زبانحال حضرت رباب(س) به حضرت علی اصغر (ع)
.
✍️ #زبدةالاشعار✍️
.
🆔: @nohe_torki
.
مرحوم رهبری تبریزی
.
آچ گوزون گل غنچه سی اولماز بیله خندان اوغول
سرفراز ایتدون ربابی من سنه قربان اوغول
.
.
گوزلرون قربانی من آچ قان دولان شهلا گوزون
دنیالارجا ایسترم گل آز منه ایستت اوزون
حیف اولا دل آچمادون قالدی اورکده چوخ سوزون
فرقت هجرینده ایتمه باغریمی آلقان اوغول
.
.
سود ویرن آهو دولاندوقجا دوشونده سود گزر
سود ویرن وقته آنا هر زحمته دوشسه دوزور
سود دوشونده اولماسا دار فنادن ال اوزر
قالدون عطشان اوچ گئجه سن ایله دون افغان اوغول
.
.
منده اوچ گون خیمه ده قالدوم سوسوز سن تک بالا
حالیوه باخدوقجا یاندوم آغلادوم ایتدیم نوا
نیلیوم ایتدی خجل مندن سنی اهل جفا
قویدولار اوچ گون سوسوز بو فرقۀ عدوان اوغول
.
.
مایل اولدوم میوه دل بیر دویونجا سود وئرم
حاصل عمری درم من بیر یریماقین گورم
اولمادی سود خجلتیمدن وار یری ایمدی ئولم
چوخ چالیشدیم تاپمادیم من دردیوه درمان اوغول
.
.
گوزلرون آچ ناامید ایتمه حیاتیمدن منی
ایتدی شرمنده سودان شاهددی حق قوم دنی
تارمار اولسا بوعالم آتمارام گوزدن سنی
تا نقدری واردی جسمیمده بو روح و جان اوغول
.
.
خوش نوا بلبل کیمی گلشنده ایتدون سن نوا
سن نوا ایتدوقجا ویردیم دیده گریان من صدا
هیچ آنادا هیچ بالادا بیر بیله اولماز وفا
حشره تک قویدون غمونده سن منی نالان اوغول
.
.
قوش کیمی چال بیر قاناد قون سینمه بیرده اوغول
راحت ایله سینمی تا گلمه سون درده اوغول
چوخ یوروبلار خسته سن یاتما قوری یرده اوغول
هر گئجه سینمده ایلردون منیم اسکان اوغول
.
.
من سلامت یولّادوم میدانه ای روحیمده جان
بولمه دیم بیر شربه سو اوسته توکر قان كوفیان
کاش ئولیدی گورمییدی حالوی بیله آنان
وای منه اعدا ایدوبدور قانوه غلطان اوغول
.
.
سود امر سربازه میداندا ایدللر احترام
حق ویرللر بیر دل آچسون تا سوزون ایتسون تمام
اوخلانوب یارب امامین اللری اوسته بالام
منده ویردیم حق یولوندا بیر قوزی قربان اوغول
.
.
سن جهاندان دویموسان من دویمارام سندن اوغول
دنیا قورتولسا ولی قورتولمارام غمدن اوغول
حق رضاسی گل حلال ایت اینجی سن مندن اوغول
کاش اولیدی چرخ گردون خانه سی ویران اوغول
.
.
هیچ آنا من تک بیله درد و بلایه دوشمیوب
هیچ بوغازی خنجر برّان سنون تک بیچمیوب
هیچ سود امر سن کیمی قان سو یرینه ایچمیوب
ماتمونده ناله ایلر عالم امکان اوغول
.
.
اصغرین غم نوحه سین یازدو قجا آغلار (رهبری)
یاد ایدر کرب و بلاده نوحۀ حاج جعفری
آغلادار اصغر غمی دنیاده سنگین دللری
حقی وار ایتسون رباب هر روز و شب افغان اوغول
.
.
#اصغریه_رهبری_تبریزی
#اصغریه_شهادت
#آچ_گوزون_گل_غنچه_سی_اولماز_بیله_خندان_اوغول
#ترکی
.
✍️ #زبدةالاشعار✍️
.
🆔: @nohe_torki
نظر دهید