زبانحال امام به جناب زینب در شهادت حضرت ابوالفضل (ع)
.
.
مرحوم حسینی سعدی زمان
.
.
اللریم قانی گوزوم یاشی بیرعنواندور باجی
قارداشیم عباس ئولوب حالیم پریشاندور باجی
.
.
خلق ائدندن عالم امکانی خلّاق قدیر
گورمیوب بیر گوز علمداریم ابوالفضله نظیر
ظاهراً جسم ابوالفضله ویروب شام اهلی تیر
باطناً قلبیم منیم آماج پیکاندور باجی
.
.
هئچ کیمون قلبی من بی خانمان تک یانمیوب
هئچ شهیدین پیکری،عبّاس تک اوخلانمیوب
اکبری گوردون ولی اکبر کیمی دوغرانمیوب
گوئیا بیردسته گُلدور یئرده خنداندور باجی
.
.
قان آخوب رنگ جمالی گل کیمی گوردوم قاچوب
گلشن جسمینده هر کاری یارا بیر گل آچوب
آنّینا بیردسته امّا ارغوانی گل ساچوب
لالهٔ احمردی گویا قانه غلطاندور باجی
.
.
من نجه گوردوم اونی کشف ایلسم تاب ائتمسن
بُلمه سن قولّاری باغلی باشی اوسته گئتمه سن
وصلینه نهر فرات اوسته صباح سن یتمه سن
اولماسان آگه، نجه اعضاسی شان شاندور باجی
.
.
داخل اولموشدی فراته اول نهنگ تشنه کام
نفسینه سو ایچماقی بُلمیشدی معناده حرام
تشنه لب چیخمیشدی دریادن نهنگ مستظام
بو وفا باعثدی چشمیم بیله گریاندور باجی
.
.
اووجونا چون که سو دولدورموشدی اُول نیکو شیَم
عشقی فتوا ویردی اعدا قولّارین ائتدی قلم
تا آت اوستوندیدی قویموردی ولی یاتسین علم
چون شکست و فتح بیرقدن نمایاندور باجی
.
.
ایچمه میشدی سو، سویا باخمیشدی چون بی اختیار
اوزلوقوندا گوردوقی ایشدن واریدی انکسار
بیر سویا باخماقلیقا بیر جفت گوز وئردی نثار
ترجمانندن سماوات اهلی حیراندور باجی
.
..
سویلدی قصدیم اِرائیدی اگرچه دشمنه
شه سوسوزدور من سویا باخدیم چوخ عار اولسون منه
اوخلاسونلار قوی بئله بیر گوز نه لازمدور منه
گور بئله قارداشدان ال چکماقلیق آساندور باجی؟
.
.
گوردوم اطرافین آلوب اون یدّی بیرحم و دنی
سعی ائدولّر تک به تک قویسونلا قارداشسیز منی
ذوالفقاریله داغتدیم دور و بردن دشمنی
گوردوم اول شمشاد قد خاکیله یکساندور باجی
.
.
باشینی آلدیم دیزیم اوسته پریشان حالیله
جسمینین قانین یودوم پاک ائتدیم اشک آلیله
ایستدیم حمل ایلیم قتلایه بیر منوالیله
گوردوم ارکان وجودی جمله ویراندور باجی
.
.
باغریما باسدیم اوصدپاره داغلمیش پیکری
آغلادیم آغلاتدی حالیم سنگدل دشمنلری
اودلانار هرکیمسه گورسه بو اسفلی منظری
یوز گوزوم،سینم،وجودیم،الّریم قاندور باجی
.
.
آخر عمرینده منه ائتدی وصیّت بو قرار
نعشیمی حمل ایلمه قتلایه ای شاه کبار
بُلسه بو حالی سنه اهل جفا جرئت تاپار
بو وفاسی قابل تقدیر شایاندور باجی
.
.
ای «حسینی» حضرت عبّاسه آغلا ماه و سال
دامن باب الحوائجدن یاپوش مقصودون آل
اوزلریندن قلبووه الهام اولوندی بو مقال
قارداشیم عباس ئولوب حالیم پریشاندور باجی
.
.
.
#عباسیه_شهادت
#سعدی_زمان
#اللریم_قانی_گوزوم_یاشی_بیر_عنواندور_باجی
#کنزالحسینی2 ص 72
#ترکی
#زبدةالاشعار #عباسیه
نظر دهید