یا مهدی
#گریز به #راه_شام
.
✍️ #زبدةالاشعار ✍️
.
🆔: @nohe_torki
.
مرحوم عاصی تبریزی
.
الهی ظلم دولدوردی جهانی
اماندور تیز یتور صاحب زمانی
.
.
ز بس متروک اولوب دین و شریعت
اولوب بو دوره غالب نوره ظلمت
اؤزون اؤز دینوه ایله حمایت
خلاص ایله بو غمدن شیعیانی
.
.
گئدوب قرآن قالوب اسلامدن آد
بو امر شرعی ائتمز بیر نفر یاد
ائدر حق اهلینه ناحقلر ایراد
ائدللر متهم قرآنیانی
.
.
دوتوبدور عالم امکانی محنت
بو درده یوخدی بیزده صبر و طاقت
قویوبلار دینده کین اهلی بدعت
یتور یارب اوزون نور هدانی
.
.
ایاعصرون امامی هارداسان گل
بو دینه یوخدی حامی هارداسان گل
گل آل بو انتقامی هارداسان گل
عیان قیل صولت شیر خدانی
.
.
گلینجه روز و شب قان آغلاروخ بیز
صباح و شام هر آن آغلاروخ بیز
نقدری جاندا وار جان آغلاروخ بیز
عذاره باغلاروخ اشگ روانی
.
.
یری وار ائیلیاخ بیز آه و ناله
یاناخ حشره کیمی درد و ملاله
سالاندا کربلا ظلمین خیاله
یقین قان آغلادار پیر و جوانی
.
.
آخوب کرب و بلا دشتنده قانلار
بویاندى قاننه نورس جوانلار
ئولن ئولدی، اسیر اولدى قالانلار
ستمله سولدی زهرا گلستانی
.
.
غزالان حرم دوشدی کمنده
قضا بند ائتدی قولّارین رسنده
گلوب فریاده بو حالی گورنده
اوجالدی گوگلره آه و فغانی
.
.
بالا قیزلار تماماً دست بسته
جگر داغلی سوسوز آج دل شکسته
چکوب سس آغلیاندا ناقه اوسته
وراردی لنگه اهل کاروانی
.
.
گلوردی غیظه شمر شوم و کافر
گلنده شیونه آل پیغمبر
کسوک باشلار ائدردی ناله یکسر
وراندا اهل بیت مصطفانی
.
.
سینق محمل لر ایچره یانایانه
اوشاقلار یالوارودی ساربانه
دگنده باشلاریندان تازیانه
چکوب آه آغلادوردی قدسیانی
.
.
#ورود_شام
.
.
اولاندا شامه وارد آل حیدر
برهنه ناقه اوستونده مکدّر
حنا یاخمیشدیلار شام اهلی یکسر
گینمیشدی لباس ارغوانی
.
.
تماماً مرد و زن الده دف و ساز
او گون آل الّهی ائتمیشدی پیشواز
اوخوردی رقصیله هر بیر خوش آواز
گورنده مضطرب آل عبانی
.
.
صدای ساز و نی آواز کفدن
دوتولموشدی قولاقلار تار و دفدن
شماتت ایلینلر هر طرفدن
دیردی طعنه ایلن ناسزانی
.
.
یتوب از بس جفا بیمار امامه
دونوبدور گوندوزی شام ایچره شامه
آتوبلار اودلی نی یاندی عمامه
شرار ظلمیله اودلاندی جانی
.
.
امامون اللری باغلیدی محکم
آلشدی یاندی عمامه همان دم
او حالی ایله قلبونده مجسّم
بوقدری ظلمه گور بیر کس دایانی
.
.
رضا وئردی قضای کبریایه
تحمل ایلدی هر بیر بلایه
یتوب بیر یرده صبری انتهایه
کسیلدی طاقتی گئتدی توانی
.
.
عنان اختیاری گئتدى الدن
چکوب بیر آه آتشبار دلدن
بویوردی دوغمیدی کاش ازلدن
آنام تا گورمییدیم بو زمانی
.
.
اولوب مسکن عیال بوترابه
نچه آی شامده کنج خرابه
گئدوبلر عاقبت بزم شرابه
گوروبلر شامده هر بیر جفانی
.
.
#حضرت_رقیه_شهادت
.
.
او پیغمبر که عرشه ائتدی معراج
قالوردی عترتی ویرانه ده آج
رقیه صبرین ائتدی غصه تاراج
چخاردی عرشه آه و الامانی
.
.
او قدری غم چکوب حالی پوزولدی
یتیشدی جانه قلبی غمله دولدی
سارالدی گل کیمی رخساری سولدی
بهارینده یتوب فصل خزانی
.
.
توانی طاقتی گتشمدی باده
گلوردی روز و شب فریاد و داده
وئروب جان آج سوسوز ویرانسراده
خرابه گوشه سی اولدی مکانی
.
.
ز بس ورموشدولا شامون یولوندا
واریدی قمچی آثاری قولوندا
ئولنده گوردیلر صاق و صولوندا
طناب ظلمدن واردور نشانی
.
.
رسن سالمیشدی از بسکه فشاره
سراسر قولّارین ائتمیشدی یاره
قویاندا جسمنی زینب مزاره
آخاردی اشگ چشم خونفشانی
.
.
یاناردی حالینه أولاد حیدر
دوراردی باشه آغلاردی حرملر
خرابه گوشه سی اولموشدی محشر
گوتورموشدی نوا ویرانسرانی
.
.
خانملار آچدیلار باش قبری اوسته
یولاردی هر یتن ساچ قبری اوسته
توکوبلر بسکه قانیاش قبری اوسته
سالوبلا لرزیه ارض و سمانی
.
.
دایان عاصى بوغم یتمز تمامه
شراریندن دوتوب اود یاندی خامه
صله ایسته حسیندن بو کلامه
او شاهه واسطه قیل بو بالانی
.
.
دوشوبدور باشووه شوق زیارت
دینه یوخ مسنده آخر استطاعت
اوزون ای معدن فضل و کرامت
حواله قیل سنی عباس جانی
.
.
#مهدیه_عاصی_تبریزی
#راه_شام_ورود_شام #حضرت_رقیه_شهادت
#الهی_ظلم_دولدوردی_جهانی
#ترکی
.
✍️ #زبدةالاشعار ✍️
.
🆔: @nohe_torki
نظر دهید