حالات سعید بصری و عزم او به یاری امام حسین (ع)گریز به حضرت علی اکبر (ع)
.
.
.
مرحوم تائب تبریزی
.
.
اولسا هر باشدا اگر شور حسین و کربلا
گرم استقبال ائدر یوز وئرسه هر درد و بلا
.
باش و جانیندن گچوب اؤز خانمانین ترک ائدر
جز هوای نینوا اولماز باشیندا بیر هوا
.
کربلا آدی گلنده هوش باشیندن چخار
نه آنا فکری قالار قلبینده نه مهر آتا
.
کربلانی قصد ائدر بیر باش دیلینده یا حسین
هر قدمده ذکر ائدر یا کربلا یا کربلا
.
عرضیمه شاهد سعید آدلی جوان حالاتیدور
شرح قیلّام گر منه یار اولسا ذات کبریا
.
مقتله جمع اکابردن یازوبلار آدینی
نوجوانلیقدا واریدی ثروت بی منتها
.
نچه گون لر قبل گویا ایلمیشدی ازدواج
جامۀ دامادی اگنیندیدی عیناً جابجا
.
شهرده بیر گون اکابر جمعیدی چارسوقده
صحبت ایلردی او بیر جمعیله اول صاحب وفا
.
بیر عرب یتدی او دم ناگاه یوز گوزده غبار
اول سعادتمنده اوّلده سلام ائتدی ادا
.
بعد بیر نامه ادبله ایلدی تسلیم اونا
شور خیز و عشق ریز و عشق بیز و عشق زا
.
نامه نه نامه بوتون مهر و محبّتله دولی
سوزلری معجز بیان و دلنشین و غم زدا
.
نامه نه نامه که هر یاتمیشلاری بیدار ائدر
آرتورار قلب سلیم آئینه سینه انجلا
.
نامه نه نامه باخان سرگرم احساسات اولور
متن تفسیرینده واردی اَلبلاءُ لِلوِلا
.
نامه نه نامه که هر بیر مُرده جسمه جان وئرور
روح پرور بیر مطالبله دولوب باشدان باشا
.
وه نه نامه سوز فرح ، انشاء فرح ، املا فرح
درس جانبازی یازیلمیش صفحه سینده لابلا
.
نامه نه نامه حسینِ فاطمه عطری گلور
نه حسین شهر وفایه شهسوار باوفا
.
گوزلری دولدی محبّتله آخوب اشک تری
سویلدی اولسون بو عالی نامیه جانیم فدا
.
احترامیله آچوب ائتدی دولی گوزلی نظر
دل آلان سوزلر یازوب گوردی امام اتقیا
.
گوئیا بیله یازیلمیشدی او متن نامه ده
روح زهرادن سلام اولسون سنه ای دلربا
.
بیر ضیافت مجلسی شور اوسته برپا ائتمیشم
چوخ گلن وار اول ضیافت خانیه دلده ثنا
.
نه ضیافت خانه، فرشی قان، دوشنمیش سفره قان
شربتی اشگ زلال دیده خون دل غذا
.
نه ضیافت خانه اوردا جمع دی پیر و جوان
شیر خوار و بالغ و مردان پاک و پارسا
.
زشت و زیبا سیّد پاک و غلام متّقی
کلمۀ تبعیض یوخ ایستر سفید اولسون سیا
.
اوزگه بیر مجلسدی تعریفی قوتولماز ذکریله
جمع اولوب اول مجلسه هر قدر وار صاحب وفا
.
بو ضیافتخانه ده گوردوم یرون بوشدور سنون
ایستدیم اولسون سنونده شرکتون ای مه لقا
.
ایله همّت شوقیله گل بو ضیافت خانیه
بو ضیافت خانه ده گور وار نجه عالی صفا
.
نه ضیافتگه حسین ابن علی دور میزبان
خدمت ایلر میهمانه عترت آل عبا
.
گر باشوندا وار سنون شور حسین تعجیل ایله
ایلمه تأخیر گل تئز ایله کسب ارتقا
.
ایلین دعوت حسین، مهمان سنون تک بیر جوان
قتلگه مهمانسرا، مقصد دیار کربلا
.
کربلا نه کربلا دارالصّفا کوی وفا
لاله زار عشق و ایمان گلشن درد وبلا
.
کربلا نه کربلا رشک منا میدان عشق
وار او یرده تشنه لب یتمیش فدای جانفدا
.
کربلا لفظین گوروب شوریده سر اولدی سعید
اوینادی قلبی یریندن آرتدی قلبینده قوا
.
شوریله دوردی ایاقه گلدی بیر باش منزله
اؤز غلامین سسلدی باشینده اؤزگه بیر هوا
.
امر ائدوب آماده ایله مرکب جنگی منه
وار قاباقدا بیر سفر وحشتلی چوخ دهشت فزا
.
مطلبی وئردی خبر امّ سعیده تئز غلام
تا مُبیّن اولدی اول محجوبیه بو ماجرا
.
فکر ائدوب من بیر آنایم تک بیر اوغلوم وار منیم
ائتمیشم داماد تازه اؤز بالامی ای خدا
.
گر بالام گئتسه جوانلیقدا الیمدن نیلرم
وای منه اولدوم عجب درد و بلایه مبتلا
.
دوزمه دی گلدی سعیدین بوینونا سالدی قولون
یوز گوزون ئوپدی دئدی ای دیدَمَه نور و ضیا
.
سن اوغول صبر دلیم آرام جانیمسن منیم
صبریمی آلما الیمدن قلبیمه وورما یارا
.
سن منیم عمریم گلستانینده بیر گولسن اوغول
غملننده بو دلیم سنلن تاپار دائم صفا
.
سن اگر گئتسن سولار بو گلستان عزّتیم
غملی بلبل تک گرک دائم ائدم داد و نوا
.
گل اوغول آغلار آناوی قیل تصدّق باشیوه
گئتمه راضی اولما قلبی نار هجرانه یانا
.
تا ائشیتدی بو سوزی وقریله عرض ائتدی آنا
ایلیوب دعوت منی فرزند ختم الانبیا
.
من آنا هاردان اولار بو دعوتی ردّ ایلیم
هر ایکی دنیا اولام خسران عظمایه سزا
.
من حسین مهمانیم گل مانع اولما قوی گئدیم
سال یولا ایله دالیمجا بیر گوزی یاشلی دعا
.
قیل دعا گر چه سعیدم حق گئنه ائتسون سعید
ایلیوم درک حضور خامس آل عبا
.
بیر حسینی گورماقی من وئرمرم دنیالره
وار حسینین محضرین درک ایلماقدا چوخ صفا
.
اولماسا شور حسین هر باشدا خوار اولسون او باش
وار حسین سیز عالم امکاندا نه قدر و بها
.
تا آنا گوردی جوانی گئتماقا آماده دی
تئز گلوب تاپدی عروسین دلده آه جانگزا
.
سویلدی بیچاره نه اگلشمیسن غفلتله سن
پر خطر بیر یول دوتوب اوغلوم گئدور ای بینوا
.
ایستوری سالسون سنی زلفیم کیمی قاره گونه
ایله سین دنیانی من بیچاریه دارالعزا
.
دور ایاقه کس قباقین فکرینه تغییر وئر
بلکه گئتماقدان ائده صرف نظر اول مه لقا
.
من نجه عرض ایلیوم نه حالیله گلدی عروس
اهل دل اولسا سچر معنانی صورتدن بلا
.
سویلدی گل بو جوان وقتیمده رحم ایله منه
گئتمه ائتمه سن منی زلفیم کیمی بختی قرا
.
اوز عروسین تازه داماد آتسا ایلر قاره بخت
نوعروسین قاره بخت اولماقینی گورمه روا
.
مین دیلیله دیل دئدی اول تازه داماده عروس
سوزلره وئرموب قولاق بیر ذرّه ائتموب اعتنا
.
شوریله سویلوب عروسه من سنه وئردیم طلاق
یعنی افسانه منه اولماز مؤثّر مطلقا
.
آری آری عاشق صادق مجازی ترک ائدر
عشق یار اوسته دوشر یکسر گوزیندن ماسوا
.
گوردی اوغلوندا آناسی عزم راسخ وار گئده
بولدی ال اوزسون گرک نورسته اوغلوندان آنا
.
ایمدی که سویلوب گئدورسن وار سنه بیر خواهشیم
زینب کبرایه مندن ده سلام ایله بالا
.
دئ آنام عرض ایلدی مندن سلام اولسون سنه
ای اوزی زهرایه مظهر دختر خیرالنسا
.
نوجوان اوغلوم منی آتدی سیزه گلدی قوناق
ای خوشا احوالینه تاپدی مقام ارتقا
.
احترامیله سعید اوپدی آناسی اللرین
باشدا سودای حسینی آیریلوب دوشدی یولا
.
گئتدی بیر نچه قدم دوندی دالینجا باخدی بیر
عرض ائدوب باخ گور دویونجا من خداحافظ آنا
.
باخدی آردینجا دولی گوزلی آناسی سسلدی
گئت یوبانما گئت سنی اللهه تاپشوردوم بالا
.
باشدا بیر شور حسینی اؤز آناسین ترک ائدوب
آیریلوب آت سوردی دلده شوق و ذوق نینوا
.
یول گئدردی فکر ائدردی یاخشی بختیم اولدی یار
ائتدی بیر بیله سعادت حق منه لطفاً عطا
.
عرض ائدردی بیر نولا یارب اولا یوللار یاخین
کربلایه تئز یِتَم یتسون حصوله مدّعا
.
فاطمه اوغلی حسینی تئز زیارت ایلیم
بو زیارت اشتیاقی صبریمی ایلر فنا
.
درک ائدوب بیر دلنشین صحبتلریندن فیض آلام
هر ایکی دنیا منه سرمایۀ عزّت اولا
.
کربلاده لیک بولمزدی عزیز فاطمه
بیر نجه غوغایه دوشموش وار باشیندا نه بلا
.
.
«ورود سعید بصری به کربلا»
.
.
آت سورردی روز و شب یتسون بلا صحراسینه
یتدی بیر تلّ اوستونه اول نوجوان دلربا
.
مرکبین چکدی لجامین سالدی اطرافه نظر
گوردی بیر صحرا قاباقدا صحنه سی دهشت فزا
.
بیر طرفده بیر سپه واردی اونون یوخدور سانی
جنگ و مغلوبه ائدر اعلان وار آثار عزا
.
بیر طرفدن سس گلور گوردی: «اوغولسوزدور وورون
ئولدورون بو بی پناهی بیر کسی یوخ یار اولا»
.
اؤز اؤزیله سویلدی لشکر ندور غوغا ندور
کیمدی بو یالقیز و یا کیمدور بو قدری اشقیا
.
بیر طرف جاری اولور گوز یاشی تک آب فرات
بیر طرفده وار صدای العطش اَلماء ماء
.
صحنۀ محنت فزانی ایلدی مدّ نظر
کربلادور حسّ ائدوب اول سرزمین پر بلا
.
بیر طرفده وار قورولموش خیمۀ زرتارلر
خیمه نه خیمه اؤزی چوخ پربها زرّین وِطا
.
بولدی بو عالی چادرلاردا حسین خرگاهیدور
که جلال و کبریائی اوندا واردی جابجا
.
مرکبین سوردی او سمته اوندا که زهرا قزی
خیمۀ دینین قباقیندیدی یالقیز برملا
.
قیزلارا حافظ اولوب قویمادی قاچسونلار چوله
سخت وحشتده یاشاردی عترت خیرالورا
.
زینب کبری گوروب ناگاه بیر آتلو گلور
سسلدی آتلو دایان گلمه بیله بی اعتنا
.
ای سواره گلمه قورخوتما حسینین قیزلارین
بو چادردا گورموسن واردور بنات مصطفا
.
قارداشی اوغلی ئولن وار خیمه لرده یا رَجُل
سسلوری بعضی اوغول وای بعضی سسلور وا اَخا
.
سالما خوفه دوشمه سین نازلی رقیّه وحشته
آیریلاندا بو قزی چوخ تاپشوروب میر هدا
.
اهل دعواسن اگر گئت جنگ ایله جنگاهیده
قورخیه دوشموشلری قورخوتما ائتمه سن جفا
.
مرکبین چکدی لجامین دوردی شرمنده سعید
ترلدی شرم و حیادن اول جوان باحیا
.
عرض ائدوب من بیر غلامم خاندان حیدره
گلمیشم مهمان سیزه ای دختر خیرالنّسا
.
من گلنده دامنیمدن دوتدی گوز یاشلی آنام
دخت زهرایه دئدی مندن سلام عرض ائت بالا
.
بیر سعید آدلی جوانم طالع مسعودیله
من حسین بیماریم بو دشتدور دارالشّفا
.
گلمیشم کرب و بلا سلطانینین پابوسینه
گوگلیمی آلسین منیم دل دردیمه ائتسون دوا
.
بو سوزی زینب ائشیتدی گلدی دلدن رقّته
درج چشمیندن توکوب رخساره درّ پربها
.
سویلدی میداندا یالقیزدور حسینیم یاسعید
آختاریر ناصر دیور هل من معین اول مقتدا
.
یوخ سسینه سس وئرن ائلسیزدی تاپمیر بیر کمک
بیله ساعتده حمایت ایله همکار اول اونا
.
آلدی بو سوز دلدن آرامین سعیدین شوریله
یوز قویوب میدانه چوخ مردانه اول قدّی رسا
.
دولدوروب گوردی بلالی دشتی دریا تک قوشون
بیر ایله لشگر ولی یالقیز امام اتقیا
.
اوغلی قارداشی ئولن دشمنله یالقیز جنگ ائدر
پیکرینده صاف یری یوخدور دگوب از بس یارا
.
سویلدی افسوس اولا یوخدی بو شاهین لشکری
ال تاپوب یالقیزلیوب پیغمبر اوغلون اشقیا
.
صاق صولا هر دم باخار معلوم اولان یار آختارور
دور و بر دشمندی امّا یوخدی کیمسه یار اولا
.
آرتدی احساساتی شوریله گلوب شوره سعید
عرض قیلدی السّلام ای خامس آل عبا
.
السّلام ای دشمن ایچره یار و یاورسیز قالان
من سعیدم گلمیشم بو گون سنه یار اولماقا
.
فاطمه اوغلی نه گوردی گلدی بیله وقتده
سمعینه بیگانه لر ایچره صدای آشنا
.
ائتدی لطفیله عزیز فاطمه ردّ جواب
سویلدی بعداً یوباندون بس ندن ای باوفا
.
بی کسه یار اولماقا بیله گللّر یاسعید
بیر قبیله ائلسیزی بیله سالالّار یاده یا؟
.
گوزلریم قالمیشدی یولدا گوزلیوردوم من سنی
یاخشی گلدون بو حسینون گوگلین آلدون مرحبا
.
قوللارین سالدی سعیدین بوینونا سلطان دین
خیریله اول نوجوانه ایستدی حقدن جزا
.
وئردی آرخا آرخیا میداندا مأموم و امام
قوؤدیلار دشمن لری صاقدان صولا صولدان صاقا
.
سالدیلار آخرده مأمومی امامیندن کنار
یخدیلار آتدان زبسکه ووردیلار زخم جفا
.
ائتدی جان قربان رکاب شهریار دین ده
چون تازا دامادیدی یاخدی اله قاندان حنا
.
اوندا که اؤز قانینه غلطان یخیلمیشدی سعید
باشی اوسته حاضر اولدی تاجدار کربلا
.
اول جوان نامرادی اکبریندن سئچمدی
یوز یوزه قویدی سعیدیله او سالار ولا
.
مهریله بو یوز یوزه قویماق مجسّم ایلدی
اکبر و حال حسین ابن علینی ای خدا
.
#گریز #اکبریه_شهادت
.
اوندا که جدّی شبیهین قانینه غلطان تاپوب
گوردی یوز گوز قانلو دوشموش ابش یارا پیکر یارا
.
فاطمه اوغلی قویاندا اکبریله یوز یوزه
لاله رنگ ائتدی جمال شاه مظلومی دما
.
سوز مُطَوَّل گئتدی خوشدور خاتمه تاپسون کلام
بوردا ختم ایله سوزه چوخ طول وئرمه «تائبا»
.
دم وئروب «یعقوبیله» « فیروز» آدلی نوحه خوان
دفتره یازدون بو عالی مطلبی وئردون باشا
.
دوت حسینون دامنین ایله الونده واسطه
آل اوزونله اونلارا حقدن برات #کربلا
.
#اصحاب_الحسین
#سعید_بصری
#اولسا_هر_باشدا_اگر_شور_حسین_و_کربلا
#تائب_تبریزی
#ترکی
#زبدةالاشعار
