زبدةالاشعار

اولدی حسینه منزل او گونکه بلا یری #اربعین_شهاب_تبریزی

اربعین
.
✍️ #زبدةالاشعار ✍️
.
🆔: @nohe_torki
.
مرحوم شهاب تبریزی
.
اولدی حسینه منزل او گونکه بلا یری
قالمادی یر یوزونده داخی بیر صفا یری
.
جشن و سرور اولوندی ولا اهلینه حرام
دولدی غم و ملالیلن اهل ولا یری
.
بیجا دولانما یریوزون ایدل خوش اولماقا
یوخ یر یوزنده عشرت ایچون بیر بنا یری
.
نه قالدی گل صفاسی و نه ذوق عندلیب
غم چولقادی تمام خوش آب و هوا یری
.
فصل بهار اولیدی نه ای کاش آچیدی گل
نه گل گیاهیلن دوشنیدی قرا یری
.
نه گلستان اولیدی نه گلشن نه جور خار
نه عندلیبه گلشن اولیدی نوا یری
.
گورسن آچوبدی قرمزی گل باخما یوم گوزون
قاره گیوبدی فاطمه وار دور حیا یری
.
گل ایستسن اورک گوزون آچ کربلایه باخ
بیر طرفه گلستانه دونوب کربلا یری
.
کربلا که خرمن گلدور معاینه
گلگون اولوبدی قانیله یوخ بیرجه پا یری
.
تازه گلین قولاقی اولوب پاره بولمورم
قاندور داموبدی گُل گُل اولوبدی بلا یری
.
یا اللرین خضاب ایلمشدی حنائیلن
داماد الین یوووب بویویوبدی حنا یرى
.
قیل کربلا دیارینه یا فاطمه نظر
گور بیر اولوب او چول نجه بیر ماجرا یرى
.
باش سیز جنازه لر توکولوب قوملار اوستونه
قربانیلن دولوب دیه سن بس منا یرى
.
گور سینَن اوسته یاتماقا ناز ایلین بدن
مأوا ایدوبدی بی کفن و بی روا یری
.
سیر سعادت ایله یرین گور شرافتین
اشرفدی عرشیدن دیوله یوخ خطا یری
.
پیغمبر اوغلنون جسدین باسدی باغرینا
البته آرزو أیدوب اولدم سما یری
.
الله قانیدی قانی حسینون آخوب یره
اکسیر اعظم ایتدی او خون خدا یری
.
واردور اورکده دردون اگر کربلایه گئت
یوخ یر یوزنده بیر ایله درده دوا یرى
.
چون تربت حسینده قویموش شفانی حق
حق بین گورر حقیقت او یردور شفا یری
.
بیمار کربلا قیییدن وقته شامیدن
قصد ایلدی بو فکریله اول پربها یرى
.
باشلا او یرده ایلیه بیر چاره دردینه
تاپدی طیب حاذق ایچون التجا یرى
.
سالدی اوزون او مرقد ششگوشه اوستونه
اولدی بالایه زینت آغوش آتا یری
.
گویا بو دللریله بیان ایتدی حالنی
بیمار خسته ام ایده سن وار عطا یرى
.
مجروح اولوبدی ساقلریم بسکه ایپ کسوب
بوینومدا واردی ایمدی ده طوق جفا یری
.
دور قوى الیوی یاره مه بلکه شفا تاپا
چوخ اینجیدور منی باباجان بو یارا یری
.
قان ایلیوبدی باغریمی شامین مصیبتی
برباد اولیدی کاش او مصیبت فزا یری
.
بیر بیحیالیق ایلدی شامون جماعتی
واضح گتورمرم دله یوخدور ادا یری
.
اما بیزی گورنده هامی کف چالوردولار
دوتموشدی چرخی غلغله هم بو صدا یری
.
هر ستمتیدن گلوردی صدا خارجی گلور
آل عبایه هیچ یوخودی بیر رجا یری
.
عورت اوشاق کیشی هامی آچمشدی ظلمه ال
جور و جفاده قویمادیلار انتها یرى
.
دولدوردولار اتکلرینی بعضی داشیلن
هر گونه ظلمه گورودوله بیزه روا یری
.
آل عبانی شامده بیر گون غروبه تک
گزدیردیلر بو نحویله هر ناسزا یری
.
ایلردی بیر منادی ندا رهگذارده
ای فرقۀ یهود یتوب مدعا یری
.
آل علی گلوبدی گلون انتقام آلون
هر گونه انتقام آلاسوز یوخدی لایری
.
پیغمبر اهل بیتی یهودی محله سی
قان آغلیا بو نکتیه وار مرتضا یری
.
شام اولدی اهل شام یتوب استراحته
اولدی خرابه گوشه سى آل عبا یری
.
نه چکمشوخ خرابده عرض ایتمرم بابا
گوردون کسیک باشیله او ویرانسرا یری
.
ویردی رقیه آج و سوسوز جان خرابده
اولدی خرابه گوشه سی اول مبتلا یری
.
قالدى جنازه سی قوری یر اوسته بیکفن
ایتدی گوزومده جلوه بابا کربلا یری
.
سالدی سنی خیالیمه یاندیردی قلبمی
معناده گتدی درده بو غم برملا یرى
.
چوخ مشگل اولدی شامده دشمن شمادتی
هیچ یرده گورمدوخ ایله بیحد جفا یری
.
برباد اولیدی قصری یزید ستمگرین
اول گونکه اولدی آل شه اولیایری
.
قولّار طنابه باغلی بویونلاردا سلسله
باخسان قالور طنابلرین جابجا یری
.
پیغمبر عترتین ایله گورجک یزید دون
گورموردی وجددن او لعین دغا یری
.
باشون گوروب قباقدا آچوب دل شمادته
گوردی قصاص بدره عجب اقتضا یری
.
آلدى او بیحیا اله بیر چوب خیزران
وار لبلرونده باخمادی تیر بلا یری
.
گئتمز جزا گونونده بو زحمتلرون هدر
واردور #شهاب هر عمله بیر جزا یری
.
یاز نوحه آغلا نوحه نی زهرا خانم سوور
علت بودی که خوشدور اونا هر عزا یری
.
.
#اربعین_شهاب_تبریزی
#اولدی_حسینه_منزل_او_گونکه_بلا_یری
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  در گدایی خودت نام مرا مشهور کن #مناجات #علی_احدی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی