زبدةالاشعار

آلدی قراریمی گینه بیر جلوۂ نگار #کاظمیه_شهاب_تبریزی

حالات حضرت موسی ابن جعفر (ع)
.
✍️ #زبدةالاشعار ✍️
.
🆔: @nohe_torki
.
مرحوم شهاب تبریزی
.
آلدی قراریمی گینه بیر جلوۂ نگار
صبریم ایوین یخوب داغیدوب ایتدی تارمار
.
ارکان صبره ایله تزلزل سالوب پوزوب
نه خانه قویدی خانه نشینه نه بیر حصار
.
بیخانمان اولان دل سرگشتۀ حزین
بیر خانۀ امان تاپا بیلمور دوتا قرار
.
بو وسعتیله قلبیم ایوی بس اولوبدی تنگ
گویا که منجنیقدی هر دم ویرور فشار
.
نه اهل دل وار ایتماقا اظهار درد دل
نه دلده وار لیاقت اولا درده همجوار
.
بیر یرکه نه اؤزونده نه اهلینده وار وفا
خیره غلطدی اولماق او یردن امیدوار
.
ایدل گر ایسته سن آچاسان باش حیاتیدن
ئولدورمه اؤز اؤزین بو مکاندان ایله فرار
.
بیر یار همزبان که سنه بو وطنده یوخ
بیهوده چکمه غصّه ایله غربت اختیار
.
گیتسن دیار غربته بغداده گیت گلن
محبوبون اوردادی اورادی سن دیَن دیار
.
چوخ گزمه حبسخانۀ هارونی آل خبر
وار حاجتون اگر او یره ایله بیر گذار
.
باب الحوائج حضرت موسی بن جعفری
گور ایلیوبدولر نجه محبوس، خوار و زار
.
نه سن ایشتموسن که نجه حبسگاهمش
نه ذکرین ایلیوب سنه بیر ذاکر آشکار
.
نه وار منیم دلیمده او جرأت بیان ایدم
نه واردی قدرتی که قلم ایلیه نگار
.
اما بو قدر وار که ایله توبتوئیدی
تاریک اولوردی صبح و مسا لیل و هم نهار
.
گوندوز گیجه بلنمزیدی دوشمزیدى گون
مخصوصیدی امامه همان حبسگاه تار
.
بیر نوعیلن رطوبتیدی اوُل شهون یری
شرم ایلورم بیانینه عالمدی کردگار
.
بو سوزدن آنلاسان ایله بیر صبر صاحبی
گه گه دیردی بیر منی بوردان ایدون کنار
.
آز قالدى محو ایده بو رطوبت وجودیمی
من بینوایه ایلمیون ظلم بیشمار
.
راوی دیر که بیر گون او شه بام حبسده
گوردوم که اگلشوب سارالوبدی او گلعذار
.
بسکه ضعیف اولوبدی وجودی اسنده یل
صاق و صولا ایدر حرکت چون گل بهار
.
واردور خبرده یدی ایل اون یدّی ایل بش ایل
محبوس اولوب او ذلّتیله اول بزرگوار
.
مشغولیدی او مدت عمرین عبادته
معبودینه ایدردی مناجات، زار زار
.
آلنین قویاردی اکثر اوقات سجدیه
راز و نیاز ایدردی او سلطان تاجدار
.
هر دم دیردی سن اوزون عالمسن ای خدا
آئینۀ دلیمده منیم یوخدی هئچ غبار
.
سندن همیشه من اوزوم ایلردیم آرزو
بیله کنار گوشه بیله امن روزگار
.
آسوده بیر عبادت ایدیدیم خدا سنه
شکر ایلرم ئولنجه که توفیقون اولدی یار
.
عذر ایسترم امام زمان یابن العسکری
ای ذوالفقار صاحبی وی شاه تاجدار
.
آخرده بیله عابد و زاهد امامیلن
رفتار ایدوبدی گور نجه هارون نابکار
.
دوشدی بو فکره ایلیه مسموم او بیکسی
سند لعینه ایلدی بو امری واگذار
.
مأمور ایدوب هلاک ایده موسی بن جعفری
بیر سینی اول خبیثه رطب ویردی زهردار
.
تاپشوردی سعی فیل بولاری میل ایده امام
ایتمه مسامحه منی بوفکردن قوتار
.
آلدی همان رطبلری زندانه یوز قویوب
داخل اولوب حضور امامه او کین شعار
.
قویدی برابرینده یره باخدی بیر امام
تغییر تاپدی حالی چکوب آه شعله بار
.
تأکید ایدوب امامه او بیشرم و بیحیا
بیر نچه دانه میل قیلوب دلده اضطرار
.
تهدیدیلن اولوب متعرّض دوباره دن
بیر باخدی حسرتیله او مظلوم غم دچار
.
فرمایش ایتدی آز منی اینجید بسیمدی بو
گلدی اله مرام دلون ایله شرم و عار
.
بو نچه دانه ظالم اوتان ئولدورر منی
ال چک گیلن داخی جگریمده آلشدی نار
.
اول بیحیا ایاقه دوروب چخدی حبسدن
قالدی امام او حالیله بی یار و غمگسار
.
قویدی خیالینه گئده بیرده مدینیه
اهل و عیالینی گوره اول سیّد کبار
.
بو مقصدین مسیّبه قیلدی بیان او شه
عرض ایلدی امامه که ای شاه با وقار
.
بغداد هارا مدینه هارا یا که سن هارا
چوخدور مسافتی وار اوزونده بو انکسار
.
مولای، ثانیاً قاپولار باغلودور تمام
اطرافده دوروبلا سراسر نگاهدار
.
سست ایلمه بویوردی امام اعتقادیوی
وار بیز ائمه ده هامی بیر امره اقتدار
.
قیلدی اشاره کنده و زنجیر آچلدیلار
اعجازیلن مدینیه گیتدی او شهریار
.
یغدی مخدّراتینی اطرافینه تمام
بیر بیر وداع قیلدى کباریله هم صغار
.
اطفالینون چوخی یوخودیدی اویاتمادی
آهسته یوزلریندن اؤپوب ایتدی اعتذار
.
اهل حرمدن هر بیری ایستردی سس چکه
مانع اولوب ایدردی او شه امر اصطبار
.
چوخ تاپشوروردی سیز اوجادان ناله ایتمیون
تا خلق ایچینده اولمیه بو مطلب انتشار
.
دشمنلریم ائشیتسه اگر بو قضیه نی
اوغلوم رضانی ده دوتوب ایللّه انزجار
.
تاپشوردی اهل بیتنی پروردگارینه
ایتدی مراجعت گینه بغداده اشگبار
.
بو ماجرانی بیله مسیب بیان ایدر
گیتدی امام او دمکه منی قویدی دلفگار
.
هارون سئوال ایتسه دیردیم که نه دیوم
زنداندا بو خیالیله دورموشدوم انتظار
.
بیرده باخاندا گوردوم امام اوز یرینده دور
زنجیری اوز الیله گینه بوینونا سالار
.
دوتدی یوزین بویوردی مسیب سو ویر منه
یاندی جگرلریم دوشوب انداممه شرار
.
سو حاضر ایتدیم آلدى بیر آز میل ایدوب أمام
سبز اولدی گل جمالی دوتوب قلبی اضطرار
.
بلدوم که خاتمه تاپوب امری او سرورین
حالیندن آشکاریدی گوردوم که احتضار
.
اول قبله گاه اهل یقین دوندی قبلیه
قبله دوزلدى هوله دوشوب چرخ کجمدار
.
ذکر شهادتینی دیوب یومدی گوزلرین
گویلرده چکدی روح الامین بو وفاته جار
.
چخدیم دیر مسیب او دم حبسگاهدن
اولدوم روانه سرعتیله با غم هزار
.
هارونی گلدیم ایلدیم آگه قضیه دن
خوشنود اولوب او بحر ستم معدن شرار
.
امر ایتدی نعشی اؤسته چکون اؤز عباسینی
اولدی سرور اوزیله او دم عازم شکار
.
زنجیره باغلو حضرت موسی جنازه سی
اوچ گون قالوب او حالیله زنداندا خوار و زار
.
اوچ گون گیجوب قییتدی او بیدین شکاریدن
بیر حکم قیلدی فاطمه نی ایتدی داغدار
.
بیر نردبانی دورت نفر حمّالیله بیله
زندانه گوندروب او جفا جوی کین شعار
.
تابوته باخ جنازیه باخ بیر حیایه باخ
تا حشر اولونجا اوُلگلن ای چرخ شرمسار
.
باشدان ایاقدان اولدولار حامل جنازیه
سنگین دور گوروبله اولوب یرده استوار
.
حمل ایلسونله ایستدیلر ممکن اولمادی
حیرتده قالدیلار که خدایا نه سرّ وار
.
ردّ ایلیوب عباسینی ناگه نه گوردولر
زنجیر گردنینده ایدوب جانینی نثار
.
زنجیرینی آچوب قوری پردن گوتوردولر
زندانیدن چیخاتدیلا خوار و ذلیل وار
.
بلمم نه نوعی کوردی امامون جنازه سین
تاب اینمیوب اولوبدی سلیمانه ناگوار
.
چوخ قهریکن آلوب اوزی غسل و کفن ایدوب
ایتدی زمانه ده اوزینه کسب افتخار
.
امر ایلدی حرملرینه دورمیون گلون
بیکسدی نعشی أوسته آچون معجر و خِمار
.
یوخدور یانیندا آغلیانی بوغریب ئولوب
بیر آغلیون دویونجا ایدون ناله چون هزار
.
#گریز
.
بو رسمدور بس ایمدیکه هر بیر جنازه نون
اوستنده اهل بیتی خدا باشلارین آچار
.
قویمادی اشقیا نیه بس زینب آغلاسون
آچسون بلالی باشین او زهرایه یادگار
.
گودال قتلگاهده سلطان کربلا
دوشموشدی قان ایچینده او ساعت که زخمدار
.
ایسّی قوم أؤسته نعشی قالوب عور و بیکفن
نه غسل و نه حنوط و نه تابوت و نه مزار
.
بو سهلدورکه قویمادی سعد اوغلی دفن اولا
فرمان ویروبدی لشگر اولوب آتلارا سوار
.
آت گزدروبلۀ نعش حسین أوسته بر ملا
پامال ایدوبله گل جسدین فرقۀ شرار
.
یازما «شهاب» اشاره کفایتدی ساخلا آل
دم وورما بو یانار اودا دفتر، قلم یانار
.
یولداشلارین، توسّلیدی عمده مقصدی
یوخ طوله احتیاجی همین بسدی اختصار
.
باب الحوائج ایلر اوزی چاره دردوه
عالمدی هرکسون که دلنده نه دردی وار
.
.
#کاظمیه_شهاب_تبریزی
#کاظمیه_شهادت
#آلدی_قراریمی_گینه_بیر_جلوۂ_نگار
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  مدحووه عاجز قالوب دیوان یازانلار یا علی #حیدریه_بیدقداری

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی