احسانه منت اولماز
.
✍️زبدة الاشعار✍️
.
🆔: @nohe_torki
.
حاج اصغر فرشچی ( عدلی تبریزی)
.
اهل ریا دیلنده رحم و مروّت اولماز
گلشنده باغ چمنده گلده حسادت اولماز
.
بیع و شراده ایله دقّت به امر قرآن
دوزپول قازان قازانسان بیرایله دولت اولماز
.
قرآن پیاده ایله قرآن پیاده اولسا
اسلامی مملکتده مستی و شهوت اولماز
.
یر آش قلوب خلقه اول شهرۀ زمانه
غارتگر دل اولما غارتده شهرت اولماز
.
گل محفل حسینه تاپ شهرت جهانی
ویرسون سنه بیر عزّت بیله بیر عزت اولماز
.
مِهر حسین اگر چه بیر قلبیده تاپولماز
برزخ اونا مکاندی پاداشی جنّت اولماز
.
سفره آچان حسینه صدق دیلیله آچسون
احسان خدایه ویرسون احسانه منّت اولماز
.
نوحه اوخی صفادن فرض ایله کربلادی
کربو بلایه گیدسن ایله سعادت اولماز
.
سائل سئوال ایدنده لطفون گوروب دییردی
جانیم فدا حسینه بیله کرامت اولماز
.
حرمانه دوندی امید زینب سئوال ایدنده
بولدی گیدورحسینی اخیامه رجعت اولماز
.
یاده سالوب آنانون امرین دیوب دایان بیر
اُول قول بویون منیله الده بوفرصت اولماز
.
ویر بیراجازه زینب اوپسون حسین بوغازون
الدن الیم اوزولسه گیدسن فراغت اولماز
.
ال قوی بوسینم اوسته صبرایسته تا دایانسون
بیر بیله هَمّ و غمده زینبده طاقت اولماز
.
آیرولدی گتدی قارداش باشلاندی شورِ محشر
محشر نه محشر الله ایله قیامت اولماز
.
زهرادن اَمدوقی صود ایتموشدی شیرصولت
جام شهادت ایشدی بیله شهادت اولماز
.
قان ویردی دین اسلام دین جهانی اولسون
اسلامی مکتبی تک دنیاده مکتب اولماز
.
سر نیزده اوخوردی باش آیه آیه قرآن
غبطه ایدردی داود ایله تلاوت اولماز
.
زینب دییردی قارداش لحن حجازه قربان
قرآن تلاوت ایله بیله بلاغت اولماز
.
شامه یتیشدی زینب وای شامیان الیندن
بیر بیله یریوزونده یاغی جماعت اولماز
.
دخت بتوله قویدی آد خارجی اسیری
شام اهلینون ندندی شرم و شرافت اولماز
.
شاعر نه چوخدی (عدلی) نوحه ولی یازانماز
هر شاعری که یازسا ایله سعادت اولماز
.
رباعی:
مِهرحسینیلن اولوب زبس عجین وجودیمیز
توخوندی عشقه باغلانان طنابه تارو پودیمیز
اولوبدی قبله گاه عشق یاتان یری صفالیدی
حریم خاکی دوت آغاج مُهر نماز سجودیمیز
.
.
.
#پندیات
#حسینیه_مدح
#اهل_ریا_دیلنده_رحم_و_مروت_اولماز
#عدلی_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید