لحظات شهادت امام حسین علیه السلام در عصر عاشورا
.
.
مصیبی تبریزی
.
.
آه او ساعتدن یخیلدی شاه عطشان توپراقا
چشمه چشمه قانلی پیکردن آخوب قان توپراقا
.
.
اوخ،داشااولموش نشانه گوز یری هم قاش یری
باش یارا پیکر یارا وار سجده گهده داش یری
بیله بیر اوضاعیده بوش گورسنور قارداش یری
حیف ، علمدارین سالوب اشرار آتدان توپراقا
.
.
ایلیوردی باغلانان عهده وفا جانانیلن
سینه سی اوخلانمیش اوچ شعبه سولی پیکانیلن
هم فدَیناهْ آیه سین تفسیر ائدوبدور قانیلن
هم دوشوب ذِبحٌ عظیم ِ نصّ قرآن توپراقا
.
.
آختاروردی مرغ روحی ترک جسم وجان ائده
قانلی میداندا عیار عشقینی اعلان ائده
رگده کی قانیله دشت اغبری الوان ائده
وجه وجه اللهی اولسون پرتوافشان توپراقا
.
.
رعشه سالمیشدی سمایه کرِّ نای و طبل جنگ
اوخ وورانلار زادۀ زهرایه ائتموردی درنگ
دگمیشیدی قانلی پیکردن او اندازه خدنگ
جسمی بیر گلزاره بنزوردی گل افشان توپراقا
.
.
قائم عرش و حجابات آز قالور اولسون قتیل
واحسینا سسلنور گویلرده عیسای نبیل
تاجینی باشدان آتور توپراقلار اوسته جبرئیل
صرصر گردوندی سالمیش بیله طغیان توپراقا
.
.
تیره و تار اولدی گون آفاقی ظلمت چولقادی
نامسلمان کوفیانی خواب غفلت چولقادی
زادۀ ذی الجوشنین قلبین شقاوت چولقادی
ایستدی بیرایش گوره گوزدن یاغا قان توپراقا
.
.
بیرسینیق پیکر کی سایسیز یاره لر دگمیش اونا
قارداشین آتدان سالوب آت چاپدریبلار اوغلونا
ایستوری شمر سیه دل نیله سین ؛ باخ قوُولونا
وار خیالیندا ائده اخیامی یکسان توپراقا
.
.
لشگره امر ایلیوبدی طبل جنگی چالدیلار
خیمه گاهین دوره سین اشرار کوفی آلدیلار
خوفیدن گور تشنه اطفالی نه حاله سالدیلار
یوز قویوبلار تشنه لب قیزلار هراسان توپراقا
.
.
عَرْبَده صوتی دولوب دشته اَسَن طوفانیلن
آغلاشوللار عمّه لر ، قیزلار تن لرزانیلن
وا حسینا ناله سی عرشه چاتور حرمانیلن
نامسلمانلار توکور خون مسلمان توپراقا
.
.
ازدحام بی امان و قیل و قال کوفیان
ذوالجناحین گلماقیلن اولدی ناگه هم زمان
گوردی تا زینب بو وضعی واله و مویه کُنان
اللری باشدا قویوب یوز تلّ ِ ویران توپراقا
.
.
سسلنوبدور قارداشین تا داده چاتسون تازه دن
خیمه نین اوضاع واحوالین حسین گورسون علن
زینیبین آلدی سسین شاهنشه گلگون بدن
دوندریب یوز لشگره ، واصل گریبان توپراقا
.
.
سسلنوب ای سوز وئرنلر قولیزی سیز اوتمیون
گئچدیز عزتدن گلون ذلت مدارین دوتمیون
تاحسین،جان وئرمیوبدی قیزلارین قورخوتمیون
آسمان اهلی باخوللار مات و حیران توپراقا
.
.
اولمیوب اولماز ولایت آتشی سینمده سرد
زادۀ پیغمبره اولدوز وفاسیز فرد فرد
یوخدی گر دینیز اقلّاً سیز اولون آزاد مرد
گر چه ائتدوز ناطق قرآنی همسان توپراقا
.
.
رحم سیز اشراره بو سوزلر سالوب گویا اثر
خیمه لردن ال چکوبلر کوفیان فتنه گر
قان ایچینده ناگهان شاه زمن گوردی نلر
دورت طرفدن یول آچیلدی اوُل قزل قان توپراقا
.
.
بیر طرفدن شهپر آچمیش مقتله جبریل زار
بیر طرفدن فاطمه عازمدی جنتدن فکار
بیر طرفدن الده خنجر شمر شوم و نابکار
بیرده زینب کی قدم قویموش هراسان ، توپراقا
.
.
داد او ساعتدن کی سالدی مقتله زینب ئوزون
بی حیاشمرین گوروبدورکی دوتوبدی قان گوزون
بیر ایاقین سینه شاهه قویوب سویلور سوزون
ناقۀ صبری رم ائتدی دوشدی نالان ، توپراقا
.
.
سسلنوب ال ساخلا ظالم چیخمیسان گور سن هارا
بی حیا خنجر چکوب گویلوم قوشون چکمه دارا
داغ اکبردن اونون وار سینه سینده بیر یارا
تک او بیر یاره حسینی سالمیش آتدان توپراقا
.
.
قاتیله یوخ احتیاجی قانینی توکمه یئره
گورموسن جان اوستدی امرائت بوسایسیزلشگره
کسمه میشدن باشینی بیر نامسلمان سو وئره
قارداشیم تشنه وئرور جان ،سو وئرور جان توپراقا
.
.
قاتیله یوخ احتیاجی قانینی توکمه یئره
گورموسن جان اوستدی امرائت بوسایسیزلشگره
کسمه میشدن باشینی بیر نامسلمان سو وئره
قارداشیم تشنه وئرور جان ،سو وئرور جان توپراقا
.
.
بوندان آرتوخ ساکنان عرشی ائتمه داغدار
گول بوغازیندان حسینون خنجری ایله کنار
جدّی پیغمبر ئوپن یئردور او یر ای نابکار
قویما اولسون جدّ یمین گوزیاشی سیلان توپراقا
.
.
گورموسن سوز عطشدن خاکه سورتور دیزلرین
سن کنار اول،تا دئسون آخیر نفسده سوزلرین
بیرده زهرادن وصیتدی یومام من گوزلرین
طائر جنت وئرور آیا نه تاوان توپراقا؟
.
.
اعتنا ، شمر ائتمیوب اما او با جا سوزلره
خنجرین چکدی گل زهرانی گلشندن دَره
کشمکش باشلاندی زینب ال آتوبدی خنجره
قان قاریشدی قانه آخدی وئردی رجحان توپراقا
.
.
گوزلرین آچدی او دم شاهنشه گردون اساس
سویله دی زینب بو شمره ائتمه بیله التماس
قارداشون باشی گرکدور کی اولا تندن خلاص
لازم الاجرادی دوشسون باشی دالدان توپراقا
.
.
سن قییت گئت خیمه گاهه سویله پوزقون حالیمی
مین بئله دشمن پوزانماز شوکت و اجلالیمی
من کی جان وئردوم باجی ، ییغ باشیوه اطفالیمی
قویما قیزلار یوزلرین قویسونلا نالان ، توپراقا
.
.
امتثال امر ائدوب خیرالنسانین زینتی
یوز قویوبدور خیمه گاهه واردی اما وحشتی
گئتماقا حتی دونوب باخماقه یوخدور جراتی
قورخوری دینین ستونی دوشسون هرآن توپراقا
.
.
ناگهان دشت بلا آماج اولوبدی صرصره
گون دوتولدی شام ظلمت چاتدی طاق اخضره
قاره یللر اسدی دشت غمده سطح اغبره
دیزلری سستالدی دوشدی نوحه گویان توپراقا
.
.
گوزلری تار اولدی دوشدی سینه سی تاب و تبه
دوندی تا باخسون سپهر غمده آخمیش کوکبه
دونمه میش بیرسس گلوب؛بوندان صورا وای زینبه
قرخادین عورتلریله سالدی افغان توپراقا
.
.
هنگ اخلاصه« مُصَیب» شعری سنگ وهسته دی
پایگاه عشقیده صاحبْ مقام و رسته دی
چیدمان ارتش ثاراللهه وابسته دی
اسلحه الده قلم دور یاغدیرور قان توپراقا
.
.
.
#حسینیه #مصیبی_تبریزی
#حسینیه_شهادت
#آه_او_ساعتدن_یخیلدی_شاه_عطشان_توپراقا
#ترکی
#زبدةالاشعار
نظر دهید