احوالات اهل بیت عصمت و طهارت در راه شام
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
بخش اول
( بخش دوم با مصرع اول #بو_بیر_خبردی_که_نظمه_دوزولدی_عنوانی )
.
اولوب چون آل علی دستگیر لشکر شام
مخدراته ایشیق گوندوز اولدی لیل ظلام
.
دمشقه سرعتیله کاروان روان اولدی
یول اوسته گوز یاشی گوزلرده دوندی قان اولدی
.
دایاندی قافله شامین یولوندا بیر یرده
سپاه شام اوزونه قوردولار سراپرده
.
چادردا دالدالانوب اشقیای بدکردار
ولیک گون قاباقیندا قالیب خانم قزلار
.
اولار چادردا گیدوب راحت اولدی نازیله
گون ایسّی سینده بولار قالدی سوز و سازیله
.
اولار تمامیسی مشغول عیش و نوش اولدی
بولار قالوب گون ایوینده گل اوزلری سولدی
.
اولار ایچوب سو اولوبلار تمامیسی سیراب
بولار اولوبلا سوسوزدان گون ایسّی سینده کباب
.
ویرردی سو اولارا الده جام سقاسی
بولاردا حسرتیله یاد ایدردی عباسی
.
دیردیلر بالالار دلده آه درد آمیز
نه یاخشی دور یانیمیزدا اولیدی سقامیز
.
گوریدی حالیمیزی ایلییدی امر صواب
وییریدی سو بیزیده ایلییدی بیر سیراب
.
هزار حیف او وفالی بیزی نظردن آتوب
سالوب یولا اوزی لب تشنه سو یانیندا یاتوب
.
اولاار ایچوب قالانین آتدی آت ایاقینه
بولار باخوب سویا قویدى الین دوداقینه
.
گون ایسی سینده بیری گر قالا سوسوز چولده
بولر نه چکدیله آل عبا سوسوز چولده
.
گلور خیاله خانملار نه حالته قالدى
سو ایسلادان یره اطفال اوزلرین سالدى
.
کناردن بیری باخدی حیاتدن دویدی
بیریسی سینه سینی سو آخان یره قویدی
.
چادرلار ایچره گیدوب راحت اولدی شوم سپاه
بولار گتوردی ولی ناقه سایه سینه پناه
.
او شهریار که عالملره پناه اولدی
اوزونه سایۀ ناقه پناهگاه اولدی
.
مریض امامون او گون امری بیر یره دایانوب
که ناقه سایه سینه گون ایوینده دالدالانوب
.
نجه روادی امام امری بیر یره دایانا
که ناقه سایه سینه گون ایوینده دالدالانا
.
ندن دی اولمادی ویرانه عالم ایجاد
دوشنده ضعفیله اول قطب عالم ایجاد
.
اولار که گللر اولاردان اولاردی شرمنده
اولوبلا سایه خاره او گون پناهنده
.
نجه روادی خدا خار کامکار اولسون
بتول گللرینون پاسبانی خار اولسون
.
غرض او قافله سوی دمشقه باغلادی بار
سوار اولوب هامو یوللاندی شام شومه قطار
.
او چولده بیر بالا دنیانی گوزدن آتموشدی
بولنمورم که ایدوب ضعف هاردا یاتموشدی
.
گلنده هوشه او عفت نهالینین ثمری
نه گوردی کوچ ایلیوبلر گیدوبله عمه لری
.
نه چاتدی زینبه ال نه باجیسی فاطمیه
نه آیری بیر کسه چوخ دوشدی خوف و واهمیه
.
او دشتده اوزونه ئولمه میش عزا قوردی
سرشگ حسرتیله گوزلرینی دولدوردی
.
ایاقه وحشتیله دوردی گوزلری گریان
او قورخولی چولی بیر قدر گزدی سرگردان
.
برهنه پائیله چولده گیدردی صاق وصولا
قویوب الین باشینا دمبدم باخاردی یولا
.
دیردی گیتمه دایان عمه اولدی باغریم قان
ایدوم نه چاره که قالدیم بو چولده سرگردان
.
.
بوشام یوللارینی ماه پاره سیز گیتمه
بو چولده قویما منی بیله چاره سیز گیتمه
.
او قافله یانیجا گون گیدور قمر گیدوری
دوشوب ستاره قالوبدور ستاره سیز گیتمه
.
بتول گلشنینون گللرین کناره آلوب
آماندی عمه بو خسته هزاره سیز گیتمه
.
بو سوگلون نجه گل گور دوشوبدی قاره گونه
چیخانماز آغ گونه بو بخت قاره سیز گیتمه
.
او گلشنی که سنیله گیدور دگول گلسیز
نجه روادی اولا خوش ترانه بلبل سیز
.
بو مبتلای غمین کسمه راه چاره سینی
یتور او قافلیه گل لرین هزاره سینی
.
گوزلدی عمه مصاحب گل اولسا بلبلیله
ویره نفس نفسه بلبل حزین گلیله
.
نولی وصال گله رشتۀ فراقی کسه
یتیم باجیلاریما بیر ویراخ نفس نفسه
.
بو اودلانان اورگیم اودلانور بو بیر سوزدن
مگر یتیمه قزی عمه سی سالار گوزدن
.
منیم بو قورخولی صحراده وحشتیم چوخدور
دولانورام سیمه کیمسه سس ویرن یوخدور
.
مگر یتیمه قزا بیر نفس ویرن اولماز
سسینه ناله ایدن دمده سس ویرن اولماز
.
مگر یتیمه اولاندا بیری بو دنیاده
گیدوب سالالا اونی هولناک صحراده
.
بابام گیدنده ایدوبدور منی سپرده سنه
ندندی اولموسان ای عمه کم علاقه منه
.
بو چولده بس دیموسن خسته دل قالان قز وار
هرایینه یتن اولماز صغیره دور قورخار
.
رسوم مهر و وفانی غریبه ترک ایتدون
منی بو قورخولی صحراده ترک ایدوب گیتدون
.
او قدر قالمور ایده غصه زهره چاک عمه
یاخونلاشوبدی اولام قورخودان هلاک عمه
.
بو نابلد چول اوزى قورخولی صغیره اوشاق
ایدوم نه چاره دوشوب ائل اوزاق قبیله اوزاق
.
امیدیم ایمدی بو صحراده بیر یره گیتمز
او کاروان غمه بیرده بو الیم یتمز
.
غریبه قافلۀ عشقدن اوزولدى الیم
تانومورام یولی آردوزجا پاپیاده گلیم
.
دولانموشام دیمورم پا پیاده زار و فگار
یورولموشام اوزوم اولموش ایاقلاریمدا قابار
.
اگر یولی تانیسام سانما آنی دینجلرم
یتونجه قافلیه مستقیم یول گلرم
.
الیم یته سیزه گر بیرده مهربان عمه
داخی ئولونجه من آیریلمارام بیر آن عمه
.
عزیزیدیم عجب عالمده خوار و زار اولدوم
حسینه بیر گلیدیم من اسیر خار اولدوم
.
دولاندی گون قاباقیندا گھی او سینه ده آه
گتوردی خار مغیلانه گه او چولده پناه
.
بویاندا بو بالانون دوندی قانه گوز یاشی
او سمتده دایانوب نیزه ده حسین باشی
.
ویرنمیوب حرکت نیزیه گروه دنی
آغیرلاشوب سر سبط شهنشه مدنی
.
دونوب او قانلو گوزیله باخوب دالی طرفه
اشاره ایلدی بیر ماجرای پراسفه
.
که یعنی صبریمی بیر غملو ماجرا آلوری
دوشوب یول اوسته منیم بیر گوزل بالام قالوری
.
محبت عالمینون ترکین ایتمرم هرگز
بالام تاپولماسا بو چولده گیتمرم هرگز
.
او حالده متوجه اولوب خانم زینب
بو سرّدن ایدوب احساس واردی بیر مطلب
.
یانوب اورکدن او دم جام چشمی قان ویردی
اسیره قزلارا بیر بیر یول اوسته سان ویردی
.
گوروب تمامیسی حاضردی غم لری چوخدور
حسین یتیمه لریندن ولی بیری یوخدور
.
بولوب یول اوسته دوشوبدور دیلینده داد و فغان
او نازنین بالا چولده قالوبدی سرگردان
.
پوزولدی حالی وقاریله دختر زهرا
او حالده ایلدی ساربانه بیله ندا
.
.
قطاری ساخلا گونوز گوزلریمده تار اولدی
کسیلدی طاقت دل سلب اختیار اولدی
.
قطاری ساخلا حسین باشی نیزه ده دایانوب
دونوب یولا نگران شاه تاجدار اولدی
.
او بیر باخیشدا بیان ایلوری دوشوب بیر قز
قالوبدی چولده یقین تیره روزگار اولدی
.
تاپولماسا او بالام گیتمرم بو صحرادن
گرک تاپام گورم هاردا غمه دچار اولدی
.
الى اوزولدی ئلیندن ک مال حسرتیله
بو چولده قافله عشقدن کنار اولدی
.
برهنه پائیله ایمدی صاقا صولا گیتدی
لطیف ایاقلارینون آلتی زخمدار اولدی
.
ایاقلاریندان آخوب قان قدم گوتوردوقجا
بویاندی دامنۀ دشت لاله زار اولدی
.
بولنمورم که قالوب هانسی خاره دالدالانوب
خزان او نوگل نوخیز نوبهار اولدی
.
هزارۀ چمنیدی حسینیمون او بالا
گوروم هایاندا دوشوب لال اول هزار اولدی
.
بولنمورم که او آهو باخیشلی کبک خرام
هایاندا دوشدی اجل دامینه شکار اولدی
.
صاقا صولا دولانوب ایمدی عمه جان سسلر
کیم اول یتیمه قزا یار و غمگسار اولدی
.
دیَندَه عمه اونون گلمیوب سوزونه جواب
نجه دوتولدی نه اندازه بیقرار اولدی
.
یقین که قلبینه قان دامدی خوف و وحشتدن
بسان لاله دل زاری داغدار اولدی
.
حسین عزیزه سی یالقیز وسیع بیر صحرا
هارا دایاندی ایشی هاردا خوار و زار اولدی
.
اوقدر ایاقلارینون قانی گوزیاشی یرده
آخوب گیدوب او سوسوز دشت چشمه سار اولدی
.
گونون حرارتی چول ایسی آه آتشبار
کباب ایمدی سوسوزدان او گلعذار اولدی
.
او بیر بالادی حسین گلستانینه گلیدی
چمندن آیری دوشوب هم نشین خار اولدی
.
حجاز عزیزه سی آیریلدی اوز قطاریندن
عراق دشتی او شوریدیه حصار اولدی
.
.
دیوب بلالی خانم بسکه دلنشین سوزلر
ایدوبدی خلقه اثر اشگیله دولوب گوزلر
.
همین او حالده سردار لشکر منفور
تاپا او خردا قزی زجری ایلدی مأمور
.
دیر که راوی تانوردوم او سست ایمانی
بولوردوم اینجیده جاق گر تاپا او نالانی
.
او ظلمی بولمدیم اول طفل زاره زیبنده
گیدنده گیتدیم او ملعونیلن مَعاً منده
.
همین گلن یولا ایتدوق دوباره دن رجعت
او قزی تاپماقا ایتدوق او چولده جدّیت
.
او نازنین بالانی تاپدوق اوزگه حالیله
یوموشدی عارض گلفامین اشگ آلیله
.
فشرده خاطریدی حالی چوخ شکسته ئیدی
زبس دوللانموشیدی یورقونودی خسته ئیدی
.
دوتولموش ابر تک آغلار قالان گوزی واریدی
بیان ایدیدی اگر دیلده چوخ سوزی واریدی
.
بوغاز بیچیلدی زبسکه واریدی شرم و حیا
اورکده ساخلادی دردین دینمدی ابدا
.
بیزی گورنده باخوب چشم اشگباریله
سلام ویردی ازلده بیزه وقاریله
.
که یعنی منده بولون اهل دین و قرآنم
حجاب اهلیم عصمتلیم مسلمانم
.
جفا بساطینی زجر ایستدی اودم قورسون
شقاوتیله او بیکس قالان قزی وورسون
.
دیدیم بساط جفا بیله قورما ای ظالم
اوتان یتیمه دی بو طفلی وورما ای ظالم
.
یتیمه دور آتاسیز دور بونون غمی چوخدور
ایله یارالیدی قلبی که مرهمی یوخدور
.
گورنده رأفتی مندن او چرخ عفته ماه
جفای زجر شقیدن منه گتوردی پناه
.
پناه گتدی سخیلدی رکابیمه او بالا
مباد زجر ووروب طاقتین الیندن آلا
.
دیدیم هراس ایلمه قویمارام سنی وورسون
گل جمالوی باد ستمله سولدورسون
.
سنی گوزتلوری هم عمه هم باجون هم آنان
تیکوبله یولارا گوز انتظاریله نگران
.
یورولموسان سنی گل ترکیمه سوار ایلیوم
قبیله وه یتوروب کسب افتخار ایلیوم
.
بویوردی من گل گلزار عصمتم یاشیخ
جهاندا صاحب ناموس و عفتم یاشیخ
.
آتام حسیندى جده م دی حضرت زهرا
بابام علی ولی جد اطهریم طاها
.
عفیفه پردۂ ناموسدن کنار اولماز
یول اوسته ترکینه نامحرمین سوار اولماز
.
محال دامن نامحرمه اوزانسون الیم
سیز آت سورون سیزون آردوزجا من پیاده گلیم
.
خیال ایلمیون بیر دقیقه دینجلَرَم
پیاده منده سورونِم سیزیله یول گلرم
.
او باخدی دولدی بیزه، بیز باخوب اونا دولدوخ
سوار حالیله بیر قدر رهسپار اولدوخ
.
او قزدا پای پیاده بیزیله یول گلدی
یول اوسته نه دایانوب نه دوروب نه دینجلدی
.
شکسته دل سورونوردی او ناز پرورده
گلنمدی اوتوروب قالدی لیک بیر یرده
.
دونوب باخاندا نه گوردوم که گوزیاشی آخوری
دولان گوزیله ایاقی یاراسینا باخوری
.
اسیرلیق غمی جانه زبس اونی یتوروب
ایاقلاری الى تیترر ایله اوزون ایتیروب
.
باشیندان آچدی او دم معجرین او بیچاره
الینده پاره لیوب ایلدی ایکی پاره
.
باخوب ایاقلارینا اذن ویردی گوز یاشینا
بیرین ایاقلارینا باغلادی بیرین باشینا
.
ایاقه دوردی یریندن او نازدانه بالا
او حالتیله گینه پاپیاده دوشدی یولا
.
شکسته حالیله اشگین عذاره باغلاردی
یتونجه قافلیه یول گلردی آغلاردی
.
سوروندی گلدی بیزیله اودا او یول اوسته
یتیشدی قافلیه خسته حال و دلخسته
.
دولی گوزیله او عصمت مأب دردانه
دونوب آتاباشینا باخدی بیر یتیمانه
.
یانا یانا او زمان اذن ویردی گوز یاشینا
خطاب ایدوب بو دلیله آتاسنین باشینا
.
.
نه ظلم ایدوب بابا گور سنگدل سپاه منه
که روز روشن اولوب لیلۀ سیاه منه
.
آلوبلا معجر گلدوزیمی جفائیله
آچاندا غارت الین قوم دین تباه منه
.
گورنده ظلمیله گلدوز معجریم آلنوب
ویروبدی قمچی ووران معجر سیاه منه
.
ایدوبله ناقۀ عریانه گه سوار منی
اولوبدی توشۀ ره یولدا رنج راه منه
.
ووروب یخوبلا گھی چولده قالموشام یالقیز
تاپولمیوب اولا بیر کیمسه دادخواه منه
.
ایاق یالین دولانوب چولده دوشموشم دلسیز
کنار خار مغیلان اولوب پناه منه
.
قابار ایاقلاریمون قانی قانلو گوز یاشیم
نشان ویروبدی عیان قانلو بیر میاه منه
.
دولانموشام چولی چوخ صاق صولا سزیلداموشام
ویروب صدا او سزیلتیمدا گُل گیاه منه
.
نقدر آغلاموشام من سزیلدیوب ایاقیم
گوزوم یاشی ایاقیم قانیدور گواه منه
.
گل جمالیم ایله کهربا کیمی سارالوب
که رشک ایدر یوزومی گورسه رنگ کاه منه
.
بویور خانم بی بیمه سالماسون منی گوزدن
نظارت ایلسون اول فاطمی نگاه منه
.
بیر آن غفلت ایده گر خانم بیبیم مندن
آچار جسارت الین سنگدل سپاه منه
.
یقین ووراگر او قدر ئولدوروله یولدا منی
ترحّم ایلمز اشرار کینه خواه منه
.
نقدر دردیم اولا سینه ده گینه آزالار
او قانلو گوزلر اگر باخسا گاه گاه منه
.
محبتون آزالوبدور نقدر یالوارورام
آچوب رؤف گوزون ایتموسن نگاه منه
.
گوزومی اشگ دوتوب یا منیم گوزوم گورمور
بولنمورم ویروب اوز حال اشتباه منه
.
باشون فداسی ندن یوز گوزون کوله بلشوب
باخاندا آرتوروری دلده سوز آه منه
.
وفا سپهرینه بیر اولدوزام یارالی باشون
گونوز گونومدی قرانلوق گجمده ماه منه
.
ئولونجه بو یارالی باشدان آیریلان دگولم
ولو خرابۀ شام اولسا خوابگاه منه
.
پیاده یول گیدرم بیر دقیقه اینجیمرم
به شرط رهبر اولا یولدا رأس شاه منه
.
گورن بو حالیمی ذلّتده بولسه قوی بولسون
بو خط سیرده وار عمده عزّ و جاه منه
.
یازاندا بو سوزی #تائب تشکّریله دیدی
بو خوش بیانی ویروب مقتدر اِله منه
.
ادامه متن در هشتک زیر
#بو_بیر_خبردی_که_نظمه_دوزولدی_عنوانی
.
#راه_شام_تائب_تبریزی
#اولوب_چون_آل_علی_دستگیر_لشکر_شام
#ترکی
.
✍️ #زبدةالاشعار ✍️
.
🆔: @nohe_torki
نظر دهید