گلایه از فرات
.
✍️ زبدة الاشعار ✍️
?: @nohe_torki
.
محمد رضا صادقی
.
اهل بیتی کربلاده سن گتوردون جانه سو
قان اولیدون اولمادون قسمت ندن مهمانه سو
.
.
دست بیعت ویرمه سیدون سن ازل شیطانیلن
درگه زهرایه ظلم ائتمزدی ثانی ناریلن
قلب زهرا دولمازئیدی آه آتشباریلن
سینه سی یانمازدی هرگز آتش سوزانه ، سو
.
.
چون کی حیله ایلدی اهل ثقیفه امته
نچه سی دنیادن اوتری توغلانوبلار خلعته
قولاری باغلی چکوبلر مرتضانی بیعته
ظلم ائدوب بکریله ثانی ناطق قرانه ، سو
.
.
کامه چاتدی تا ابد دنیادن هانسی آشنا
سن دلیل اولدون توکه گوزیاشین آل مصطفا
کوزه دن تا ایستدی بیر جرعه ایچسون مجتبی
زهریلن دوغرانی قلبی ئولدی صاحبخانه ، سو
.
.
دستگیر اولمازدی مسلم کوفه نین اشرارینه
سدّ ائدوبلر راهینی قوم عدو مهمانینه
چکدی شیری روبهان دار العماره بامینه
ضرب شمشیریله باتدی دیشلری آلقانه ، سو
.
.
یتمدون کرب و بلاده اهلبیتون دادینه
دوشمدون هرگز او دشتین شیرخواره یادینه
حشره تک ووردون خجالت تیری عباس آدینه
العطش اوج ایلینده گلمدون طوفانه سو
.
.
ویردی سقّا گوزلریلن مشکیوه ای سو بها
گوردی راضی اولمادون بیر جفت قول ائتدی عطا
سن سینان باش کاسه سیندن ائتمدون ذره حیا
اولمادن هرگز خجالت؟ دوشموشم حیرانه، سو
.
.
بینوا اصغر آناسی خیمده چوخ آغلادی
گوردی سود یوخ حالینه باخدوقجا سینه داغلادی
نالیه اصغر گلنده قولارینی باغلادی
گوندروبدور چاره سیزلیقدان اونی میدانه ، سو
.
.
تا دوروبدور مرکز میدانیده سلطان عشق
صادر اولدی گوردولر سلطانیدن فرمان عشق
سسلدی ای کوفیان اولموش بالام عطشان عشق
دینوز اولسون بسدی بو عطشانه بیر پیمانه سو
.
.
آغلیوب آغلار قویوبدی دشمنی احوالینه
ایلدی اتمام حجت باخدی بیر دلدارینه
حرمله ناگه گلوبدور اول شهین دیدارینه
ویردی اوچ شعبه اوخیلن اصغر عطشانه سو
.
.
گل کیمی حسرت قالوب بیر قطریه سولدی بالا
اوخ دگنده اول بوغازه آچدی گوز گولدی بالا
گوشیدن گوشه یارلدی آخدی قان ئولدی بالا
کربلادن پر آچوبدور جنت رضوانه،سو
.
.
آچدی اوجون دولدوروب قانیله شاه ماسوا
قصد قربتله آتوب قانی گویه ،دوتدی سمإ
عرض ائدوب یارب بو قومه شاهد اول روز جزا
قدّیمی بو ظلمیدن دوندردولر چوگانه ، سو
.
.
صبحیدن شه قویدی اجرایه ازل برنامه سین
ظهر اولوب اصغر آدیلن بوکدی پیمان نامه سین
«صادقی»بو مصرعیلن یازدی پایان نامه سین
حمدللّه اصغرین آدی گلوب دیوانه ، سو
.
#سبک_زینبم_جان_اوستیم (بیش از 4 سبک )
.
.
#فرات
#اهل_بیتی_کربلاده_سن_گتوردون_جانه_سو
#محمدرضاصادقی
#ترکی
.
✍️ #زبدةالاشعار ✍️
?: @nohe_torki
نظر دهید