روایتهای #کمیل از حالات حضرت علی (ع) ، #گریز به #خرابه_شام
✍️ زبدة الاشعار ✍️
?: @nohe_torki
مرحوم حاج حیدر خوندل تبریزی
الیمده خامه گوزومده سرشک بارانی
گوگولده موج وورور بیر خیال طوفانی
قلم قالوب حرکتدن اوزومده مبهوتم
که قالموشام متحیر یازام نه عنوانی؟
اؤرک دولوبدی ملالیله اشک ویرسه مجال
امید وار قلمیم ثبت ایده بو طغرانی
هزارۀ چمن عشق اولوم و یا که گیدوم
دیار کرب و بلانون اولوم نواخوانی؟
بو گیر و دارده ناگاه هاتف غیبی
ندا ایدوب منی ای کوی عشق حیرانی
نه فکردور نه تعجبدی، بو نه حیرتدی؟
ایتورموسن نیه راه وصال جانانی؟
نشان ویروم سنه بیر یول که رهسپار اول گیت
نهایتاً تاپاسان راه خلد رضوانی
علی ولایتینون شاهراهی، حق یولیدی
تاپار او یولدا گیدنلر رضای رحمانی
فقیر عشق ولا بو ریایه ایتمز عوض
سریر سلطنتی یا حریر و دیبانی
دئدیم آتام آنام اولسون بو رهنمایه فدا
ارائه ایتدی منه راه رشد و عرفانی
عجب قوتاردی منی عالم تحیّردن
گتوردی خاطره بیر ماجرای زیبانی
دیر کمیل که بیر گون گجیدی نیمۀ شب
فضایه حاکمیدی بیر هوای بارانی
کمال ظلمتیدی شهر کوفه خلوتیدی
جهانی ابر سیه ایلمیشدی ظلمانی
هله چراغی یانوردی چوخ ایولرین، اما
چوخ ایولرین واریدی خواب نازه برهانی
یاغوش بیر آز یاغوب، آچمیشدی، یرده نم واریدی
هوانی لطف نسیم ایلمشدی روحانی
منی خیال ایلدی بولمورم ندن بدخواب
که سخت مشکله سالدی او امر آسانی
دئدیم دوروم چخوم ایودن کناره، بیر دولانوم
گوروم تلاوت ایدر کیم کلام سبحانی؟
عراقین ایولرینون نغمه سی اولار قرآن
بو فکریله ایشیدم بیر نوای قرآنی
همین بو قصدیله چخدیم کناره منزلدن
که بلکه صورت فعله سالام تمنّانی
ولی او فکر که من ایلمیشدیم عکس اولدی
اوزاقدا گوردی گوزوم بیر مثال انسانی
او تیره شبده او نمناک یرده همّتیله
ایدر خمیده گهی قدّ سرو رعنانی
گهی دورور دوزلور ایلوری گینه تکرار
ایدور گهی گینه خم قد سرو طوبانی
او منظره ایله بیر جالب توجّهیدی
محالیدور ایده ترسیم خامۀ مانی
دئدیم خدا بو بشردور گوزومده جلوه لنور؟
و یا شبح دی؟ اونا ایلورم تماشانی
اونون او حالتی ایتدی منی ایله مجذوب
دوزنمدیم داخی دلدن آپاردی یارانی
کمال حیرتیله من دیردیم اوز اوزومه
گرک بولوب تانیام بو صفاته دارانی
گورم نه وار بو دل شبده خالی از اغیار
گهی دورار اوتورار گاه گاه پنهانی
کمال دقّتیله ایلدیم او وضعه نظر
بو نیّتیله که حلّ ایلیم معمانی
یاخونلاشاندا نه گوردوم علی ولیّ خدا
الینده نانیله خرمادی بیرده انبانی
تصادفاً آچیلوب بند کیسه یا انبان
سالوبدی زحمته اول شهریار خوبانی
قوم اوستونه داغیلوب نچه قرص نان، ناچار
یغور او قرص لری گور او صبره دریانی
کمال لطفیله بیر بیر او شهریار عرب
سیلور قویور گئنه انبانه هر دوشن نانی
او قدر منتظر اولدوم کنارده مخفی
که یغدی باغلادی آذوقۀ فقیرانی
دوباره آلدی گئنه کتفنه دوزلدی یولا
گلوب خیالیمه تعقیب ایدم او مولانی
گورم او نیمۀ شبده هارا گیدور تنها؟
بو فکر مندن آلوب طاقت و توانانی
خدا نکرده دئدیم بلکه بیر حوادث اولا
علینی تک قویام، اولماز بو عشق میزانی
بیر آز گیدوب منه معطوف ایدوب توجّهنی
فقط علیده تاپار خلق بو مزایانی
بویوردی سن نیه گلدون کمیل نیمه شب؟
گئت استراحت ایله، گورمه رنج و ایذانی
منیم وظیفم ایدر بو مسائلی ایجاب
که نیمه شب دولانام شهری یا بیابانی
گورم نیازی اولان خانواده لر نیلور؟
بو گون منم اولارین ظاهراً نگهبانی
تعهدیم وار اولار قالسا آج، منم مسئول
صباح حشرده وار عدل و داد دیوانی
گورم تهیّه و تأمین ایدوب معاشین اولار
و یا طعام و غذاسی اولوب جگر قانی
گئنه گیدردی دئدیم ویر اجازه منده گلوم
اولا قدملریوون بو کمیل قربانی
بویوردی گلماقیوا یوخ نیاز، گلمه کمیل
منه وظیفه دی پروردگار فرمانی
ادبله عرض ایلدیم امریوه مطیعم من
ولی اولا سنه قربان بو عالمین جانی
آقا بو نیمۀ شبده سن اوزون تک و تنها
بو شهر کوفه ده چوخ واردی دشمن جانی
مباد صدمه یتورسونله جسم اطهریوه
بو غصه مندن آلور قدرت و شکیبانی
تبسّمیله بویوردی او شاه دریا دل
باشوندان آت بو هوای خیال و بی جانی
علیده سن بولوسن یوخدی وحشت و پروا
بو امره ائتسَلَه مامور اهل دنیانی
بیری یاخون گله بولمز منه، یقین ایله
یاراتمیوبدی خدا منده بیم و پروانی
کیمون نه قدرتی وار سوء قصد فکرین ائده
الیمده گور هله بو تیغ آتش افشانی
یر اهلی ایلیه بولمز منی بلایه سالا
اجل گلر اولار عمرون او لحظه پایانی
ولی بلای الهی اگر مقدّر اولا
علینی دوتماقا، اولماز نجاتین امکانی
نه سن، نه من، نده دنیانین اهلی اولسا بسیج
محال امردی دفع ایلسون بلایانی
اجازه ویردی صورا منده محضرینده اولام
ولی بو شرطیله مخفی قویام قضایانی
دولاندی کوفه نی ائتدی وظیفه سین ایفا
نوازشیله دانیشدیردی هر پریشانی
یتیم اوشاقلاری شیرین دیلیله دیندیردی
او گرم دم که سالار حیرته مسیحانی
همینکه نوبت تقسیم شهر اولدی تمام
بیر آیری قصد ده گوردوم او شیر مردانی
کنار کوفیه گیتدوق یواش یواش آرام
بولر بیر عدّیه مسئول اولان بو ایمانی
قوتاردی شهر، یتیشدوق او نخل زارلره
علی ووروب بِلینه همّتیله دامانی
کنار نخلده هر بیر نفر که یاتمیشدی
قویوب گچردی باشی اوسته نان و خرمانی
همان او طرزیله هر قدر یوخلیان واریدی
ائدوب غذاسنی تامین او شیر یزدانی
یواش یواش گوتورَردی قدم، اویانمیا تا
اولار که مسکن ایدوب نخلزار و صحرانی
علیدن اوزگه ده اولماز بو رأفت و ایثار
گوروبدی چشم فلک کیمده بو مُدارانی
همینکه نوبت تقسیم آخره یتدی
امام ایلدی حمد و ثنای یکتانی
کمال شرمیله عرض ائتدی ای خدای جلیل
قصوری اولسا گذشت ائت علیِّ عمرانی
گلوب جسارته عرض ائتدیم ای امام مبین
بو گون که سیز بولارا ایلدوز بو احسانی
تانوردوز هیچ بولاری؟ یا که کیمدیلر بولوسوز؟
بو کارگرلریله ایلدوز بو سودانی
یهودیدی بولارین چوخلاری سنه قربان
که ایلدون بولارا سن بو لطف شایانی
همینکه بو سوزی مندن ایشتدی باخدی منه
کمال خشمیله اول شهر عشق سلطانی
عتابیله بویوروب وای اولا کمیل سنه
علی مگر تانیماز کافر و مسلمانی؟
اگر اولیدی مسلمان بولار، عنایت حق
فقط اولاردی که تکمیل ایده بو نقصانی
و گرنه من که امیرم گرک ایدم تقسیم
او دوز که سفره مَه زینتدی، بول بو معنانی
منیم الیمده دی تقسیم و حفظ بیت المال
گرک رعایت ائدم حکم حی اعلانی
بولار حکومت اسلامه باغلیوبله امید
رفاهیده بیر اولار مُسلمیله نصرانی
قبول ایدوبله که ویرسونله جزیه اسلامه
او اصلدندی که ایمندی مالی یا جانی
گوزلدی بیر تیکه تاریخدن بو یرده یازام
اولا بو مسئله انصاف غیر اعلانی
عدالت ئولدی، مسیحی دیر ئولنده علی
بو اعترافه مورخدی واردی اذعانی
دیلله فضل اودی، دشمن اونا شهادت ایده
علینون عدلیدی مجبور ایدوب ترسانی
ایدوب مطالعه عُمرِ علیده بیر مدّت
حقیقتین اولا بولمز گوروب که کتمانی
فقط سلونی علیدن اولار برازنده
بلی بو بحث اوزی بیر ماجرادی طولانی
دیر نولوردی که هر قرن بیر علی گتوره
الیله حل اولا هر بیر رموز پنهانی
علی نمونۀ فضل و عدالت محض
سپهر معرفتین نیّر فروزانی
محال بیرده بو دنیایه مادر ایّام
علی کیمی بیر اوغول ایلییدی ارزانی
علی شهادتی دنیانی سوگوار ایدوب
او شدّتیله که خلقتده یوخدی جبرانی
علی عطیّه دی دنیایه، حق ایدوبدی عطا
بو قصدیله تانیدا رهبریله رُهبانی
او پاک دیدۀ آینده بین و ژرف اندیش
بلی باخاندا ثرادن گورر ثریانی
باخوبدی کوفه دن ایرانه اوندا گوز نه گوروب
گیدوب ایدوبدی مداینده دفن سلمانی
یازوب کفنده وقدت علی الکریم یعنی من
حضوریوه الی بوش یولادیم بو مهمانی
الینده توشه آپارماق کریم محضرینه
قبیح امریدی، سلماندا گر اولا بانی
ولی نه فایده، افسوس صد هزار افسوس
اولیدی زیر و زبر کاش چرخ خضرانی
او عقل و فهم و فِراست، او درک و عقل کمال
مقام حکمتی محو ایلیوبدی لقمانی
ئولنده فاطمه، روحیّه سی علینون ئولوب
قویوبدی توپراقا زهرائیله منایانی
دوشوب فشاره قالوب تنگناده مرکز وحی
ایاق کسوبدی او منزلدن عالی و دانی
نه بیر گلن نه گئدن وار نه حالینی سوروشان
امام ایدوب سپری عمر تاب فرسانی
او فضل صاحبی عزلت گزین و خانه نشین
ویروب اراذل و اوباشه چرخ، جولانی
ابی قحافه نون اوغلون ایدوبله خلقه امیر
دوتوب مصادر امری گروه سفیانی
علی تجسّم تقوادی هیکل توحید
علی مروت و ایثار و عدل قربانی
یگانه معرکۀ جنگه شیر بی پروا
وحید دهر قویاندا ترابه پیشانی
علیده خالقی جمع ایلیوبدی اضدادی
او جنگ قدرتی بو طاعت نمایانی
شجاعتی هامی افراد خلقدن برتر
ایدوب عبادتی عُبّاده تنگ، میدانی
مقام زهدده زهّاده مایۀ حسرت
سالوب تحیّره تقواسی اهل تقوانی
علی جلالتینه معترفدی اهل جهان
خصوص محو ایلیوب عشقی، اهل ایمانی
گورون قلم سوزی هاردان هارا چکور آپارور؟
کیمم نَیَم تانیام من او شاه والانی؟
گئنه کمیلدی راوی دیر که بیر گجه من
کنار شهرده گوردوم او شیر هیجانی
او قدر راز و نیاز ائتدی نخلزارده تا
یخیلدی بیر قوری نخل اولدی جسم بی جانی
گلوب شتابیله زهرایه ماجرانی دئدیم
بو امردن ائدم آگه بتول عذرانی
بویوردی هاردا او حالیله گوردون؟ عرض ائتدیم
بو نخلزارده ای مهر و رأفتین کانی
کمال لطفیله فرمایش ائتدی قورخما کمیل
علیده چوخ گجه لر وار او حال ربانی
اوزوم او عالمی چوخ گورموشم عم اوغلومدان
دوشر او حالته، عشق ایلینده طغیانی
او هر گجه گیدر اوّل باخار فقیرلره
صورا عیادت ایدر هر مریض تنهانی
نیازمندلره دلده چون تعهّدی وار
ایدر همان او طریقیله عهده ایفانی
تلاش ایدر بیرینون حقّی اولماسون پامال
فقط علیده گورر خلق بو سجایانی
سزادی بوردا دیاق یا اباالحسن، ای کاش
گلوب نولوردی گوریدون او شام ویرانی
ویروبله آل رسوله خرابه بیر مسجد
حرملرین اوجالوب عرشه آه و افغانی
نه سقفی واریدی نه سالمیدی دیواری
فلک چکوب هارا گور اهل بیت طاهانی
خرابه گوشه سینی توپراق اوسته زار و ملول
روادی مسکن ایده هاشمیه نسوانی؟
رقیّه ده گجه گوندوز یاناردی آغلاردی
توکردی عارضینه اشک چشم شهلانی
دیردی عمه بیزی کیم ایدوب خرابه نشین؟
ایدردی گوز یاشی شرمنده آب حیوانی
حجاز عزیزی هارا؟ من هارا؟ بو شام هارا؟
گوروم دونیدی سپهرین بو دور دورانی
گنه عنانی الوندن آلوب قلم #خوندل
یاز آغلا قویما فراموش اولا او پیمانی
بش اون گون عمر اولا یا اولمیا دگل معلوم
نه بی وفادی مگر گورموسن بو دنیانی؟
نقدر عمرده فرصتدی نوحه یاز آغلا
ملاک ایله اوزیوه خدمته او رویانی
علی طبیبدی قورخما مرض نقدر اولا سخت
تمام دردلرین وار علیده درمانی
تولّدنده سنی وقف ایدوب حسینه آنان
گوزل یولیله آقاندا آلوب هدایانی
هدیّه هر نجه ناچیز اولا، بویوکلر آلار
گر اولسا ران ملخ، شاد ایدر سلیمانی
نقدر آرتا مصیبت، ولایتون آرتار
ولایه لازم و ملزوم بول بلایانی
بو خانواده نی الله اوزی کریم ایلیوب
بو اهل بیتیده عاشق تاپار سجایانی
اگر چه دوست لرین وار بو امره اصراری
که منتشر اولا بیر فاطمیه دیوانی
ولی نگاه عنایت خانمدان اولسا اگر
اولار بو قطره ایده شرمسار عمانی
#حیدریه
#حیدریه_مدح
#الیمده_خامه_گوزومده_سرشک_بارانی
#خوندل_تبریزی
#ترکی
✍️ #زبدةالاشعار ✍️
?: @nohe_torki
نظر دهید