در نعت صنع پروردگار
گریز به وداع حضرت علی اکبر (ع)
.
.
.
احمدیان خسروشاهی
.
.
الیمده خامه حیرانم خیال اوصاف یزداندور
نقدری ایلسم تعریف گینه وصفینده نقصاندور
.
ستونسوز ساخلیوب کیم آسمانی بسدی بو آیات
اولور اثبات صانع وار دلیلی لیک آساندور
.
خدای لامکان چون ایستدی نورین ائده اظهار
جهانی گوندروب بیر ختم مرسل کان ایماندور
.
گوزل آدی محمّددور هم احمد باب رحمتدور
طبیب حقّدور هر چاره سیز بیر درده درماندور
.
یتوردی بیربه بیر خلقه تمام احکام اسلامی
بیوردی قورتولوب اوددان او کسلر که مسلماندور
.
گلون سیزده دیون بو کلمه ی توحیدی آساندی
گوزل بیر کلمه دور اما نجات راه انساندور
.
چکوب دین اوسته چوخ زحمت دیولسه یتمز اتمامه
قلم الده یازور شرح و بیانه خامه حیراندور
.
دگل فکریم یازام چوخ جور ظلم گوردی پیغمبر
خیالیم وصف یکتادور نظر بیر آیری عنواندور
.
گینه اولدی بهار آیات رحمان گلدی دنیایه
آچان گللردی گلشنده دلیل اوصاف یکتایه
.
تفکّر ایلین آیات وحدتده گئدن فکره
دولاندیرما خیالون گیت گلستانه تماشایه
.
خدای لامکان اظهار ائدوب ئوز قدرتین گلده
نه گل حتى نباتاته باخاندا صحن صحرایه
.
دیولّه وَحدَهُ وَحدَه نباتات و گل و سنبل
تماماً تک به تک باش قوزیوب یوخدان بو معنایه
.
وئروب هر بیر گله بیر نقش رنگ خالق یکتا
بونی بیلسون طبیعیلر خدا واردور بو دنیایه
.
سوا بو گل هواده طیر ائدن دریاده ماهیلر
ائدر اثبات یکتانی باخاندا موج دریایه
.
نسیم صبحدن بلبل آلار عطر گلستانی
قونار گه گل بوداقینه یاتار گه برگ رعنایه
.
چوخ عشقی وار گله خار جفایه تاب ائدر امّا
وفا درسی اوخور گلدن آلور فریاد سرمایه
.
یانار نار فراقیله اوتورمز دامن وصلی
خزان فصلین سالوب یاده دؤزر اول درد عظمایه
.
اگرچه فصل گل عیش و فرحدور خوشدی معناده
آچیلمور غصه دن قلبیم منیم بو لفظ معنایه
.
نه فکریم گلدی نه سنبل نه ذوق بلبلیم اما
بلا دشتینده بیر گل وار خوشام چوخ اول دل آرایه
.
ائله بیر گلدی که مثلی جهانه گلمیوب گلمز
وئرور اول نوگلون عطری هامی گلزاره پیرایه
.
شبیه مصطفی دور خَلقاً و خُلقاً او مه سیما
آدی اکبر ئوزی تاب تواندى قلب لیلایه
.
غمینده ایلیوب مجنون پریشان زلفی لیلانی
باخاندا اود دوتور قلبی جوان ماه سیمایه
.
گورور خال و خطین زلف سیاهین شکل زیباسین
یانور دل گوز یاشین گوزده ائدیر تشبیه دریایه
.
دیور ای نوجوانیم گوزلریم نوری گئدورسن گئت
سنون آیریلماقون اما چتیندور آل طاهایه
.
آتان رخصت وئروب منده رضایم گیت بویان قانه
ئوزون راضی آتان راضی رضایم من بو سودایه
.
گوزلدور آغ کفن تل تل توکولموش سنبل زلفون
اولوب زینت آنان ئولسون عجب بو قدّ رعنایه
.
دوزولسه قطره قان بو آغ کفنده خال و خطونده
نه خوشدور حق یولوندا دولسا قان بو چشم شهلایه
.
باشون نوک جدایه ویرسا دشمن سربلند اولّام
وجودون جلدسیز قرآن تک اولسا آیه به آیه
.
گئدنده شامه یولّاردا جداده باشوی گورسه
یری وار لیلی مجنون تک دوشه آردونجا صحرایه
.
شکسته محمل اوستونده گوزی یاشلی آدون دلده
دینده وای اوغول وای نیزه دن سال باشیمه سایه
.
اوغول بو «احمدیان» چوخ اولوب عشقونده بی آرام
اونی محتاج اولا قویما جهاندا مرد ادنایه
.
.
#مناجات #احمدیان_خسروشاهی
#بهاریه #اکبریه_شهادت #بهاریه_احمدیان_خسروشاهی
#الیمده_خامه_حیرانم_خیال_اوصاف_یزداندور
#ترکی
#زبدةالاشعار
نظر دهید