خروج از مدینه
زبانحال حضرت سیدالشهداء(ع) کنار مزار مادر
.
✍️ #زبدةالاشعار ✍️
.
🆔: @nohe_torki
.
مرحوم صافی تبریزی
.
آنا بیگانه لر قویماز منی اوز خانمانیمده
مگر بیر پر سنق بلبل قالار بوش گلستانیمده
.
.
گلوبدور شامدن فرمان یزیده بیعت ایستوللّر
خیال عزّت ایللّر جلال و شوکت ایستوللّر
ایله ناپاک بیر شخصه حسیندن طاعت ایستوللّر
منه ممکن دگل هرگز ویرم باش گتسه جانیمده
.
.
ز بس نوک خیالیله اود آلمیش قلبیمی دلدیم
آنا جدّیم مزارینه گیدوب رخصت آلوب گلدیم
بو امره باطناً راضی گوروب واقعده دینجلدیم
خوشام سنده رضا ویرسن بو عیش جاودانیمده
.
.
نه زحمتلر چکوب جدّیم آنا اسلامی حفظ ایتدی
بابام گتدی آتام عمرى بو یولدا آخره یتدی
حسن قارداشیم آخرده رجوع ایتدی سنه گیتدی
اگر مندہ گیدم باشدان گئچم اؤز امتحانیمده
.
.
منی بیجا عراق ایچره نگار بی بدل چکمز
وصاله نقشه صورتگر داخی بوندان گوزل چکمز
بولوب زینب نه وار منده یقینیم وار او ال چکمز
گرک اولسون کشاکشده باجیم زینبده یانیمده
.
.
نه تک بیر مندہ وار جانان خیالیله هوا باشدا
بیر اوزگه فکر گورسنمز بو قدری یار و یولداشدا
اولوب جان ویرماقا حاضراوغولدا نچّه قارداشدا
قالان یوخ آل هاشمدن مگر بیر آز گمانیمده
.
.
گرک حبّ الوطن لفظین فراموش ایلیم مطلق
گیدوب غربتدہ اسلامی اوجالدام قوزیام بیرق
اوغول قارداش ویرم قربان یازام قانیله حقدور حق
یزیدین کفرینی اثبات ایدم هر قطره قانیمده
.
.
وئروب باش باش اوجالدالّار ایله عبدالله و قاسم
دوتالّار یاسلارین هاردا دوتولسا ای آنا یاسیم
همی باشین ویرر هم قول تاپار بیر رتبه عبّاسیم
که افلاکه یتر فخریم او پر محنت زمانیمده
.
.
بیر اوغلوم وار علی اکبر بابام پیغمبره بنزر
گیدر میدانه یول اوسته دورار لیلا یولون گوزلر
گتورّم نعشینی آخر آناسی واعلی سسلر
وئرور جان نقدی جانانه او لب تشنه جوانیمده
.
.
ربابون کوکب بختی ایشیقدور بیر نهایتله
دم پیکاندان اصغر سو ایچر عین رضایتله
ایله یانّام که قنداقین اله آلّام شکایتله
وفاسیز حرمله باخماز که چوخ اود وار نهانیمده
.
.
مخالف زعمینه ترک حجاز ایتماق منه خوشدور
آنا قان دستمازیله نماز ایتماق منه خوشدور
باخوب محبوبه اظهار نیاز ایتماق منه خوشدور
او ساعت که سوسوزلوقدان دولانماز دل دهانیمده
.
.
بولورسن یا حسین «صافی» نه مدّتدور چکور زحمت
او قبر پاک و غمناکون نولور بیرده اولا قسمت
سنی زهرا آنان ایسته بو ایل قویما قالا حسرت
اولاخ زایر بو جمعیله اؤزومده نوحه خوانیمده
.
.
#خروج_مدینه_صافی_تبریزی
#آنا_بیگانه_لر_قویماز_منی_اوز_خانمانیمده
#ترکی
.
✍️ #زبدةالاشعار ✍️
.
🆔: @nohe_torki
نظر دهید