زبانحال حضرت سیدالشهدا (ع) در شهادت حضرت ابوالفضل (ع) خطاب بخواهرش (س)
.
✍️ #زبدةالاشعار ✍️
.
🆔: @nohe_torki
.
#سبک_احوالیمیز_یاماندی … 10 سبک
.
مرحوم تائب تبریزی
.
آی باتدی گون دوتولدی چرخ وفاده زینب
شور جزا قورولدی کرب و بلاده زینب
.
.
ماه منیر آل هاشم خسوفه یتدی
بو گوندوزی گوزومده ، بیر لیل ظلمت ایتدی
من بی پناهی قویدی ، یالقیز بو چولده گیتدی
قالدیم نوالی یالقیز ، بو نینواده زینب
.
.
گیتدی او دم که الدن ، آرخام ائلیم وفالی
داغلاندی نار غمله ، اودلى دلیم وفالی
الدن الیم اوزولدى ، سندی بلیم وفالی
چارم داخی آزالدی ، اولدوم فتاده زینب
.
.
سولموش گل امیدیم ، باخدیقجا سولموشام من
جام فرح بوشالموش، دردیله دولموشام من
بیر قامتی بوکولموش ، قارادشیسز اولموشام من
قارداش غمینده گلّم ، فریاد و داده زینب
.
.
تاپدیم او عدلخواهی ، بیداد الینده گوردوم
مجروح شیر رزمی ، صیاد الینده گوردوم
بیر باشی نچّه قانلو ، جلاد الینده گوردوم
حالیم پوزولدی گیتدی ، صبریمده باده زینب
.
.
گوردوم آلوبلا دورین ، بیر اوزگه حاله قالدیم
دشمنلری داغیتدیم ووردیم کناره سالدیم
جلادلر الیندن ، مجروح باشین آلدیم
سئچدیم یانقلی سوز وار ، اول مه لقاده زینب
.
.
سوز باشلادیم اونیله ، تا سوز آلام ئوزوندن
آلدیم یانقلی سوزلر ، دل داغلیان سوزوندن
سیلدیم الیمله قانی ، حیدر باخیش گوزوندن
نرگس گلی آچیلدی ، باغ صفاده زینب
.
.
گل تک باخا باخا من ، بیردن سارالدی سولدی
من یوز یوزه قویاندا ، گویلوم غمیله دولدی
ماهیله گون قوغوشدی ، برپا قیامت اولدی
برپا قیامت اولدی ، کرب و بلاده زینب
.
.
داغلاندی داغلی دللر ، داغلاشدوق اوردا باهم
دولدوخ دولان بولود تک ، بیر داشدوق اوردا باهم
وئردوح صدا صدایه ، آغلاشدوق اوردا باهم
ضبط اولدی بو صدامیز ، جوّ فضاده زینب
.
.
آلدیم دیز اوسته باشین ، بیر آز غمیم آزالدی
درد دله دل آچدوخ ، دولموش اورک بوشالدى
سوز باشلادوخ دانشدوخ ، سوزلر دیدی سوز آلدی
نَزعِ روان گوروندی ، اول دلرباده زینب
.
.
گفتاریمیز کسیلدی ، بیردن سوزی سوزومده
شمع حیاتی سوئدی ، حسرت گوزی گوزومده
عباس گیتدى الدن ، قانلو یوزی یوزومده
یاندیم یاخیلدیم اولدی ، دردیم زیاده زینب
.
.
کسدی سوزون ئوزوندن ، حسرتله باخدی گیتدی
حیدر باخیشلی گوزلر ، بیر دولدی آخدی گیتدی
آخدی گوزی حسینی یاندوردی یاخدی گیتدی
قان اولدی داغلى قلبیم ، بو ماجراده زینب
.
.
ائتموشدی چون وصیت ، حقین ایتیرمدیم من
دوشموشدی پاره پاره ، یردن گوتورمدیم من
قویدوم دوشن یرینده ، نعشین گتورمدیم من
گلدیم یارالی نعشی ، قالدی آراده زینب
.
.
آیریلدیم اوندا آهیم ، اوج ائتدی نُه سمایه
گاهی گلوب باتاردیم ، گه ناگران قفایه
ناگه وورولدی باشی ، قارداشیمین جدایه
یاندیم گورنده باشین ، نوک جداده زینب
.
.
قلبی سِینقدی نسگل ، سینموش دلینده چوخدی
نسگللری بو اودلی ، قلبیمده زخم اوخدی
احساس غربت ایلر ، بوردا آناسی یوخدی
روح آختارار آناسین ، ماتم سراده زینب
.
.
اولسا آناسی گر خوار ، اوغلون عزاس اولماز
دنیا گله نوایه ، مادر نواسی اولماز
عباسه عالم آغلار ، اما آناسی اولماز
چوخ چوخ یانقلی اوخشار ، ثکلا عزاده زینب
.
.
ایله خبر یغشسون ، مخیمده آل یاسین
عباسمین خانملار ، قورسونلا بزم یاسین
اوخشا آنا دلیله ، من ساخلیوم عزاسین
من آغلیوم سن آغلا ، دارالعزاده زینب
.
.
عباس عزاسیدور گل ، شوریله سینه داغلا
سن اوخشا آغلیوم من ، من اوخشیوم سن آغلا
اولماقه شمر اسیری ، محکم بلیوی باغلا
عنواندی بو اسارت ، قالوا بلاده زینب
.
.
مشکلده دور بو« تائب »، ای مرتضا بالاسی
زهرای کربلاسن ، خیر النسا بالاسی
بو مشکلی ئوزون آچ ، مشکل گشا بالاسی
واردور گوزی او دست ، مشکل گشاده زینب
.
.
بیزدن بو « تائب » ایستر ، هم حلّ مشکلاتین
هم حل مشکلاتین ، هم آخرت نجاتین
آللّهدان آلماساز گر ، سیز مغفرت براتین
چاره ندور اونا بس ؛ روز جزاده زینب
.
.
#عباسیه_شهادت
#آی_باتدی_گون_دوتولدی_چرخ_وفاده_زینب
#ترکی
.
✍️ #زبدةالاشعار ✍️
.
🆔: @nohe_torki
نظر دهید