مجلس یزید علیه اللعنة
.
✍️ #زبدةالاشعار ✍️
.
🆔: @nohe_torki
.
مرحوم شهاب تبریزی
.
الیمده کی قلمون نی کیمی نواسی ندور
بولنمرم بو نوادن که مدعاسی ندور
.
باشین او قدر دواته ووروب دو نیم ایلیوب
مداد تک آخوری قانی ماجراسی ندور
.
یازاندا سسلنوری خود به خود صداسی گلور
بیر اهل دل اگر اولسا بولر صداسی ندور
.
منیم گمانیمه هر بیر صداسی یا حق دور
گر اولماسا سوزی حق یازماقون بهاسی ندور
.
قلم یازاندا ازل یازدی کلمه حقی
یتوردی خلقه بونی کارین ابتداسی ندور
.
قباقجا فرضدی مخلوقه خالقین تانیسون
که یعنی خلقت ایچون مقصد خداسی ندور
.
بو آی بو گون بو کواکب بو گردش افلاک
عبث دگول بو بنادن خدا بناسی ندور
.
بو یر بو گوی بو فضا بو تمام مصنوعات
نه مقصده یارانوب حمدی یا ثناسی ندور
.
بشرده عقل اوزی سرمایه دور نهایتی یوخ
بجز خدا تانوماق عقلین اقتضاسی ندور
.
گورن گوز اولسا هر اشیاء ده خدانی گورر
او گورماقیندا بولر کیم خدا رضاسی ندور
.
بشر هدایتینه یوز ایگرمی دورت مینه دین
گلن رسول ندور ختم الأنبیاسی ندور
.
بیزه حلال و حرام و مباح و مکروهی
بیان ایدوبله قالان هانسی دور خفاسی ندور
.
اوتوزما عقلوی دنیایه دینوی ساتما
همیشه لوق دگی دنیا بونون وفاسی ندور
.
گوزتله دینوی دنیاده گیتسه قوی گیتسون
چوخ آزدی عمری گورورسن اوزون بقاسی ندور
.
ائمه نون سنه سرمشقدور طریقه لری
همان طریقیله گیت گور که تا صفاسی ندور
.
گوزوم محبت دنیا خطالرین باشیدور
سنه همیشه دیوبله بونون خطاسی ندور
.
یزید عبث دیمه پیغمبر اوغلین ئولدوردی
خطایه سیر ایله گور سلطنت هواسی ندور
.
قویوب برابرینه شاه کربلا باشینی
بولنمرم او باشین بیر بله بلاسی ندور
.
باخوب گولوب او باشا کبریلن ایدوب توهین
تصور ایلمه دی قهر کبریاسی ندور
.
قباقدا تختۀ شطرنج الده ساغر می
او ایتدوقی عملین بولمرم جزاسی ندور
.
اولوبدی مست او شقی عقلینی شراب آپاروب
دیلنده بولموری هیچ حرف نارواسی ندور
.
دیور قزل قابی جدّون حسین حرام ایلیوب
سنون کسوک باشوین مسکن طلاسی ندور
.
باش اگمدون منه قویدوم باشون برابریمه
تمرّد ایلماقون گور که انتهاسی تدور
.
علیل امامی ایاق اوسته ساخلیوب مغلول
دیمور مریضدی بو دردی یا دواسی ندور
.
گوزی باخا باخا توهین ایدور آتا باشینا
دل ایستوری دیه تا ایتدیقی جفاسی ندور
.
اون ایکی یاره دگن باشه یا امام زمان
دوباره صدمه ندور خیزران یاراسی ندور
.
آناسی فاطمه چوخ یرده یاد ایدوب او باشی
گیدوب سُراقینه گورسون که ابتلاسی ندور
.
یزید بزمنه ای کاش گلمه سین او خانم
حسینینون باشینین گورمسون قضاسی ندور
.
یقین خطا ایلدیم بو سوزومده یا زهرا
زبان قاصریمون لفظ بی اساسی ندور
.
اگر دوام ایده سن خوشدی کی گلوب گوره سن
حیالی قیزلاریوین ساتر و لباسی ندور
.
گلنده بیر نچه معجر خانم الونده گتور
خانمالرین بولوسن پردۀ لقاسی ندور
.
بیری جمالیمی مستور ایدوبدی ینگیلن
-یوزینده بعضی سینون زلفدن سواسی ندور
.
شراب مجلسی نامحرمان کوفه و شام؟
عیاندی کوفه و شام اهلینون حیاسی ندور
.
یزیده باخ اوزین اسلامیده خلیفه بولور
اساس دینی یخوبدور بوش ادّعاسی ندور
.
باخور اسیرلره تک به تک دانشدوروری
اوتانمور ایلدیقی ظلم برملاسی ندور
.
خانم سکینیه نوبت یتنده ایتدی سئوال
بو قیز کیمون قیزیدور علت بکاسی ندور
.
اسیرلر ایچره بونون چوخدی شیونی هامودان
بو وضع حال پریشان و غم نماسی ندور
.
جواب ویردیله بو قیز حسینه سوگلیدور
آدی سکینه دی گور بانگ وا اباسی ندور
.
دیدی سکینیه چوخ داد و شیونون واردور
ملول خاطروین بیر بیله هراسی ندور
.
خانم بویوردی یزیده نجه من آغلامیوم
بجز فغان و نوا حالیمون سراسی ندور
.
باشیم آچوخ جگریم داغلی قولاریم باغلى
اسیرین اوزگه غمی اوزگه ابتلاسی ندور
.
ایله سویوبلا بیزی بیر زادا گمانیم یوخ
سالام عذاریمه گور بینوا نواسی ندور
.
یوزومی حفظ ایلیوم سندن اهل مجلسدن
یوخودی مقنعه بیر معجرین بھاسی ندور
.
علاوه شام یولوندا او قدر اینجیمیشم
گتورمرم دله بی بهره التجاسی ندور
.
برهنه ناقه لر اوسته گیجه گونوز یول ایدوب
یزید بولمه میشوخ صبحی یا مساسی ندور
.
گیدوب گلوب بو شقی ساربان ووراردی بیزی
دگول بیانه گلن جوری یا جفاسی ندور
.
خانم سکینه یزیدین نشاطینی پوزدی
مبدل ایتدی غمه گور غم آشناسی ندور
.
یزید آغلادی حضار مجلس آغلادیلار
دیمه او قاتل ایوینده حسین عزاسی ندور
.
دیدی گلون بو قیزین بوینونون طنابین آچون
بونون بو ذلتی بو حال غم فراسی ندور
.
«شهاب» الونده قلم گلدی نالیه قورتار
واروندی دردون اگر تربت شفاسی ندور
.
بیر اربعین اولا قسمت بو جمعه ده سنه ده
گیداخ گوراخ حرمی صحنی کربلاسی ندور
.
#مجلس_یزید #شهاب_تبریزی
#پندیات
#الیمده_کی_قلمون_نی_کیمی_نواسی_ندور
#ترکی
.
✍️ #زبدةالاشعار ✍️
.
🆔: @nohe_torki
نظر دهید