مجلس یزید
.
✍️ زبدة الاشعار ✍️
.
?: @nohe_torki
.
علی پورآقا (عُلیَوی)
.
آل علی زمانه نون مهرینی باشدان آتدیلار
والی شهر عشق اولوب عالی مقامه چاتدیلار
ئوزلرینی قوجاتدیلار دین علمین اوجاتدیلار
کوفه ده انقلاب ائدوب ولوله شامه سالدیلار
عزت و احتشامیلن عالمیانی آلدیلار
.
.
تختینه تکیه ایلیوب میر پلید اشقیا
طشت طلاده روبرو راس شهید کربلا
قولاری باغلی بزمیده عترت پاک مصطفا
خوشدی عدو ،شهید ائدوب ما خلقین امامینی
بدر و حنینین آلموشام سوئلیور انتقامینی
.
.
باخدی اولده عترته دیده احتقاریلن
یعنی که فاتح اولمیشوق بیز سیزه افتخاریلن
گوردی ولیک صف چکوب آل علی وقاریلن
چرخش روزگاریدن تنگه گلوبله گوئیا
قصر یزیدی یخماقا جنگه گلوبله گوئیا
.
.
گوردی اسیره اوخشامور لشگره بنزیور بولار
گلشن دینده سولمیان گوللره بنزیور بولار
قولاری باغلی اولسادا حیدره بنزیور بولار
مرتضوی بیانیلن سیندراجاقلا صفلری
مرحبی سرنگون ائدوب فتح ائدجکله خیبری
.
.
زینبه دوندریب اوزین سویلدی آی علی قیزی
گوردون ئوزون گوزونله حق ایلدی مفتخربیزی
خلقه امیر ائدوب منی خوارواسیر ائدوب سیزی
سیزلری دعوت ایلدیم من که اولده بیعته
بیعت ائدیدی گر حسین دوشمزیدوز ذلالته
.
.
فکر ائلیوردی قارداشون فتح ائدجک ممالکی
یولیاجاقدی حق اونون نصرتینه ملائکی
گوندرجکدی عرشیدن حمزه نی یاکه مالکی
بیلمدی مسلمینه من راهبرم شهنشهم
ئولدی آتام یرینده بو خلقه خلیفه اللهم
.
.
ایندی سیزون تباریزون دهریده اعتباری یوخ
آل علینی بیر نفر ایلیه بوردا یاری یوخ
دنیا منیم الیمده دی لشگریمون شماری یوخ
حاکمه یالوارار اسیر قلبوزی ایندی صاف ائدون
سیزده گلون شکستوزه صدقیلن اعتراف ائدون
.
.
ایلسوز ایندی التماس آچدیرارام طنابوزی
جرموزی من باغیشلارام عفوائدرم عقابوزی
شورشیلر حسابینه قاتمیون ئوز حسابوزی
مجرم اصلی غرق اولوب قانینه ربطی یوخ سیزه
سیز منی تائید ایلسوز یولیارام دیاریزه
.
.
قصدی بوئیدی تا سالا دیللره رعب و واهمه
عجزیله التماس ائده بلکه بنات فاطمه
قصه کربلا تاپا جشنیله اوردا خاتمه
غرق غرور اولاردی گرکامه چاتیدی بزمیده
منتظریدی زینب اول ابلهه التماس ائده
.
.
فکر ائلدی او ظالمه اوز ویراجاق علی قزی
بیلمدی که غرورینی سندیراجاق علی قزی
قلبینه بیر شرر سالوب یاندیراجاق علی قزی
فکر ائلیوردی بیر قوجا عورتیلن طرف دوشوب
بی خبریدی مظهر غیرتیلن طرف دوشوب
.
.
دوردی ایاقه ناگهان ساقی کوثرین قزی
سوئلدی ساکت اول یزید زینبم حیدرین قزی
سن طلقانین اوغلی سان من ولی صفدرین قزی
گلممیشم بو مجلسه شانیمی سیندیرام گدم
پرچم دینی گلمیشم کشوروزه ویرام گدم
.
.
عشق حسین چکوب بیزی بنده نه لشگرون سنون
ویرما او باشه خیزران شل اولا اللرون سنون
فاطمه اوغلی دور حسین هنده دی مادرون سنون
اصل و نسب بیزیمکی دی دختر لافتی منم
من گرگ افتخارائدم زینت مرتضی منم
.
.
چوخ دئمه قصروگلشنیم شامیده واردی چون ارم
من که حسینون عشقینی عالمیانه وئرمرم
قصر ندور ،رقیمه حق وئرجکدی بیر حرم
خوار ائدجکدی دادگرقوم بنی امیه نی
نصب ائدجکله قصریوه پرچم یا رقیه نی
.
.
چوخ دیوسن پیمبرین دینی نی زنده ساخلورام
یاوه دانیشما بسدی ای زاده ارذل الانام
ختم رسل منیم بابام خیرنسا منیم آنام
سیز که اصالتا هاموز دشمن دینی سوز بلی
قرآنی زنده ساخلیوب شیر خدا آتام علی
.
.
فکر ائدیسن حسین ئولوب باشه یتیشدی غائله
ظلم ائدوسن افاضله بذل ائدوسن اراذله
خط چکرم به لطف حق من بو خیال باطله
سن کیمی اهل کین گرک هرایکی دنیا خواراولا
قارداشیمون حقیقتی عالمه آشکار اولا
.
.
.
#مجلس_یزید
#آل_علی_زمانه_نون_مهرینی_باشدان_آتدیلار
#علیوی
#ترکی
.
✍️ #زبدةالاشعار ✍️
.
?: @nohe_torki
نظر دهید