اثرات عشق
زبانحال حضرت زینب (س) به باد صبا در خرابه شام
.
✍️ زبدة الاشعار ✍️
.
?: @nohe_torki
.
مرحوم حسینی سعدی زمان
.
او شرح عشقی که گل گلستاندا خاره یازار
اونون نظیرینی یار عاشق فکاره یازار
.
او سرّ عشقی که بلبل یازار چمنده گوله
اونی سرشکیله عاشق وفالی یاره یازار
.
بو درد عشقه دوا یازمیوب خدای حکیم
بو رمزی لاله اودور قلب داغداره یازار
.
هامی فلاسفۀ عالمی اگر یغالار
دیمه بو درده دوا یا بیر اوزگه چاره یازار
.
همیشه لوحۀ تقدیرده قضا قلمی
محبّت اهلینی عالمده بخت قاره یازار
.
سالان مَشقّته فرهادی شور شیرین دور
که بی ستوندا وفا درسی کوهساره یازار
.
عراق دشتینه مجنون سالوب نوای حجاز
گهی وفاسینی گیزلین گَه آشکاره یازار
.
کنار شمعیده پروانه یاندورار پرینی
شکسته دل اودینی جلوه گاهِ ناره یازار
.
حقیقتین اثر نالۀ غم انگیزی
رموز عشقی ائدر اهلینه اشاره یازار
.
اولان مقام همایون عشقیدن آگاه
سوزین گدا کیمی دربار شهریاره یازار
.
مقام عشق حسینیده گور نجه زینب
عریضه بیر یارالی شاه تاجداره یازار
.
ابو تراب قیزی یوز قویوب تراب اوسته
سرشکیله غم هجری ایدر شماره یازار
.
گوزی دوات ، مرکب سرشکی کاغذی خاک
خزان جفاسینی سلطان نوبهاره یازار
.
دیر دوشنده یولون ای صبا بلا چولینه
اوخی حسینیمه زینب اوکی عذاره یازار
.
دی یاتما قبریده دور شامیده خرابیه گل
گور اشک چشمیله زینب نلر جداره یازار
.
خرابه لرده عزیزه قیزین آجیندان ئولور
حیا ایدور دیماقا چهره پرغباره یازار
.
یازار سرشکی یوزینده آجام ، سیلر زلفی
گوزی بو کلمه نی رخسارینه دوباره یازار
.
ئورک داش اولسا دایانماز یانقلی سوزلرینه
سرشک قطره لری طعنه چشمه ساره یازار
.
یتیملوق غمی، غربت، اسیرلیق دردی
هر آه سردیله مین شرح انکساره یازار
.
ئوزی دئمور بُلورم من نه دردی وار بالامین
سالار دله سوزینی قلب زخمداره یازار
.
گورور لباسینی کهنه اوشاقدی غصه لنور
گوزینده قلب سوزین دُر شاهواره یازار
.
اگرچه خوردا اوشاقدور ولیک عاقله دور
اسیر اولانلارا مشق عز و اعتباره یازار
.
سرشک چشمیله تپراقلارا باشی اوسته
علی اکبرین آدین بو ماهپاره یازار
.
بالاسی اوخلانان آهو کیمی رباب ملر
خرابه نی دولانور اسم شیر خواره یازار
.
باخار سکینیه اشکیله دولدورار گوزینی
شرار آهی دل زینبه شراره یازار
.
گورور که درده یتن یوخ علی قیزی کلثوم
عریضه اشکیله عباس نامداره یازار
.
قلم ئورک سوزین ای #سعدی_زمان یازمور
اگر الی یته ششگوشه لی مزاره یازار
.
فشار دهر سنون باخما سیندیروب قلمون
گینه یازانلار ائدر سندن استعاره یازار
.
.
#خرابه_شام
#او_شرح_عشقی_که_گل_گلستاندا_خاره_یازار
#سعدی_زمان
#لمعات_حسینی ص 356
#ترکی
.
✍️ #زبدةالاشعار ✍️
.
?: @nohe_torki
نظر دهید