حالات دیر راهب
.
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
.
اهل حق تسلیم اولماز آری حقدن غیرینه
ماحصل دوشدی او عارف لر ریاضت سیرینه
چاتدیلار شامون یولوندا پیر ترسا دیرینه
دیرین اطرافینده لشگر دوشدی أوتراق ایلدی
حضرت عیسی مسیحون طاقتین طاق ایلدی
.
.
شیعه لردن بسکه قورخوردی او قوم فتنه گر
امر ایدوبدور سر سپاه شوم و اهریمن سیر
باشلاری سرنیزه لردن بیر به بیر اندیردیلر
کیسه لرده قانلی باشلاری ایدوبلر جابجا
یر ویروب ہیر جعبه ده رأس حسینه اشقیا
.
.
دامن صحرا مکان اولدی بنات حیدره
خرداجا قیزلار گویرچین تک ویروبلر پر پره
یاتماقا چادر یوخیدی عترت پیغمبره
ای فلک سن گوهران پاکه قیمت قویمادون
ظلمدن دللّن گورک دویدون و یا که دویمادون
.
.
روزن دیریندن ایلوردی چوله راهب نگاه
فکر ایدوردی هانسی دعوادن گلوبدور بوسپاه
کیملره قاتلدی بو آدم کُشان روسیاه
گر بدنلردن کسوبلر حقون اوسته باشلاری
سیر ایدوبلر بس نیه بیراهه نی داغ داشلاری
.
.
کیمدی بو عورت اوشاقلار دستگیر و دربدر
قاره تپراقلارون اوسته اگلشویلر دیده تر
خیمه ویرمزلر اسیری چولده ساخلالار مگر؟
مقصده تیز یتمسه بو کاروان هولناک
خردا قیزلارین چوخون ایستی سویوق ایلرهلاک
.
.
زجر دون باب کلیسانی وروب پر اضطراب
باشلاری تحویل ویردی راهبه قیلدی خطاب
سرشماری ایله بیر بیر باشلاری ای مستطاب
بیز سنی درک ایلسوک یاخشی امانتدار اگر
خلعت و انعامدن حتما اولارسان بهره ور
.
.
ذبح اولونموش باشلارا نصرانی اولدی میزبان
معبدی عطر شهیدان ایلدی باغ جنان
قیلدی استشمام او عطری راهب آگه روان
بوی جان پرور کلیسایه دیدی هاردان گلور
جستجو ایتدی بیلوبدور قانلی باشلاردان گلور
.
.
دقت ایتدی کیسه لرده باشلارا سسلندی اوخ
اکبرین باشین گورنده باخدى مجذوب اولدی چوخ
سویلدی ای نوجوان بیلمم ننون وار یا که یوخ
منکه بیر بیگانیم یاندیم سنه پروانه وار
گر ننون اولسا سنون دیوانه اولسا حقّی وار
.
.
دیرینی خلوت گوروبدور راهب پرهیزگار
قاری انجیل اولوب ایتدی ئوزون شب زنده دار
حُزنلی سسلر کلیسادن اوجالدی آشکار
مرد رهبانین او سسلر آرتروبدور حیرتین
آیری کیفیتده گوردی دیرینون کیفیتین
.
.
دست معنا رد ایدوبدور گوزلریندن پرده نی
درک ایدوب اولمیش کلیسا أنبیانون مسکنی
آدم و نوح و خلیلین قاره دور پیراهنی
جعبه نی دور ایلیوبدور انبیای محترم
آغلیور یعقوب شمعونون گوزینده اشک نم
.
.
های و هائیله ذبیح اعظمه آغلور ذبیح
کوینگین چاک ایلیوبدور یوسف صورت ملیح
آغلیور باب کلیساده دیور عیسی مسیح
اللریمی قویموشام درد و غموندن قوینوما
یا حسین دیره گلوب منّت قویوبسان بوینوما
.
.
سربسر باشدان گوتورمیش انبیا عمامه سین
تک به تک تندن چخاردولار مسرت جامه سین
حضرت خاتم ائدور اجراء عزا برنامه سین
جعبه نون آغزین آچوبدور سسلنور جان جان حسین
دینیمون قربانی سن جدّون سنه قربان حسین
.
.
قیلدی معراج انبیا نازل اولوبدور بانوان
قاره چادر شبلری باشلاردا عفتدن نشان
دور ایدوب صندوقی اولدی هر بیری بیر نوحه خوان
مریم و سارا و حوا آسیه ایوای دیدی
قانلی باشه گوزتیکوب زهرابالام لای لای دیدی
.
.
ووردیلار سینه خانملار ناله و داد ایتدیلر
ئوبدیلر قانلی باشی بیر بیر مرامه یتدیلر
دیردن گوز یاشلاری گوزده کناره گیتدیلر
رعشه دوتدی سسلنوبدور راهب پاکیزه خو
من اویاقم ای خدا یا عالم رؤیادی بو
.
.
حال وحشتله یاخونلاشدی حسینون باشینه
ایلدی دقت اوباشون کول دوتان گوز قاشینه
پرتو سیماسینه هم حنجر خون پاشینه
قانه باتمش خدّینه لعل لب خونبارینه
سجده گاهندن سمایه قوزانان انوارینه
.
.
عرض ایدوب ویرّم قسم درک ایتدیگیم آیت لره
دیرده باشین آچان نورانی شخصیت لره
بیر به بیر قانلی دوداقوندن ئوپن عورتلره
کیمسن ای باش بو قدر مویه کنانون وار سنون
عالم معناده چوخلی نوحه خوانون وار سنون
.
.
آچدی زیبا گوزلرین عینینی عین الله اولان
عاشق سرگشتۀ کوی فنا فی الله اولان
چرخ ایثار و شهادتده منوّر ماه اولان
بیر باخیشلا ایتدی روح راهبه بذل جلا
کیمیا مثلی ایدوبدور مفرغی خالص طلا
.
.
راهبا آیینه دار طلعت سبحان منم
نوحه گرداب بلاده منجی طوفان منم
ایلین موسانی نوری طورده حیران منم
انبیاده هر قدر واردی ابهت منده دور
حجت اللهم کلید باغ جنت منده دور
.
.
پارۀ قلب رئوف خاتم پیغمبرم
اولیا سالاری حیدردور اونا من دلبرم
روح الارواحم ئوزوم روح الامینه سرورم
قتلگاهیمده گلوب کروبیان پابوسیمه
قدسیان مفتون اولوبدور ذکر یا قدّوسیمه
.
.
علّتی وار بو گیجه دیرونده من اولدوم قوناق
کوفه ده مهمانیدیم بیر نچّه گون بوندان قاباق
میهمانداریم ز بس رذلیدی وجداندان اوزاق
بالش ایتدی بو یارالی باشیمه خاکستری
تودۀ خاک تنور اولدی حسینون بستری
.
.
دیرده گوردون نجیکه بیر بلوک درد آشنا
قاره گیمشدی باش آچمشدی اولوالعزم انبیا
گوردوگون تک بزم یاسیدی همان مطبخ سرا
نوحه خوانیم نوحیدی ناله ایدن ارواح پاک
دیدیمه گلمیشدی عیسی سر برهنه سینه چاک
.
.
نسبتی وار دور کلیسانون اونا ای اهل راز
بازدیده گلمیشم عیسایه ای مهمان نواز
مسلم أول قرآندا وار انجیلدن چوخ امتیاز
آچ صلیبی گردنوندن شکر ایله تقدیریوه
باشلا تز تکبیری من احسن دیوم تکبیریوه
.
.
بیرده ای پاکیزه خوی و بندۀ پاک اِله
کیسه لرده ذبح اولان باشلاره قیلدون سن نگاه
درک ایدوب بیر نوجوانون باشینی هیچکدون آه
قوی دیوم کیمدور او باش روح روانیمدور منیم
ئوز گلیمدور ئوز بالامدور نوجوانیم دور منیم
.
.
سینه سین شمشیر لر شان شان ایدن اوغلاندی او
قلبیمی داغ غمی بریان ایدن اوغلاندی او
لیلی سین چوللرده سرگردان ایدن اوغلاندی او
گیت دوباره باخ أونون شمشیر بؤلمش باشینه
نوجوان مهمانوی مهمان ایله گوز یاشینه
.
.
اهل سن ای پیر دانا دل قولاق ویر بو سوزه
یولاری سرنیزه لرده گلمشوک بیز گوز گوزه
گیت گتور اول قانلی باشی قوی منیله یوز یوزه
قالمیوب طاقت اونون درد فراقندن منه
وئرمیوب بوسه نه مدّتدور دوداقیندن منه
.
.
باشیمی اولسا خیالون ایتمگه گر شستشو
مانعی یوخدور آنام زهرایه بیر خدمتدی بو
شرطی واردور قویما زلف اکبری آشفته مو
هم یووب هم شانه سین وور اجری وار ای دلنواز
تللرین گورسین منظم لیلی دینجلسین بیر آز
.
.
فکرون ای تازه مسلمان قلبده لِله دور
هر نه خدمت ایلیورسن ناظرون الله دور
کاروان اهلی او زیبا باشه خاطر خواهیدور
ایلسون قاش گوزلرین کپریکلرین توزدان رها
عمه سی ایلر تشکر باجیسی ایلر دعا
.
.
یا حسین بو نوحه نی بیر دسته زیبا گل کیمی
دسته چینی ایتمش «انور» عاشق خوشدل کیمی
اولسا ناقابل قبول ایلر آقا قابل کیمی
سائله سلطان در الطافنی سدّ ایلمز
تحفه هر قدری کیچیک اولسا بیوک ردّ ایلمز
.
.
#دیر_راهب_انور_اردبیلی
#اهل_حق_تسلیم_اولماز_آری_حقدن_غیرینه
#صدای_عاشورا #ترکی
.
✍️ #زبدةالاشعار ✍️
.
🆔: @nohe_torki
نظر دهید