلمز سوزی تا ایتسون اثر
.
.
مکه نون هرزه رجالی سفهای اعراب
سهلدور ویرمدی پیغمبره معقول جواب
نقشۀ قتلنی پی ریزی ایدوب اهل عذاب
خانه ندوه اولوب مجلس شورای قریش
بیر نچه جاهلیدی انجمن آرای قریش
.
.
دوتدی تصمیم خطرناک ابوجهل دنی
گرم تبلیغ اولان وقته رسول مدنی
حرم امن خداده توکه قانن علنی
سوء قصدین ایلیه بلمدى اما علنی
حفظ ده ساخلادی پیغمبری ذات ازلی
.
.
گون بگون آرتروب اوز نورینی خورشید هدا
بانک توحیده ویروب عدّۀ معدود صدا
بو عملدن اولوب آشفته ولی اهل جفا
حین تبلیغ هدف ایتدیله ظلمون داشنا
یول گیدن وقته اونون توکدوله تپراق باشنا
.
.
مکه تنگ اولدی جفادن او جلالت نظره
(طائفه) گتدی خطردن چخا دوشدی خطره
ویرمدی ذره ندای ملکوتی ثمره
هرزه لر صادق و معصومه قویوب ساحر آدی
طرد ایدوبدی اونی هیچ کیمسه قوناق ساخلامادی
.
.
مکّیه رجعت ایدوب دلده ملال و محنى
طائفی ترک ایلین وقته رسول مدنی
سنگسار ایلدیلر یاره لنوبدور بدنی
اوزی اعلام ایلیوب بو اسف آور خبری
دردناک ایتدی منیم قلبمی طائف سفری
.
.
نقدر فرصت انشاد ویرلسه قلمه
ظلم مکّیلری سوز یوخ گتورنمز رقمه
زادگاهی ایله تنگ اولدی او صاحب کرمه
پرده شرمی صنادی قریش ایلدی چاک
گلدیلر خوابگهنده اونی ایتسونله هلاک
.
.
یثربه اولدی پناهنده او صاحب صلوات
لشگر کفریله قیلدی متعدد غزوات
غزوۀ سخت احد جسمنه اولدی حملات
قلبنی داغلادی ظلم آتشنون گسترشی
طاق ابروسنه داش دگدی شکست اولدی دیشی
.
.
هجرتون سگّزی یعنی سنۀ فتح و ظفر
مکّه فتح اولدی گلوب کعبیه اول پاک نظر
محو اصنام ایلیوب قویمادى بتلردن اثر
دفتر شرک پوزوب وحدتی شیرازه لدی
کهبه ده جدّی خلیلون روشین تازه لدى
.
.
حمد معبود ایلیوب ایلدی بیر نطق عمیق
عفو ایدوب کینه صفت خصم لرین قیلدی طلیق
دیدی برنامۀ دینوزده ایدون فکر دقیق
بیردی سادات قریشیله غلام حبشی
برتریّت او کسوندور اولا تقوا روشی
.
.
گجه گوندوز ایگرمی اوچ ایل ایلوبدی تلاش
رخت فاخر گینوب سالمادی آسوده فراش
بطننه قالدی گرسنه نچه گون باغلادی داش
کاخ اسلامه ولی قویدى خلل سیز بنیان
آز قالور مسلم دنیا اولا بش یوز میلیان
.
.
عمرینون آخرین ایامی دچار اولدی تبه
ایله تب که یتوروب جاننی آخرده لبه
ابن مسعوده انیسیی او والا نسبه
ایدور اظهار الیم دگدی او یورقون بدنه
گر دیسم یاندی الیم ایتمیون ایراد منه
.
.
ایله سوزان تبیله دوردی او سلطان حجاز
شهردن چخدی کناره ایلسون راز و نیاز
قبر خونین کفنان اُحده قیلدی نماز
آز قالور درد و بلادن دیدی دینجلمگیمه
قرب پر رحمت معبوده قوناق گلمگیمه
.
.
#بیست_و_هشت_صفر اوز قبله ده آخر لحظات
بستر مرگده حقدن بیزه ایستوردی نجات
آز قالوردی چکه آغوشنه آغوش ممات
شدت تب یوزین ایتمشدی گل سرخ نما
دانه دانه اجلون شبنمی ویرمشدی صفا
.
.
قزی زهرا نظر ایلوردی او زیبا گوزینه
اوخشیوردی آتاسین اشگی آخوردی یوزینه
ضعفدن ختم پیمبر که گلوردی اوزینه
یالواروردی یوزوی اشگیله ایسلاتما قیزیم
بو اوغولسوز آتاوی آغلیوب آغلاتما قیزیم
.
.
نبوی منزلنی دوتمشدی صوت عزا
سس اوجالدی حسنین أیستدی گلسون اطاقا
دوردی مانع اولا اوغلانلارینا شیر خدا
اعتراض ایتدی پیمبر اونا فی الفوری ولی
بالالاریمی نیه گلمگه قویمورسان علی
.
.
رخ تبدارینه حسرتله یوزون قویدی حسن
باشنی قویدى حسین سینه سینه دلده محن
باغبان ایگلدی نوگل لرین ایتدی شیون
دیدی گویا اولارون بوسه ایدن وقته یوزون
آتیوزدن نگرانم من اوغول هر ایکوزون
.
.
بلورم بیر به بیر اوغلوم حسنون غصه لرین
ایندیدن من گورورم طشته توکولمش جگرین
هاکذا أوغلوم حسینون گورورم هر خطرین
گون قبا قنده قوری یرده دوشوب قالماقنی
بین نهرینده عطشان ال ایاق چالماقنى
.
.
گوزلری قانلو کمک آختارار اما یوخ اولار
یاره سی سینه سی اوسته شهدادن چوخ اولار
قلبنی پرپر ایدن گل کیمی اوچ پر اوخ اولار
آغلادار درد و ملالی فلکون مهر و مهین
الى قوینوندا دولانّام بالامون قتلگهین
.
.
#پیامبراسلام_انور_اردبیلی
#مبعث #پیامبراسلام_شهادت
#آلتی_قرن_اولدی_ز_میلاد_مسیحا_سپری
#مردان_جاوید #ترکی
.
✍️ #زبدةالاشعار✍️
.
🆔: @nohe_torki

متن پیشنهادی:  یارب منه لطف ایله اولوم عیبدن عاری #مناجات_عدلی_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی