ضربت خوردن حضرت علی (ع)
.
✍️ #زبدةالاشعار ✍️
.
🆔: @nohe_torki
.
مرحوم عاصی تبریزی
.
.
آه اوساعتدن شروع ائتدی نمازه بوتراب
عرش حقدن گلدی سس یا لیتنی کنت تراب
.
.
سویلدی الله اکبر خاطر آگاهدن
فکر ذکر ماسوالله چخدی قلب شاهدن
آچدی بزم وحدته یول ذکر بسم اللهدن
ردّ اولوب بالمرّه بین طالب و مطلوب حجاب
.
.
جلوه ائتدوقجا علی المرتضایه نور حق
محو اولوب یکسر وجودین دولدوروردی شور حق
بو نمازینده بولوردی واردی کیم منظور حق
صورتین سوموشدی ائتسین باشینین قانی خضاب
.
.
سورۀ حمدی یتوردی آخره شه با خضوع
سورۀ توحیده ائتدی چوخ خشوعیله شروع
خاتمه وئردی قیامه ایلدی تا شه رکوع
بیر رکوعیله قالوب حیرتده اهل نُه قباب
.
.
باش قویاندا سجدیه مسجود کل ماسوا
جنت ایچره آچدی باشین حضرت خیرالورا
جبرئیل تاجی الینده دلده فریاد و نوا
توکدی اشگ چشمنی رخساره ماننده سحاب
.
.
سجده ده ذکر حقه مشغول اولاندا قطب دین
زادۀ ملجم کمین ائتدی الینده تیغ کین
سجده دن باش قوزیان دمده امیرالمؤمنین
اندیروب شمشیرینی ائتموبدی حقدن احتجاب
.
.
ایلدی بیر نحویله شمشیر اصابت باشینه
تا بولوندی تیغ زهرآلود اوتوردی باشنه
باشینین قانی آخوب ممزوج اولوب گوز یاشینه
وجه وجه اللهه سالدی ثار ثارالله نقاب
.
.
گئتمدی تیغی خطایه قالمادی تأثیریدن
آلدى بیر نوعی تحمّل شاه خیبر گیریدن
ضعف ائدردی دمبدم بیر ضربت شمشیریدن
باشینون آخدوقجا قانی سلب ائدردی صبر و تاب
.
.
گورسنوب فرق علیده آیت شقّ القمر
وئردی بو حالی امین وحی بو نوعی خبر
دولدوروب آفاتی بو لفظیله اولدم سربسر
آند اولا اللهه بو گون رکن دین اولدی خراب
.
.
عالم اهلین ایلدی بیرده ندا روح الامین
بو صدائیله دولوب یکسر سماوات و زمین
سس گلور گوردی هامی قتل الأمیرالمؤمنین
ظلمله قانه بویاندی معنی امّ الکتاب
.
.
#گریز #حسینیه_شهادت
.
بیرده جبریل امین سسلندی عاشورا گونی
عترت خیرالنّسایه محشر کبری گونی
شمر الیله تار اولاندا عترت زهرا گونی
یعنی قارداشسیز قالان گون زینب علیا جناب
.
.
گوردی زینب دولدوروب آفاقی بانگ شورشین
دمبدم سمت سمادن سس گلور قتل الحسین
خیمه دن سرعتله چخدی دخت شاه مشرقین
دیزلری لرزان گوزی یاشلی اورکده اضطراب
.
.
.
یتدی گوردی قارداشین تا شمر گمراه ئولدورور
پست فطرت بیر رعیّت محترم شاه ئولدورور
دلده بسم الله دیور معناده الله ئولدورور
سلب اولوب قلبندن آرامی ائدوب شمره خطاب
.
.
ای ستمگر ساخلا اَل چوخ زور وئرمه خنجره
گورمه بو ظلمی روا محبوب حیّ داوره
آز قالور گوگلر بو ظلموندن توکولسون یرلره
عرشی تیترتمه اماندور سالما کونه انقلاب
.
.
بو حسیندور آچ گوزون بیر بیله غفلت ایلمه
قانی الله قانیدور توکمه جسارت ایلمه
وئرموسن سو وئرمه اینجتمه اذیّت ایلمه
گرچه عطشاندور ائدوب سوز عطش قلبین کباب
.
.
اولموسان راضی باجی گر آغلاسون قارداشنه
باشی اوسته باری باخ قیزلارینون گوز یاشنه
قوی گلوب ظالم دولانسونلا بو شاهین باشنه
اشک چشمیله او گل رخساره سپسونلر گلاب
.
.
بسکه قان دوتموشدی شمر شوم و بی پروا گوزین
نه اوتاندی نه ائشتدی زینب کبری سوزین
توکماقا ثاراللّهی ائتمیشدی آماده اؤزین
بولمدی گئچمز خلافندن خدای مستطاب
.
.
بیر طرفدن آتش ظلم و ستم قلبین یاخور
بیر طرف بارماقلارین خنجر کسوبدور قان آخور
بیر طرفدن علویان بو شور و غوغایه باخور
ردّ اولوبدور گوئیا چشم عوالمدن حجاب
.
.
پوزدی حال شاه دینی بو اسفلى منظره
قلبدن اودلاندی حال زینب بی یاوره
سسلدی باجی چوخ ائتمه التجا بو کافره
چکمز ال مندن کسنجه باشیمی بو دون مآب
.
.
من بو قربانگاه عشقین تشنه لب قربانیم
چاره سیز هر دردمندین دردینین درمانیم
باخما ذکریم العطش دور اوزگه می عطشانیم
انتظارم ئولماقا فکریمده یوخدور فکر آب
.
.
دورما بو یرده قایت گئت خیمگاهه سن باجی
باشیم اوسته آچما باشون ائیلمه شیون باجی
گورموسن دور و بری یکسر دوتوب دشمن باجی
آرترور بو داغدیده قلبه حالون التهاب
.
.
گوردی زینب واجب الاجرادی امر شاه دین
ایستدی ترک ائیلسون قارداشینی اول دلغمین
باجی قارداش چکدیلر دلدن بیر آه آتشین
آغلادی هر ایکیسی گوزدن توکوبله اشگ ناب
.
.
عاصیا یاز نوحه آغلا تا الونده وار مجال
وقتوی قویما آلا بیجا سنون فکر و خیال
حاجتون وار آچ بو باب رحمته دست سئوال
دق باب ائت صدقیله آخر وئرللر بیر جواب
.
.
.
.
#حیدریه_عاصی_تبریزی
#حیدریه_شهادت
#آه_او_ساعتدن_شروع_ائتدی_نمازه_بوتراب
#ترکی
.
✍️ #زبدةالاشعار ✍️
.
🆔: @nohe_torki
نظر دهید