مقدمۀ خروج آل الله از شام و اربعین
.
بیش از 300 بیت شامل : مقدمه ، شهادت امام حسین (ع) – قتل و غارت و اسارت اُسرا – آزادی اسرا از اسارت – خطاب حضرت زینب (س) به بانوان اهل بیت (ع) – وداع از قبر حضرت رقیه (س) – خطاب فاطمه عروس (س) به قبر حضرت رقیه (س) – زبانحال حضرت زینب (س) بر مزار حضرت رقیه (س) – زبانحال و جواب حضرت رقیه (س) به حضرت زینب (س) – خروج از خرابه – زبانحال فاطمۀ عروس (س) به حضرت زینب (س) در رسیدن قافله به قرب کربلا – سلام دادن امام سجاد (ع) به قبر مقدس امام حسین (ع) – اربعین و شروع زیارت و زبانحال حضرت زینب (س) – زبانحال حضرت زینب (س) – گزارش حضرت زینب (س) از #مجلس_یزید – زبانحال حضرت لیلا (س) در اربعین – #تخلص_حسینی –
..
✍️ زبدة الاشعار ✍️
.
🆔: @nohe_torki
.
مرحوم حسینی سعدی زمان
.
✔️ مقدمه : شهادت امام حسین (ع) – قتل و غارت و اسارت اُسرا
.
او گونکه قالمادی بیر یاور و معینی حسینون
بویاندی قانه جوانان مه جبینی حسینون
.
دایاندی لشگر کوفه مقابلنده او سرور
اوجالدی عرشه اَمِن ناصِرٍ انینی حسینون
.
او خشک اولان دلیله استغاثیه دل آچاندا
گتوردی داده غمی ختم مرسلینی حسینون
.
او قومه گوردی که اتمام حجتی اثر ائتمور
غمیله دولدی دوباره دل غمینی حسینون
.
آتاسی حیدر کرا تک آلوب اَله شمشیر
او چولده برق ویروب تیغ آتشینی حسینون
.
یورولدی ایلدی دعوا دایاندی تا اولا راحت
گتوردی جرئته بو حال اهل کینی حسینون
.
ووربلا آنّینا داش قلبینه خدنگ سه شعبه
ترابه دوشدی آت اوستن بوشالدی زینی حسینون
.
نه سس وئرن سسینه نه هراینه گلن اولدی
ترحّم ایلدی نه قاتل لعینی حسینون
.
یارالی سینه سی اوسته چخاندا شمر او حالی
گتوردی زلزلیه عالم برینی حسینون
.
گئچوب حیاتیدن اجکام دینی ایلدی احیا
اوزیندن اشرفیدی چون بُلوردی دینی حسینون
.
کسیلدی باشی اولوب لاله رنگ قرمزی گول تک
یارالاریندان آخان قانیله زمینی حسینون
.
یارالی پیکری عور اولدی غارت اولدی اساسی
سویولدی البسۀ عالی و ثمینی حسینون
.
لباسلر سویولوب اوچ گون اوچ گئجه ولی عریان
گون ایسّیسینده قالوب جسم نازنینی حسینون
.
یتشدی بجدل او نعش اوسته گوردی عوریدی جسمی
قالور الینده فقط قانلو بیر نگینی حسینون
.
نجه روادی بو یابن الحسن که بیر اوزوک اوسته
گئده فنایه بیر انگشت بی قرینی حسینون
.
هوای نفسیله بیر بند زردن اوتری روادور
جفائیله کسه جمّال ایکی الینی حسینون
.
شهید اولوب اوزی باشی جداده دشمن الینده
دیار شامه گئدوب عترت حزینی حسینون
.
دولاندی شامی بویوندا طناب قولدا دوشاخه
حیالی عترتی اطفال بی معینی حسینون
.
جفای شام تمام اولدی – اولدی غلّدن آزاد
اسیر دشمن اولان زین العابدینی حسینون
.
هله «حسینی» تمام اولمیوب محرّم عزاسی
یتشدی ماه صفر گلدی اربعینی حسینون
.
بیر آیری نحویله گزلین علاقه نی ایله ظاهر
خفاده قالمیا تا بو غم مبینی حسینون
.
✔️ آزادی اسرا از اسارت
.
خلاص دام جفادن اولوب عیالی حسینون
مدینیه گئدیری بیر سوری غزالی حسنون
.
وئروب معاویه اوغلی اجازه کوچ ائده یکسر
دیار شامدن افسرده حال آلی حسینون
.
گتوردیلر حرم عصمته کجاوۀ زرتار
اگر چه غارته گئتمشدی ملک ومالی حسینون
.
باخوب کجاوه لره ائتدی فاطمه قزی شیون
دئدی یتوب بلوسوز گون کیمی زوالی حسینون
.
گئدون یزیده دیون امر ائدیر علی قزی زینب
عزالیدور بلوسن عترتی یارالی حسینون
.
چتین سوار اولا زردوز محمله بو حرملر
هنوز تازه الیندن گئدوب جلالی حسینون
.
گرک قرا چکیله سربسر کجاوه لر اوسته
باخوب هامی بوله لر یاسلیدور عیالی حسینون
.
ولیّةالله صغری سوزیله قاره چکیلدی
که تا سوار اولا اطفال مه جمالی حسینون
.
حسینون آدی دلینده اؤرکده ال گوزی یاشلی
اولان بیر عمر ملول و فسرده حالی حسینون
.
اناث شامی مخاطب ائدوب دئدی گئدیروق بیز
سیزون ایچوزده ولی قالدی بیر مارالی حسینون
.
خرابه ده اونی تک قویمیون قویون منه منت
او قزدی باغ جهان ایچره نونهالی حسینون
.
اولون لیالیِ جمعه او توزلی قبره مجاور
اونون وصالیدی واللهی اوز وصالی حسینون
.
توزین سیلون اولون اللهدان اوتری خیلی مواظب
رضا اولا او رضا اولسا لایزالی حسینون
.
اوزی یتیم اوشاقدور اورکده نسگلی چوخدور
صغیردور اوزی غمده بیوک مثالی حسینون
.
ئولونجه عمّه آجام سسلدی سیزیلدادی یاندی
سیزیلدادیقجا او اوج ائتدی ابتهالی حسینون
.
آجیندان ئولدی دوتولدی بوغازی باتدی صداسی
دل آچدی قرخا یاخین عندلیب لالی حسینون
.
وئروبله سس سسه توپراقلاری سووردولار باشه
مجسّم اولدی اوز ئولماقلقی وفالی حسینون
.
کفن تاپولمادی بیر کهنه معجریله بالامی
مزاره قویدی عیالی باشی بلالی حسینون
.
زیارت ایلیه هر کیم مزار دخت «حسینی»
اولار جزا گونی شامل اونا نوالی حسینون
.
✔️ خطاب حضرت زینب (س) به بانوان اهل بیت (ع)
.
دیوب بو سوزلری گلدی فغان و داد و نوایه
دولاندیروبدی یوزین اهل بیت شیر خدایه
.
بویوردی وقتیدور ای خسته بانوانی حسینون
دیار یثربه گئتسون بو کاروانی حسینون
.
گئدوب جلالیمیز الدن غریب و خونجگروخ بیز
بو شهرده بیلوسوز یوخدی مهربانی حسینون
.
گرک کجاوه نشین ایلیه اوشاقلاری یکسر
اولا بیوکلر اوزی میر رهروانی حسینون
.
نه قاسم و نه ابوالفضل وار نه عون و نه جعفر
نه وار یانوزدا بو گون اکبر جوانی حسینون
.
گرک اوزوز چکه سوز زحمتین بو خردا بناتین
ئولوب بنینی داخی یوخدی پاسبانی حسینون
.
گلنده چوخ یورولوب اینجیوبله بو بالا قزلار
گئدنده راحت اولا بلکه دخترانی حسینون
.
علیّ و اکبرین ایفا وظیفه سین ائده لیلا
حرملره اولا یاور او باغریقانی حسینون
.
سریّه ده ائده اوز اوغلی قاسمین طفندن
او خدمتی که ایلردی اوز زمانی حسینون
.
ئولوبدی قارداشیم عباس سنده ای باجی کلثوم
اونون کیمی بو گون اول یار جانفشانی حسینون
.
مواظب اول یرینی راحت ایله آل علینون
یتوب تمامه داخی عهد و امتحانی حسینون
.
یتوب اسارتیمز باشه قورتولوبدی بلالر
دوباره باشلانا لازمدی عزّ وشأنی حسینون
.
غرض کجاوه نشین اولدی هاشمیه خانملار
جرس فغانه گلوب اولدی نوحه خوانی حسینون
.
باخوب نگوردوله ناگه عروس فاطمه یوخور
دگول کجاوه ده دخت بلا نشانی حسینون
.
✔️ وداع از قبر حضرت رقیه (س)
.
مخدّرات حجازی وئروبله سس سسه بیردن
گلوبله شوره خواتین خاندانی حسینون
.
اوجالدی شیونی عرش برینه آل علینون
فغانه گلدی او بیر دسته موکنانی حسینون
.
کجاوه دن توکلوبلر یر اوست هبرگ خزان تک
سولان جفائیله گلهای گلستانی حسینون
.
محجّباته قیام ایلدی قیام قیامت
دوتولدی گون کیمی اوز شمس آسمانی حسینون
.
که یعنی سیّد سجّاد آیت اللَهِ اکبر
او کاشف دُرِ گنجینۀ نهانی حسینون
.
بویوردی آغلامیون عمّه بسدی باطناً اولدی
بو آغلاماق سبب گریه و فغانی حسینون
.
گئدون خرابیّه شاید اولا خرابه ده باجیم
قویوب خرابیه یوز یکسر آهوانی حسینون
.
نگوردولر دؤشَنوب فاطمه او خرداجا قبره
او حاله شرح وئرر « سعدیِّ زمانی » حسینون
.
✔️ خطاب فاطمه عروس (س) به قبر حضرت رقیه (س)
.
رقیّه نون دؤشنوب قبرینه عروس بلاکش
دیار شامه سالوبدور شرار آهیله آتش
.
دیور نه یاتموسان ای نوگل بهاری حسینون
اولان خرابه ده بیر عمر اشکباری حسینون
.
حسین عزیزه سی محبوبۀ حرایم عصمت
گوزینده نور بصر دلده اختیاری حسینون
.
علیّ واکبرین آرام جانی نازلی رقیه
بلا خزینه سینه دُرّ شاهواری حسینون
.
ایاقه دور یتوب اتمامه شام شوم جفاسی
گئدیر مدینیه شامه گلن قطاری حسینون
.
گلنده شامه منیم باجی هم کجاوه میدون سن
نجه گئدوم وطنه سنسیز ای نگاری حسینون
.
مینوب کجاوه یه عمه آنام باجی سنی گوزلور
تیکوبله گوز یولووا عترت فکاری حسینون
.
نه گورموسن قوری یرلرده بو خرابه ده آخر
سولان سموم جفائیله گلعذاری حسینون
.
ایاقه دور ایکیمیز ال اله وئراق گئداق ایندی
مباد یولدا قالا چشم انتظاری حسینون
.
جهازسیز دوه چوخ قورخودوب گوزووی گلنده
چوخ اینجیدوب سنی اعدای کین شعاری حسینون
.
اودور که گئتماقا مایل دگولسن ای گل زیبا
منیم تک اولماموسان یا که بیقراری حسینون
.
کجاوه وار باجی عریان دوه دگول بیزه مرکب
مدینه تک گئنه وار عزّ و اعتباری حسینون
.
دگول شکسته و بی پرده قاره پرده سی واردور
هامی کجاوه سینون اهل بیت زاری حسینون
.
نه شمر وار نه سنان وار نه تازیانه ووران وار
حسین گوللرینون یوخ یانندا خاری حسینون
.
آچوقدی قوللاریمیز باغلاموبلا گلدیقیمیز تک
دونوبدی گوردوقون اوضاع روزگاری حسینون
.
علیل قارداشیمون وورمیوبلا بوینونا زنجیر
اولوبدی غلّ دن آزاد او یادگاری حسینون
.
رقیّه جانینه وئرّم قسم «حسینیه» یارب
عنایت ایله که قسمت اولا مزاری حسینون
.
الیندن آلما بو توفیقی بیرده عمر طبیعی
کرامت ایله اولا ماجرا نگاری حسینون
.
✔️ زبانحال حضرت زینب (س) بر مزار حضرت رقیه (س)
.
رقیه قبرینون اوستونده بانوان دل افکار
گورنده فاطمه نی باشلیوبلا ناله خانملار
.
او توزلی قبری خواتین دین آلوبلا آرایه
گلوبله هر بیریسی بیر دیلیله داد و نوایه
.
او قبری باغرینا باسدی علی عزیزه سی زینب
زبانحالیله گویا اولوبدی کاشف مطلب
.
بویوردی یاتما دور ای عمریمون نهالی رقیّه
اولوب مدینیه عازم علی عیالی رقیّه
.
باشی بالی بی بون توزلی قبریوه اولا قربان
اسیر شمر ستمگر باشی بلالی رقیّه
.
چخا محالیدی نسگللرون ئولونجه یادیمدان
گورم نقدر بو دنیاده ماه و سالی رقیّه
.
سنی بو شهریده صیّاد مرگ دامه سالوبدور
بلا کمندینون افسرده دل غزالی رقیّه
.
قالوبدی بسکه “من عمّه آجام” سسی قولاقیمده
بئله گمان ائدورم آغلوسان یارالی رقیّه
.
معاینه گورورم قویموسان یوزوی ترابه
ابوتراب عزیزی باشی قرالی رقیّه
.
قابار ایاقیله ویرانه ده بالا سورونورسن
غبار چولقالیوبدور او مه جمالی رقیّه
.
قولون طناب کسوب آغلوسان سیزیلدسان اما
شکسته نی کیمی چخمور سسون نوالی رقیّه
.
بو قدر نسگلی حلّ ائتمرم مزاره آپارّام
آناما عرض ائدرم دلده کی ملالی رقیّه
.
اوزی غریب مزاری غریب دشمن ایچینده
حسینیمون وطن آواره سی مارلی رقیّه
.
کفن تاپولمادی جسمون قزیم مزاره قویاندا
قطیفه اولمادی الدن گئدن جلالی رقیّه
.
مگر چخار بو یادیمدان منیم که بیر قره معجر
خرابه ده کفن اولدی سنه عزالی رقیّه
.
حسینیمون گولی شهر مدینه بلبلی سن
خرابه شامی مکان ائتمه کربلالی رقیّه
.
مدینیه گئدوروق دور گئداق خرابه ده یاتما
گلاق دوباره بو شهره یوخ احتمالی رقیّه
.
جهاز سیز دوه ده گلموسن وار ایندی کجاوه
حرم یانیندا دگل شامیان رجالی رقیّه
.
آچوقدی قوللاریمیز باشیمیزه قمچی ووران یوخ
مقدّراتیمیزون باشلانوب مَآلی رقیّه
.
باجیلارون آنان عمَّن گئدولَّه کربو بلایه
یاخونلاشوبدی علی اکبرین وصالی رقیّه
.
گئداق شکایتون ائله آتان حسینه حضوراً
اؤزون جوابینی وئر اولسا هر سوالی رقیّه
.
یوزونده سیلی یرین وئر نشان گوره عمون عبّاس
او باوفانی قضایادن ایله حالی رقیّه
.
وفالیدور عمون عباس انتقامه آچار ال
آجیندان ئولماقوی بولسه گر وفالی رقیّه
.
آتان حسین سنی چوخ سووَر سن ایله وساطت
اولا « حسینیه » الطافینون کمالی رقیّه
.
حوائجین آلا پروردگاریدن اوز الیله
غم و ملایلدن آزاد ائده حیالی رقیّه
.
✔️ زبانحال و جواب حضرت رقیه (س) به حضرت زینب (س)
.
رقیّه نین یری وار قبردن گلیدی صداسی
قابار ایاقلاریمون وار هنوز عمّه ساراسی
.
منی گذشت ائله سون آلِ بوتراب ای عمّه
خوشام مکانیم اولا بو دل تراب ای عمّه
.
قویون قالوم منی ویرانه ده اؤزوز گئدون اما
آتام حضورینه گوزده سرشک ناب ای عمّه
.
گئدنمرم وطنه منده یوخدی تاب و توانا
اسیرلیق غمی قویموبدی منده تاب ای عمّه
.
یوروبلا خسته یم از بس گلنده شامه ووروبلار
هله قولومدا قالور نقشۀ طناب ای عمّه
.
جهازسیز دوه بسکه یخوب یره یوزوم اوسته
هنوز واردی وجودیمده اضطراب ای عمّه
.
هله یوزومده گوزومده قالور نشانۀ سیلی
چکوب جمالیمه سیلی سیه نقاب ای عمّه
.
سالوبلا ات دوشینه باشیمه ووربدولا قمچی
باشیم ایاقیم اولوب قانیله خضاب ای عمّه
.
یورولموشام یاتوم آسوده قوی خرابه ده باری
اولوب منه بیلوسن ظلم بیحساب ای عمّه
.
دیار شامه گلندن قالوردوم آجو گئجه گوندوز
گورنمدی ایلیم من دویونجا خواب ای عمّه
.
او قدر زحمتیمی چکموسن که ایمدیده سندن
خجالتم من محزون و دلکباب ای عمّه
.
ئولونجه نازیمی چکدون خرابه ده ائوون آباد
یتیم داره وئرر لم یزل ثواب ای عمّه
.
همیشه خوش دلیله دیندیردون آغلامیوم من
گوزوم وئرنده نشان بارش سحاب ای عمّه
.
گئدون رقیّه نون اللهی سیزلره اولا حافظ
ئولونجه گورمیه سزو رنج و پیچ و تاب ای عمّه
.
ولیک کرب و بلاده چخاتمیون منی یاددان
منه که اولمادی قسمت مزار باب ای عمّه
.
آتام حسینه منیمده سلامیمی یتورون سیز
ائدون بو توپراق اسیرینده کامیاب ای عمّه
.
دیون عزیزه قزون گلمدی خرابه ده قالدی
یزیدین ائتسون ائوین منتقم خراب ای عمّه
.
اسیره باجیسین ائتسه سوال قارداشیم اکبر
منیم دیلیمجه بو نوعیله وئر جواب ای عمّه
.
علی علی دئدی ئولدی باجون خرابه ده آخر
باش اچدی لیلی یولوب زلفینی رباب ای عمّه
.
کفن تاپولمادی اؤز کهنه معجری کفن اولدی
او معجری که چوروتموشدی آفتاب ای عمّه
.
✔️ خروج از خرابه
.
چخوب خرابه دن القصه بانوان حجاز
حریم شاه و خواتین پردۀ اعزاز
.
گلوب کجاوه نشین اولدی عترت نبوی
قاباقدا سیّد سجّاد حجّت علوی
.
مدینه سمتینه یولّاندی بانوان حسین
جرس نوایه گلوب اولدی نوحه خوان حسین
.
بیوک لرین بالالار اولدی زیب آغوشی
بشیر او قافله نین باشدا اولدی چاووشی
.
جگر یارالی اؤرکلرده نالۀ جانکاه
چخوبلا شامیدن آغلار گوزیله آل الله
.
سرشک گوزده نوا دلده خوش هوا باشدا
هوای یثربیله شوق کربلا باشدا
.
بشیره ایلدیلر التجا فغانیله
دولوب اؤرکلریمیز لخته لخته قانیله
.
غبار چولقالیوب قلب هاشمیّاتی
سرشک دیده گرک پاک ائده بو مرآتی
.
کدورت غمی بو آل مصطفادن آپار
بیزیم قطاریمیزی دشت نینوادن آپار
.
اَوامِرِ حرمی ایلدی بشیر قبول
ائدوبله بیر نچه گون طیّ راه آل رسول
.
✔️ رسیدن قافله به قرب کربلا
✔️ زبانحال فاطمۀ عروس به حضرت زینب
.
زمان صبحیدی بیر گون باشی بلالی عروس
گلوب کجاوه ده فریاد ائتدی آه و فسوس
.
مخاطب ایلدی اوز عمّه سین او بخت قرا
بو دللریله خطاب ائتدی زینبه گویا
.
یتوب بلا چولونه یوخسا کاروان عمّه
مشام جانه گلور نکهت جنان عمّه
.
صبا یلی گتورور عطر چین و مشک خطا
ختن ده یوخدی بو عطری وئرن نشان عمّه
.
دگول بو مشک خطا عطر زلف اکبردور
وئرور بو قالب بیروحه تازه جان عمّه
.
نسیم صبح اسور مژدۀ وصال وئرور
بُلور فراقه داخی بیزده یوخ توان عمّه
.
بویور بشیره بیزیم ساخلاسون قطاریمیزی
بو یر او یردی بابام وئردی امتحان عمّه
.
ائدوبدی لیلی مجنون نمانی استقبال
یارالی پیکریله اکبر جوان عمّه
.
آنام ربابه خبر وئر که لایلای دئسون
گلور قولاقیمه اصغر سسی عیان عمّه
.
یتشمشوق بیله معلوم کربلا چولونه
گوزیمده جلوه لنور عالم نهان عمّه
.
معاینه گورورم قتلگهده محشردور
بابامی دوره لیوب قوم کوفیان عمّه
.
قلج ووران گئدیری داش ووران هجوم ائدوری
یارا ووران او شهه وئرموری امان عمّه
.
یارالی سینه سی اوستونده شمر دون اوتورب
سِنان الینده گزور دوره ده سنان عمّه
.
باشین کسن نه اوتاندی اناسی زهرادن
حیا نه ایلدی جدّیندن اوخ ووران عمّه
.
بو یر او یردی بیزی سویدولار اراذل شام
جفا الین حرمه آچدی شامیان عمّه
.
بو یر اویردی بیزیم خیمه گاهیمیز یاندی
اوجالدی آل علیدن گویه فغان عمّه
.
بو یر اویردی بیزی آت قباقینه سالدی
آپاردی صاق صولا اعدا دوان دوان عمّه
.
بو یر او یردی که بیر گوشواره اوستونده
یتشدی صدمه یخلدیم آپاردی قان عمّه
.
بو یر او یردی بیزیم غارت اولدی معجریمیز
تالاندی کسوت زردوز و پرنیان عمّه
.
خدادن ایسته سنی قارداشون حسین جانی
خلاص غمدن اولا «سعدیّ زمان» عمّه
.
چوخ ایله لطف، سیزه تا چوخ ایلسون خدمت
چوخ عمر ائدوب چوخ ائده گوز یاشین روان عمّه
.
ز بس بو سوزلر ائدوب فاطمه قزین بی تاب
گلوب تکلّمه علیا جناب وئردی خطاب
.
قزیم نه بُلدون اَله گلدی دلده کی مقصود
بو یردی کرب و بلا جلوه گاه حیِّ ودود
.
جواب وئردی که السّاعه عمّه محملده
آپاردی هوش منی فکر ماسلف دلده
.
بو دشت پرخطری دولدوروبدی گوردوم نور
او نور ائدوب بو بیابانی رشک وادی طور
.
نه نور جلوه لنور جلوۀ جمال الله
او نوردور که اونا محو اولوبدور آل الله
.
باخاندا گوردوم آتامدور جمالی جلوه لنور
ولی نحالیله گوز گورسه گوز یاشی اَلَنور
.
گویون ستاره لرین زخم جسمی سان وئروری
یارالیدور یارالار چشمه چشمه قان وئروری
.
یارالی پیکریله اگلشوبدی دلخسته
بیر آلتی گوشه لی پر گرد و خاک قبر اوسته
.
مقابلنده جوانان هاشمی یکسر
دوروبلا منتظرِ امر سینه ده اللر
.
اولوبلا محو تماشا جمال انورینه
تیکوبله گوز آتامین چهرۀ منورینه
.
گلوب تکلمه ناگه او شاه غم لشگر
بیوردی قارداش ابوالفضل اوغول علی اکبر
.
بو سرزیمنه گلور شامدن پریشان حال
دایانمیون ائدون آل علینی استقبال
.
وفالی زینبیمی منده سرفراز ائدورم
اوزوم او عصمت کبرانی پیشواز ائدورم
.
بو سوزلری ائشیدوب زینب اولدی غرق ملال
دونوب امام زماندان ائده بو سرّی سوال
.
باخاندا گوردی دگول ناقه ده امام علیل
دوروب او دشتیده بیر یاندا فخر آلِ خلیل
.
✔️ سلام دادن امام سجاد (ع) به قبر مقدس امام حسین (ع)
.
ووروبدی قولتوقینا اللرین امام انام
وئرور بو دللریله شاه کربلایه سلام
.
سلام اولا سنه ای وارث کرام بابا
سلام اولا سنه ای شاه تشنه کام بابا
.
سلام اولا سنه ای وارث صفیّ الله
سلام اولا سنه ای وارث نبیّ الله
.
سلام اولا سنه ای آیریلان عیالیندن
گوی اهلینی گتورن نالیه ملالیندن
.
سلام اولا سنه ای کائناته فُلکِ نجات
ائدن سفینه سینی قانه غرق قوم طغات
.
سلام اولا سنه ای وارث خلیل بابا
محبّت اهلینه راه حقه دلیل بابا
.
سلام اولا سنه ای یاندیران خیامین عدو
بالالاری داغیلان کوه و دشته چون آهو
.
سلام اولا سنه ای وارث کلیم الله
کلیمی نوری ائدن لَن ترانیه آگاه
.
سلام اولا سنه ای وارث دم عیسی
غلام درگهی یوز مین مسیح و مین موسی
.
سلام اولا سنه ای دم وئرن مسیحایه
یارالی باشی گئدن نیزه ده کلیسایه
.
سلا اولا سنه ای جسمی اوخلارا آماج
بُراقی نیزه کسوک باشیله ائدن معراج
.
سلام اولا سنه ای ختم انبیا اوغلی
عزیز آلعبا فخر ماسوا اوغلی
.
سلام اولا سنه ای کوی عشق قربانی
جبینی پارچالانان سنگیله آخان قانی
.
سلام اولا سنه ای سبط حضرت یاسین
ووروب شکست ایلین خیزران ثنایاسین
.
سلام اولا سنه ای مرتضی علی اوغلی
سلام اولا سنه ای قدرت جلی اوغلی
.
سلام اولا سنه ای یادگار شیر خدا
آتاسی شیر اؤزی شیر دل دم هیجا
.
سلام اولا سنه ای مُهجه قانی گوز یاشی
آتاسی شیر خدا تک قلجلانان باشی
.
سلام اولا سنه ای نوردیدۀ زهرا
سلام اولا سنه ای رختینی سویان اعدا
.
سلام اولا سنه ای یادگار آلِ عبا
سلام اولا سنه ای جدّه سی خدیجه ، بابا
.
سلام اولا سنه ای حقّه عاشق جانباز
سلام اولا سنه ای مُحیییِ زکاة و نماز
.
سلام اولا سنه هر دهرده دوا نامی
کسوک باشیله جداده اوجالدان اسلامی
.
سلام اولا سنه ای حق بولوندا قانه باتان
سلام اولا سنه ای کربلا یرینده یاتان
.
گوروب او حالیله زینب امام سجّادی
اوزین کجاوه دن آتدی اوجالدی فریادی
.
✔️ اربعین و شروع زیارت و زبانحال حضرت زینب (س)
.
حسین تربتینون عطرین آلدی چکدی فغان
اوجا سسیله دئدی عطریوه باجون قربان
.
گوروب بو حالتی نسوانِ هاشمیّه تمام
کجاوه دن توکلوبلر قیامت ائتدی قیام
.
ایله توکولدیله برگ خزان کیمی نسوان
باخان دیردی اسوب گلستانه باد خزان
.
دلیمده یوخدی توانا او حاله شرح وئره
معاینه گویون اولدوزلاری توکولدی یره
.
همان او گونکه گوروندی بو ماجرا بو نوا
دوتولدی شوریله یتمیش ایکی شهیده عزا
.
همان او گون حرمین محشر مبینیدی
عزیز فاطمه نین اوَّل اربعینیدی
.
او پر خطر چوله گلمیشدی دلده ناله و آه
حسین زیارتینه جابر ابن عبدالله
.
بویوردی جابره میر هدا امام اُمَم
گلوب بو چولده دوتا آلِ مصطفی ماتم
.
دویونجا آغلامیوبلار بولار ئولنلرینه
ووروبلا قمچی ائدنده نوا بدنلرینه
.
گلوبلر ایندی دویونجا سرشک ریز اولالار
بو توزلی قبرلر اوستونده ساچلارین یولالار
.
بیر ارعین دور اولوبلار بلالره صابر
گوتور آداملاریوی گئت کناره یا جابر
.
که قالماسین بو قبورین یانیندا نامحرم
گلوب بو قبرلر اوسته دؤشَنسون اهل حرم
.
علی عیالی گلور باش آچوب ساچین یولسون
مدینه دن سنیله کیم گلوب کنار اولسون
.
امامین امرینی ائتدی قبول او نیک شعار
آداملارین گوتوروب قبرلردن اولدی کنار
.
اولان جفائله بیر دسته زارو دلخسته
گلوب دوشندیله بیر آلتی گوشه قبر اوسته
.
باخوب گوروبله که یوخ دور و برده نامحرم
تمام باشلارین آچدی مخدّرات حرم
.
ساچین یولان باش آچان داد و آه و ناله ائدن
بیر عالم اولدی که اوج ائتدی گوگلره شیون
.
او قزلاری که اولاردور شفیعۀ محشر
قیامت عالمینی ظاهر ائتدیلر یکسر
.
بیری دیردی گوزوندن ایراق بابا دشمن
بو چولده معجریمی آلدی جان وئرن گون سن
.
بیری دیردی گوزوندن ایراق سپاه شریر
علیل قارداشیمون ووردی بوینونا زنجیر
.
بیری دیردی بیزیم سینه میزی داغلادیلار
قولومیزی سپه شام و کوفه باغلادیلار
.
بیری دیردی قولومی چوخ اینجیدوبدی طناب
هله یاراسی قالور ایلیوب منی بیتاب
.
بیری دیردی ووروبلار دوشاخه و زنجیر
دوشاخه نین باباجان ایمدیده یری اینجیر
.
بیری دیردی کنیز ایسته دی منی شامی
مگر دگولدی کفایت اسیرلیق نامی
.
بیری دیردی بابا یاخشی موقعِگِله دور
بیری دیردی ایاقیم هنوز آبله دور
.
بیری چکردی فغان کوفه ده اسارتدن
بیری دیردی امان شامده شمادتدن
.
بیری دیردی آلوب تازیانه طاقتیمی
بو قبره ساخلامیشام دلده کی شکایتیمی
.
بیری دیردی گرک باشیمه سپم توپراق
باجیم آجیندان ئولوب شامیده گوزوندن ایراق
.
اولوبلا هر بیری بیر نوع کاشف مطلب
گلوب تکلُّمه ناگه علی قزی زینب
.
✔️ زبانحال حضرت زینب (س)
#اسیر_شام_و_مدینه_غزالیام_قارداش
.
دئدی حسین سنه قربان اولا بلالی باجون
گلوب زیارتیوه شامدن یارالی باجون
.
اسیر شام ومدینه غزالیم قارداش
ئوزوم علی قزی یاسلی عزالیم قارداش
.
دیار کوفه و شام و حلب مُسافِریَم
ایاقه دور نجه گور ماجرالیم قارداش
.
گیدوب جلالیم الیمدن حسین باشیم آغاروب
دینمورم نجه باشی بلالیم قارداش
.
سزادی دولسا نوائیله نینوا دشتی
من آغلیاندا، که نی تک نوالیام قارداش
.
اسفلی شکوه لریم واردی مخبر شامم
شکسته دور ئورگیم نینوالیم قارداش
.
گیدنده نعشیوی عریان قوم اوسته گورموشدوم
کفنسیز اولماقیوا دفن، حالیم قارداش
.
ئوزون بُلوردون او گون باشدا معجریم یوخودی
او عذرین ایمدیده غرق ملالیم قارداش
.
یارالی گون قاباقیندا سنی قویوب گیتدوم
هله او گیتماقین افسرده حالیم قارداش
.
خانملیق ایلدیقیم کوفه ده نَلَر گوردوم
باشون گوروردی نجه ابتلالیم قارداش
.
یارالی باشیوی شمر ایتدی بیر گئجه مهمان
اودور بیر عمریدی گریان لیالیم قارداش
.
گلنمدیم او گئجه من یانان چادردِیدیم
آنامدا گوردی نه سوز خفالیم قارداش
.
سنون یرون او گجه خیلی نامناسبیدی
اودور من ایندیده رنج و عنالیم قارداش
.
صباح اولاندا باشون پیشوازیمه گلدی
بُلوردی مملکت عشقه والیم قارداش
.
گلنده سن دانیشوردوم کجاوه ده گوردون
که نطقده نجه حیدر مثالیم قارداش
.
دیردی کوفه لیلر مرتضی علی دانیشور
اودور دئدیم او علینون من آلیم قارداش
.
باشون او گون منه گوستردی ایله لطف و نوال
که حشر اولونجا رهینِ نوالیم قارداش
.
او زینبم منی گون گورممیشدی بی پرده
هامی بُلوردی آنام تک حیالیم قارداش
.
سنون محبّتون ائتدی اسیر سالدی چوله
محبّت عالمینون مه جمالیم قارداش
.
هارا گیدوب باشون آردینجا گئتمیشم منده
مقام عشقیده باخ گور وفالیم قارداش؟
.
آپاردی مجلس عامه بیزی زیاد اوغلی
گوره گوره باشی قاندان حنالیم قارداش
.
اسوبدی باخمادی گلزاریمه سموم خزان
تصوّر ائتمدی عصمت نهالیم قارداش
.
دانیشدیروب منی ووردی دوباره دیل یاراسی
بیان ما وَقَعه نطق لالیم قارداش
.
باشون دالنجا دوشوب شامه گئتمیشم بیر باش
رموز عشقده مجنوندان عالیم قارداش
.
وروبدیلار او قَدَر تازیانه کعب سنان
هنوز جسمیمه باخسان یارالیام قارداش
.
دولانمیشام باش آچیق شامیده محلّه لری
خیال ائدردی گورن لااُبالیم قارداش
.
گیرنده شامه منه نامناسب آد دیدیلر
بُله بُله که پیمبر عیالیم قارداش
.
دولاندوروردولا کوچه به کوچه قول باغلی
خیال ائدردیلر چین و خطالیم قارداش
.
توکردیلر باشیما کول دویردیلر بی جرم
گمان ائدردیله جُرم و خطالیم قارداش
.
گونوم او شهریده بختیم کیمی دونوب شامه
اگر چه شمس حیا، مه لقالیم قارداش
.
باشیمدا قمچی یری معجریم کیمی قرالوب
ایکی قرائیله باشی قرالیم قارداش
.
پوزوب خیالیمی بیر نحویله خرابه غمی
دینمورم بوقدر وار خیالیم قارداش
.
او قدر صبر ائلدیم صبر مندن اولدی ملول
بو یولدا گور نه شهامت نمالیم قارداش
.
دایانا بُلمدیم اما یزید بَزمینده
سبب او بزمیدی چوخ غمفزالیم قارداش
.
اگر او مجلسین اوضاعینی «حسینی» یازا
اونا بُیوک صله ویرّم سخالیم قارداش
.
✔️ گزارش حضرت زینب (س) از #مجلس_یزید
.
امان یزیدین الیندن امان یارالی امان
یارالی قلبیمی ایلوب او شرب مجلسی قان
.
سنون دوداقلاروی چاک چاک ائدنده آغاج
یاخامی پارچالادیم اولدی طاقتیم تاراج
.
یارالی باشیوه گه باخدی گولدی ایچدی شراب
گه ائتدی قانه دونن قلبیمی ستمله کباب
.
قمار اویناماقا اولدی کفردن طالب
باشوی دوگدی اولاندا حریفینه غالب
.
یارالادی دوداقون خیزران او مجلسده
منیم سرشگ تریم اولدی قان او مجلسده
.
او قدر صبر ایلدیم تنگه گلدی مندن صبر
ولیک غم منه ویردی تکان او مجلسده
.
یاخامی چاک ائلدیم من معاویه اوغلی
ووراندا لبلریوه خیزران او مجلسده
.
کنیز ایستدی بیر سوگلی قیزون شامی
یوزومه خون دل ائتدیم روان او مجلسده
.
دلیل عقلیله آیات نصّ و محکمیله
یزید کفرینی ائتدیم عیان او مجلسده
.
اولیدی کاش قلج اَلده قارداشیم عباس
منه دینده او ظالم یامان او مجلسده
.
نه دل یاراسی منیم ووردی قلبیمه گوردون
که چکدی اهل حرم الامان او مجلسده
.
باشی آچوق بیزه تختین دالندا یر وئردی
باخوردی عترتیوه شامیان او مجلسده
.
باخوب عیالیوه بیر بیر سوروشدی آدلارینی
بیزه شماتته آچدی زبان او مجلسده
.
شراب مجلسی پیغمبر عترتی باش آچوخ
ویروب عیالون عجب امتحان او مجلسده
.
بیری دوتوب یزوه ینگین بیری سالوب زلفین
اوز عصمتین هامی وئردی نشان او مجلسده
.
قویولدی خارجی آد جدّیمی نشان ویردیم
ترحم ائتمدی اسلامیان او مجلسده
.
بنی امیّه نی قرآنیله مجاب ائتدیم
گلوب مروّته انجیلیان او مجلسده
.
حمایت ایلدی بیز اهل بیته نصرانی
یزیده ائتدی تعرّض هامن او مجلسده
.
هدایت ایلدی باشون قبول ائدوب اسلام
شهادتیله اولوب کامران او مجلسده
.
او مجلسین ستمین «سعدی زمان» یازما
اولوب علی قزی قدّی کمان او مجلسده
.
✔️ زبانحال حضرت لیلا (س) در اربعین
.
او آلتی گوشه لی قبر اوسته گوردیلر لیلی
علیّ اکبری وار اوخشاماقه چوخ میلی
.
ایاق طرفده قویوبدور یره یوزین آغلور
یانقلی دیللریله قلب عالمی داغلور
.
ایله سزیلدیری بی خانمان اوغول آناسی
باخان بُلر که الیندن گئدوب جوان بالاسی
.
یواش یواش دیور ای قلبیمون توانی اوغول
مگر بالا بیله گوزدن سالار آنانی اوغول
.
بو توزلی قبریوه قربان اولا آنان لیلا
ایاقه دور که گلوب قامتی کمان لیلا
.
نجه دیوم که بو یوللاردا اهل کوفه و شام
نه ظلم ائدوبله نجه گوندزوم اولوبدور شام
.
بو قدر وار که جفائیله قوم سفیانی
اوغول گوزوندن ایراق چوخ دوگوبله لیلانی
.
بو رسمدور که تسلّی ویره لَّه ثکلایه
ولیک چالدیلا کف اهل کوفه لیلایه
.
دینده ای وای اوغول وای آخاندا گوز یاشیم
دچار اولوردی اوغول تازیانیه باشیم
.
دوگولموشم دئمورم قامتیم کمانه دؤنوب
وار اوزگه سرّی گوزوم یاشی بیله قانه دؤنوب
.
نه چکمیشم اونی بیر خالق رقیه بولوب
خرابه لرده عزیزه باجون آجیندان ئولوب
.
گلنده من بو چوله عزّتیله گلمیشدیم
جلال و دبدبه و شوکتیله گلمیشدیم
.
بو چولده اولدی ولی ظلم بی حساب منه
باشی قرالی الی بوش نجه گئدوم وطنه
.
سنی مدینه نین اهلی سوال ائتسه اگر
نجه دیوم که سوسوز وئردی جان علی اکبر
.
.
✔️ #تخلص_حسینی
.
«حسینی» بسدور آز آغلات آناسی زهرانی
مطوّل ایلمه قیل مختصر بو طغرانی
.
بیر اوغلی اکبره وئر آند بیرده زهرایه
باجیسی زینبه بیرده عیالی لیلایه
.
سنی بو قدر اطبّایه ائتمسون محتاج
تئز ایلسون اوزی بو درد بیدوایه علاج
.
عزیز فاطمه ای مظهر صفات خدا
بش آیدی بیر مرضیم وار نه آدی وار نه دوا
.
سیزون قاپوزدا یوزی قاره بیر قولام امّا
نقدر من پیس اولام یاخشیسوز سیز ای مولا
.
اولا اولا سیزه مستخدم ای کرم کانی
روادور اولمیا دردیم اولاندا ، درمانی
.
سنی قسم وئرورم زینبیله زهرایه
سنی قسم وئرورم اکبریله لیلایه
.
عنایتون بو سگ روسیاهه قیل اظهار
آقالیق ائت منی فوراً بو دردیدن قورتار
.
.
#کوچ_شام
#اربعین
#سعدی_زمان
#او_گونکه_قالمادی_بیر_یاور_و_معینی_حسینون
#اسیر_شام_و_مدینه_غزالیام_قارداش
#لمعات_حسینی ص 377 الی 401
#ترکی
.
✍️ #زبدةالاشعار ✍️
.
🆔: @nohe_torki
نظر دهید