زبانحال حضرت موسی بن جعفر (علیه السلام)
.
.
✍️ #زبدةالاشعار ✍️
.
🆔: @nohe_torki
.
مرحوم #انور_اردبیلی
.
.
ئولورم بو محبس ظلمده منی ایت عیادت اوغول رضا
آتالار ئولنده اوغول گرک ایلسون حمایت اوغول رضا
.
.
نقدر خلیفه فتنه گر ستم ایتدی عدلی ایاقلادی
اوتوروب اریکه ظلمده صنم عنادی قوجاقلادی
نه فشار و رنجله اون بیرایل منی حبسخانه ده ساخلادی
من او ظلمکاره باش اگمدوم یاشاسون عدالت اوغول رضا
.
.
هر او کسکه مایل نفس دور نعم زمانه نی خوش دوتار
هر او کسکه عاشق حقدور غم عاشقانه نی خوش دوتار
هر او کسکه طالب عدلدور بیله حبس خانه نی خوش دوتار
قفسنده قوش کیمی رام اولوب ایلمز شکایت اوغول رضا
.
.
جلوات معنوی آختاران گرک انزوایه ئوزون چکه
اورگیمده چوخلی علاقه وار بیله سیرته بله مسلکه
ولی قبله گاهیم عبادتیم دولانوب اولوب منه مهلکه
که یازلمیوبدی هیچ عارفه بو قدر ریاضت اوغول رضا
.
.
قوجالاندا شخص بورسمدور کمک آختارار گوزی لاجرم
یرینده تز یورولار اودور دایانوب عصایه آتار قدم
عوض عصادی بو بیکسی ایلیوبدو سلسله قدی خم
اریدوب وجودیمی قویمیوب بنمده طاقت اوغول رضا
.
.
نه صبا یلین نه سما اوزون بزین سحابی گورنمورم
گجه لر آی اولدوزا حسرتم شب ماهتابی گورنمورم
قاپی باغلی روزنه سیز مکان گونوز آفتابی گورنمورم
بوسیاه چالیه کیم دوشه یاشاماز سلامت اوغول رضا
.
.
گله دگسه صبح نسیمی گر خوش اولار صفاسنی آرتورار
نشکفته غنچه نی گولدروب چمنون نماسنی آرتورار
خوش هواده کیمسه نفس چکه بدنون قواسنی آرتورار
ولی قسمت اولمادی دهرده منه استراحت اوغول رضا
.
.
یری واردی آتش غصمه مون شرری اورکلری داغلیا
گتوره بو نسکلی یادینه منه آغلیانلاریم آغلیا
هامی رحم ایدر غم اسیرینه قوجا سیده قولی باغلیا
ولی سند ایتمدی حالمی ابداً رعایت اوغول رضا
.
.
نه ردای مصری گینمشم منچون نه جامه حله ورا
ستم و شکنجه اسیریم سوزومه الیمده ادله وار
ته حبس خانمه گل ئوزون سانا گور اول نچه پله وار
صورا آل دیز اوستنه باشمی منی ایله راحت اوغول رضا
.
.
من او گوندنیکه جفائیله بو بلالی محبسه یتمشم
نه گلوبدی دیدیمه آشنا نه چخوب سیاحته گتمشم
نه حنا گوروبدی محاسنیم نه لباسمی عوض ایتمشم
بو قدر شکنجیه ایلمز بدن استقامت اوغول رضا
.
.
نه قدر که شخص متین اولا او قدر قرین وقار اولار
نقدر خزان اولا دهریده او قدر دالیجا بهار اولار
نقدر محمدی گل سولا گنه برگی رایحه دار اولار
هامی گلدن عطرلیم ئوزوم کسلوب طراوت اوغول رضا
.
.
ئوزوی یتور نگرانوم دیمه گلگون بلن اولماسون
ایلمه خیال کفن منه سنه مایه محن اولماسون
بورادشت کرب و بلا دگل وس تا پولماسون کفن اولماسون
سویولان یارالی جنازیه ایده لر اهانت اوغول رضا
.
.
نه یارالیام نه سویولمشام بلورم که دفن ایدنیمده وار
تاپولار جنازمه آغلیان باش آچاندار وار کفنمده وار
غمی یوخ کفن اله گلمسه بدنیمده پیرهنیمده وار
کچلن وجودیمی بوکسه لر ایلیور کفایت اوغول رضا
.
.
خوش اولار بو محبس ظلمده گله سن اورکلری داغلیاق
اوخیاق کتاب مصیبتی یوزه اشک حسررتی باغلیاق
غم قتلگاهی خیال ایدک ایکمزده جدیمه آغلیاق
گورک اوخ لی پیرهنین نیه ایلیوبله غارت اوغول رضا
.
.
#سبک_بالام_آغلاما_گلوم_آغلاما … 7 سبک
.
#کاظمیه_شهادت
#ئولورم_بو_محبس_ظلمده_منی_ایت_عیادت_اوغول_رضا
#جلوه_عاشورا2
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید