حالات آمدن هنده به خرابۀ شام
خبر مذکور از منبر آقای حسینی خراسانی (واعظ شهیر تهران) استفاده شده است.
.
✍️ زبدة الاشعار ✍️
.
?: @nohe_torki
.
مرحوم انور اردبیلی
.
اختر سوم اسپهر ولایتدی حسین
افسر تارک اقلیم سعادتدی حسین
زیب خلقتدی حسین روح عبادتدی حسین
شمع پر شعلۀ پر جلوۀ بزم نبوی
سینه پروردۀ زهرای عفیف و علوی
.
.
گل رعنای نبی قامت رعناسی گوزل
فعل و رفتاری گوزل سیرت و سیماسی گوزل
هدف و عشقی گوزل منطق شیواسی گوزل
خوان احسانی گوزل تربت معطوری گوزل
ائتدیگی نطقی گوزل ویردیگی دستوری گوزل
.
.
دل طوفاندا نجی اللهی حیرتده قویان
یادگار ابدی مکتب وحدتده قویان
ماده تاریخی طلائی بشریتده قویان
عالمون سلطنت و عزتنه ناز ائلین
آلتی آیلیق بالاسین دیننه سرباز ائلین
.
.
پیکر رحم و عطا هیکل خیر و برکات
مرتضا مَسلک،حسن سیرت و محمود صفات
گوز آچان گوندن احبایه اولان باب نجات
ابر تک بارش الطافی یاغان هر طرفه
صله سین بذل ائلین عذریله سائل بکفه
.
.
نقل ائدور بو سوزی سلمان او سخنگوی امین
روح با قدرت و ایمان شرف اهل یقین
مونس شیر خدا یار رسول الثقلین
محرم بیت علی فاطمه نون هم وردی
مکتب معرفتون شخص اول شاگردی
.
.
شهر یثربده دیور کوچه ده هنگام گذر
یولدا بیر عابری گوردوم ائلدی جلب نظر
بیر قیزون دوتموش الیندن یولی آهسته گیدر
قیز مریضه ائده بیلمور قدمین تز تز آتا
هر قدمده بالانین حالینه ناظردی آتا
.
.
گوزی دوشدی منه ناگه دئدی ای پاک روان
من یهودم ئوزومی یاخشی تانورسان سلمان
بو مریضه قیزیمون دردینه ائتسون درمان
یره توراتی قویوب تابع قرآن اولام
روشیمدن چکوب ال منده مسلمان اولام
.
.
دئدی سلمان گل اولوم من سَنیچون راهنما
بیر طبیبون آپاروم محضرینه ایسته دوا
قزووی گورسون عنایت ائلسون فوری شفا
هر مریضه او طبیبون اولا لطف و نظری
عافیت رختی گیوب جسمیده قالماز خطری
.
.
گتدی سلمان اولاری خانۀ زهرایه دخیل
اذن آلوب محضر مولاده آچوب صحبته دل
ینه قربان دئدی ای صاحب اوصاف جمیل
بو قیزا واسطیم فوری مداوا ائده سن
تلخ بار عمرینی شیرین و گوارا ائده سن
.
دئدی سلمانه او دلباختۀ ختم رسل
محرم مجلس توحید ولا هادی کل
خوش گلوبسوز ولی افسوس طبیب ایوده دگول
نگران اولما سنون ایستدیگون ایش دوزه لر
مختصر صبر ائله سلمان طبیب ایندی گلر
.
.
دئدی مولایه بو سوز قویدی منی حیرتده
سنه لقمان زمان قبطه ائدر حکمتده
جام عشقوندی قویوب خضرلری منتده
دم پاکوندی مسیحانی ائدن خلقه حبیب
واردی سندن صورا بو ایوده مگر آیری طبیب
.
.
ضمن صحبتده حسین قویدی او مأوایه قدم
یوز دوتوبدی دئدی سلمانه او مبنای کرم
او طبیبی که بابام اولدی معرف او منم
نور واحددی بو منزلده اولان خرد و کبار
ائله فکر ائتمه اوشاقدور بو حسین دورد یاشی وار
.
.
دستماز آلدی دوتوب قبلیه یوز قیلدی نماز
سجده مسجودینه ائتدی ایلدی راز و نیاز
ساربان قطع ایلین اللری قالخزدی بیر آز
دیله گلدی دیدی ای مالک میعاد و جزا
بو ایوی ایله شفا خانه شفا ویر بو قیزا
.
.
مستجاب ائتدی دعاسینی مجیب الدعوات
حقدن خلعت صحّت او قزا اولدی برات
مرض مهلک الیندن قوتاروب تاپدی نجات
او قیزون بختینه تقدیر ئوزی تقدیر ائلدی
آتاسی مسلم اولوب بیر اوجا تکبیر ائلدی
.
.
حقه اول تازه مسلمان ائلدی حمد و ثنا
گئتمگه رخصت آلوب ایستدی دورسون ایاقا
قیز دئدی گیتمیورم قوی منی بو ائوده آتا
گرک هر گون دولانام من بو طبیبون باشنا
شوقیله خدمت ائدم باجیسینا قارداشنا
.
.
منزله گیت آناما سویله قیزون اولدی عزیز
کرم ائتدی اونا دردانۀ سلطان حجیز
گلمدی قالدی اولا حضرت زهرایه کنیز
امر مشگلدی یولوم خانه میزه بیرده دوشه
ایسته سه گوگلی منی بو ایوه گلسین گوروشه
.
.
آتا گیتدی او بالا نایل اولوبدور هدفه
نچه ایل خدمت ائدوب عترت شاه نجفه
نیّت پاکی یتوردی اونی آخر شرفه
برج عصمتده مدار ائتدی گویون اولدوزی تک
فاطمه تربیت ائتدی او قیزی اوز قیزی تک
.
.
گچدی ایل لر دولانوب سرعتیله چرخ زمان
دست تقدیر آیوروب وئردی اونا شامی مکان
شهره تین بسکه ایشیتمیشدی یزید نادان
همسر ائتدی اوزونه شآنی اوجالسون فلکه
زینبون خادمه سی شامیده اولدی ملکه
.
.
آرزومندیدی اقبالی دوباره اولا یار
یول سالا مُلک حجازه دوتا یثربده قرار
ایلیه منزل زهراده طبیبین دیدار
فاطمه قزلارینون درک ائلیه محضرینی
مقدم زینب عُلیایه آتا معجرینی
.
.
نصف شب بیر گیجه اول بانوی فرخنده لقا
صحنه دوشمیشدی ایشیتدی اوجالوب غملی صدا
قولاق آسدی گوره هاردان گلوری صوت نوا
گوردی که ناله ائدن منزل ویرانه ده دور
ساره لی قوشدی کأنَّه دل کاشانه ده دور
.
.
آغلیان غملی بیر اورتدی یانور غم کوزونه
هوش و گوشیله قولاق وئردی اونون غم سوزونه
یاندیران سوزلر ایشیتدی دانشور ئوز ئوزونه
نیلمیشدوم منی ای چرخ ائلدون محنته توش
خانمانیم داغیلوبدور گزورم خانه به دوش
.
.
مشتری اولدون همیشه بو آخان گوز یاشما
آناما رحم ائلدون نه آتا نه قارداشما
اللّی ایلدور قره معجر سالورام من باشما
بیر زمان واریدی جبریل بیزه خادمیدی
دیللرون ازبری هر یرده منیم آدیمیدی
.
.
هنده دیسگیندی تعجّبله دئدی یا للعجب
بو نه صحبتدی قولاقیم ایشیدور بو دل شب
کیمدی بو ناله ائدن کیمدی بو عالیه نسب
گوشوار اولدی سوزی گوشیمه گوشواره کیمی
بدنیم اسدی دیزیم تتردی گهواره کیمی
.
.
عجلیله گیجه نون وقتی او سیمای وقار
گوتوروبدی نچه فانوس نچه مشعلدار
دوره سین آلدی غلام و خدمه دایره وار
قصردن چخدی جلال و حشم و عزتیله
یوز قویوب منزل ویرانیه چوخ سرعتیله
.
.
ناگهان مسجد ویرانه ایشیقلاندی گیجه
نور فانوس او یردن گوگه قوزاندی گیجه
اولین دفعه او منزلده چراغ یاندی گیجه
مشعلون شعله سی پروانه لره وئردی تکان
گوزونی آچدی یاتان قیزلار اویاندی یوخودان
.
.
زینبون دوره سینی آلدی یتیمه بالالار
دئدیلر منزلیمیز روشن اولوب عمّه ننه وار
اسرایه قیلوب اظهار او بانوی کبار
روزگارون هله وار کشمکشی زینبیله
دینمیون هنده کنیزیمدی گلور موکبیله
.
.
خلق ائدن بیرده چتین منکیمی غمکش یارادا
سوزشی دائم اولا قلبیده گیزلین یارادا
تز گلون حلقه ورون عموز اوتورسون آرادا
گیزلدون سوز مصیباتیله یانمش بدنی
قویمیون هنده گوره کهنه لباسیله منی
.
.
هنده ویرانیه القصه گلوب قویدی قدم
قویدولار صندل مخصوصینی اگلشدی او دم
گوردی بیر عده مصیبت زده دور مونس غم
تک به تک هر بیری رنجور اسارت گورونور
یوزلریندن ولی آثار نجابت گورونور
.
.
یوخدی طاقتلری محبسده یوروب زجر و فشار
بوریوب صورت زیبالرینی گرد و غبار
او قدر اوستی آچوق یرده یاتوبدور بالالار
گیجه سرما توخانوب ایستی دگوب گوندوزلر
سهملی یللر اسوب لکّه سالوب گل یوزلر
.
.
غصه لی بیر اوجا بوی عورتی آلدی نظره
غملیدور غمزده نسوانی یغوب دور و بره
بالاجا قیزلاری عنقا تک آلوب زیر پره
آغاروب ساچلاری گرداب بلاده چالشور
باشینی سالموش اشاقه اورگیلن دانشور
.
.
بیر یتیمه قیزا وئرمیش دیزی اوستونده مکان
نه یتیمه گوزی شهلا ایکی ابروسی کمان
لبی چون لعلیدی دیشلر صدفی غنچه دهان
فکر ائدوب هنده تعجّبله دئدی ئوز ئوزونه
بو قیزون گوزلری اوخشور او طبیبون گوزونه
.
.
یوز دوتوب حضرت زهرا قیزینا ائتدی خطاب
ائتموسن سن نیه آق زلفووی رخساره نقاب
باشووی قوزا سن الله منه وئر فوری جواب
شخص گمنامیده اولسوز گنه روشن دی سوزی
ائله تعریف نژاد و نسب و سلسله زی
.
.
دئدی زینب اونا بیز مفخر قوم عربوک
سرشناسوق ئوزومیز قبلۀ اهل ادبوک
نسبت و سلسله میز پاکیدی هاشم نسبوک
یثربون نوش ائلیوب آب و غذاسین یمیشوک
حق پرستوک ئوزومیز حق دانشوب حق دیمیشوک
.
.
هنده نون رنگی سولوب لرزیه دوشدی بدنی
یثرب اهلی دئدی اولسوز ائله آگاه منی
تانیورسان حسنینون آناسی فاطمه نی
من کنیزیدوم او بانوی نجیبیمدی منیم
گوزونون نوری حسین اوغلی طبیبیمدی منیم
.
.
یاشورام شامیده هجر عالمی تاب و تبیله
خوش گونوم خانۀ زهراده کچوب منصبیله
خاطراتیم وار حسینون باجیسی زینبیله
اوندان اخذ ایلمیشم طرز ادب ربط سخن
ایندیده خادمه بیلم ئوزیمی زینبه من
.
.
مُلک یثربده قاباق واریدی اجلالی اونون
تازه لیکده خبریم یوخ نجه دور حالی اونون
دیدی دیندیرمه تنزّل ائدوب اقبالی اونون
گلشن عزتنه باد مخالف اسیلوب
او طبیبیکه دیورسن باشی دالدان کسیلوب
.
.
دئدی هنده بو نه صحبتدی دولور مغزیمه شور
هاردادی زینب ئوزی فاش ائله قلبیم آلشور
دئدی ویرانه ده دی منزلی سنلن دانشور
دیممیشدوم سنه هنده ائله حرمت قوناقا
نیه بس دورمیوسان صندلون اوستن ایاقا
.
.
زینبم باخما تعجّبله بو آغلار گوزومه
خم اولان قدیمه آق زلفیمه سولموش یوزومه
اولما ویرانه ده باور ایلمورسن سوزومه
بالالار که گوروسن چرخ حیا اولدوزودی
دیزیم اوسته اوتوران قیز او طبیبون قیزیدی
.
.
هنده بیر ضجّه چکوب بیر بیره ویردی الینی
زینبون فکر ائلدی آخرینی اولینی
یوزی اوسته یخلوب ترک ایلدی صندلینی
تاجینی ویردی یره باشینه تُپراق سپدی
بالا قیزلارون ایاقیندن الیندن اوپدی
.
.
مقدم زینبه دوشدی دئدی عفو ایله منی
گوزلریم کور اولا گوردوم نیه بو حالدا سنی
یاسلی اولدوم گییرم منده عزا پیرهنی
هنده نون جانی فدا گوزدن آخان گوز یاشووا
آغلارام هم سنه بوندانصورا هم قارداشووا
.
.
اذن وئرسون منه گرداب بلایه باتارام
زندگی عشقینی بلمرّه باشیمدان آتارام
گیتمرم قصریمه ویرانه ده سیزلن یاتارام
گون باتنجاق گونوز ایوای حسین وای دییرم
گیجه لر یاتماسا هر قیز اونا لای لای دییرم
.
.
دئدی گیت قصروه سن ائتمه بو مأواده مقام
قوناقون واردی ایوینده اونا عرض ایله سلام
گور قزل طشتده نه حاله قالوب رأس امام
ناله وی باخدوقیجا عرشه یتورسون خوش اولار
خیزرانی گوز ایویندن تز ایتورسون خوش اولار
.
.
قویمادی هنده ده زینب سوزی نه صبر و نه تاب
گوزلری اشک توکوب دامنینه مثل سحاب
آغلیل آغلیا یولداشلارینا قیلدی خطاب
خانمون امریدی ناچار خداحافظ ائدک
سوندورون مشعل و فانوسی قرانلوقدا گیدک
.
.
نه روا حضرت زهرا قیزی ظلمتده قالا
خط سیریمده منیم مشعل اولا نور اوجالا
گوره سن قالدی الهی نیه زینب بو حالا
بوکولوب قامتی خون دلینی اشگه قاتوب
یدّی قارداش باجیسی وای منه گور هاردا یاتوب
.
.
قصره یتسم ائدرم پرده لری فوری قرا
چیخادوب رخت حریری گیرم کهنه قبا
قیلارام منزلیمی بو گیجه دن بزم عزا
آچارام زلفیمی آلوده اولار گوز یاشیما
قویارام عطری کناره سپرم کول باشیما
.
.
نه جفا فطرتیمیش بو ایوی بر باد یزید
قویمارام بیر گیجه قصرینده اولا شاد یزید
خانمون زینبی گر ائتمسه آزاد یزید
قالمارام شامیده حتما دوشرم چوللره من
دییرم دردیمی چولدن کوچری ائللره من
.
.
« انورا » زحمتیله شعر ائلدون بو خبری
شاعرون رنجی چوخ اولسا اولی زیبا اثری
نغزگوسن وار حسینون سنه لطف و نظری
باخما دیوانه روشلر ائلسه طعن و عتاب
شکر ائله یتدی تمامه هله دوردومجی کتاب
.
#هنده
#خرابه_شام
#اختر_سوم_اسپهر_ولایتدی_حسین
#انور_اردبیلی
#یادگار_انور
#ترکی
.
✍️ #زبدةالاشعار ✍️
.
?: @nohe_torki
نظر دهید