شهادت حضرت زهرا (ع)
#گریز به #کوچ_کربلا
.
✍️ #زبدةالاشعار ✍️
.
🆔: @nohe_torki
.
مرحوم نادری میانجی
.
او گون که دار فنانی وداع ایدوبدی بتول
اولوبدی موج غمه غرق دودمان رسول
.
.
اوچوبدی طایر غم بوش قالوبدی بیت حزن
فضای یثربی دولدوردی آه و درد و محن
حسین عزایه باتوب قاره پوش اولوبدی حسن
یتیشدی بارش غم ابری زینبون گوزینه
یتیملگین توزی قوندی حسن حسین یوزینه
.
.
سنیق قولیلا شکسته دلیله جسمی نزار
اگر چه ئوز وطنیدی اولوب غریبه مزار
ایدوبدی پیک اجل دخت مصطفانی شکار
جهان قرا گینوب دوشدی شور واهمیه
عزا دوتوب هامی عالم جناب فاطمیه
.
.
قالوبدی ورطۀ ماتمده شیر لم یزلی
دوباره بیکس اولوب شیر کرد گار جلی
حسن حسین ایکی قیز قالدی بیر جناب علی
وفات فاطمه مشگل ایدوب علینون ایشین
حقوقی غصبدی ظُلّام الینده خانه نشین
.
.
گجه زمانی کومک یوخ اولوبلا دلخسته
سویوندوروبلا او خاتونی تخته نین اوسته
غریبلر کیمی غسل ایلوبله آهسته
شرار آتش غم قلب حیدری دَلدی
جنازه اوسته او وقته حسن حسین گَلدی
.
.
حسن دیردی حسینون امید ایوین یخما
اوشاقدی دیندیر اونی قلبنی آنا سخما
حسین دیردی سوزومدن منیم آنا چخما
محبت آتشینه قلبیمی آلیشدیر آنا
منی چوخ ایستیوسن گر منی دانشدر آنا
.
.
بو آز زمانیده دویماز جوان آنا بالادان
کیچیک اوشاقه چتیندور یتیم اولا آنادان
آنا محبتین اولماز اوشاق آلا آتادان
قولون سنقدی دیمم دور منی قوجاقیوه آل
ولی شکسته قولون بیرده آچ بو بوینوما سال
.
.
سن اولماسون دئ کیمون سایه سینده دالدالانیم
کیمون امیدینه یثرب ایچینده آرخالانوم
آناسیز ایتمه منی باشیوه آنا دولانوم
سن اولماسون کیم اولار باشیمی دیز اوسته آلا
سیلوب گوزوم یاشنی بوینوما قولونی سالا
.
.
حسینوم منی گل ایتمه بو زمانه ده خوار
گیدوبدی جدّیم الیمدن سنه گمانیم وار
آناسیز اولسا اوشاق رنگی گل کیمی سارالار
یاتار آنالی اوشاقلار آنا قوجاقنده
آناسیز اولسا قالار کوچه لر بوجاقنده
.
.
یتیم اولان اوشاقین دهرده یوزی گولمز
آناسیز اولسا اونون دردین اوزگه لر بیلمز
نقدری آغلاسا بیر کیمسه گوز یاشین سیلمز
توجهون منه یوخدور سولان بو کوکبه باخ
دوروب یانوندا الى قولتوقندا زینبه باخ
.
.
یتنده سوز بویره زینب اول وفا کانی
قوجاقلیوب بالاجا قیز آناسی زهرانی
یانوخلی دیللریلن آغلادوبدی دنیانی
دیدی بلالی باشیم دوشدی غملره ایوای
جوانلقندا سولان گل لری آنام لالای
.
.
اولوم ملالیوه قربان بلالیسان مادر
وطن غریبی اولوبسان هارالیسان مادر
قوجاقلیوم نجه نعشون یارالیسان مادر
حسن حسینله کلثوم ایستیور آناسین
آنانین اولسا علاجی نجه آتار بالاسین
.
.
همان حسیندی که مادر جهانی داغلیاجاق
ئولونجه زینب غمدیده قاره باغلیاجاق
حسینیم آغلاسا گوگده ملک لر آغلیاجاق
گوروبله گلمدی سس توکدی گوزلریندن یاش
جنازه اوستنه آتدی ئوزون ایکی قارداش
.
.
مقاتل اهلی یازوب دوشدی عالمه شیون
گلوب تلاطمه ناگه همان یارالی بدن
معاینه گورونوبدور آچیلدی بند کفن
وروبدی فاطمه اود ئوز دل حزینه سنه
آچوب قولون حسنینی آلوبدی سینه سنه
.
.
بو حالتیله خانم عالمی غمه گتدی
بئشیک کیمی اولاری سینه اوسته ترپتدی
یتیم نوازلقی زهرا حسینه ئورگتدی
سالور خیاله بو سوز کربلا بلیّه سنی
حسین ده آلدى قوجاقه او گون رقیّه سنی
.
.
محرم آیی یتوب اون بیر محرم اولوب
على عیالینه اولگون دوباره ماتم اولوب
سوار ناقه اولاندا قزین بیری کم اولوب
او قیز رقیه ایدی گلدی چیخدی گوداله
قوجاخلیوب یارالی نعشی ایلدی ناله :
.
.
دور ای رقیه نی گوزدن سالان یارالی بابا
بلالی باشیوه قربان اولوم بلالی بابا
باشی جداده گزن جسمی کربلالی بابا
بیزی اسیر آپارور شمر اولوبدی مستحفظ
دیدوم بابامه گیدوم عرض ایدوم خداحافظ
.
.
حجازه سروریدون ای بابا تلون واریدی
رقیه آدلی سنون بیرجه سؤگلون واریدی
گجه گورنده باشون یوخ ولی الون واریدی
ندندی گلشن دینه خزان یلی اَسدی
باشیوی شمر کسوب بس الیوى کیم کَسدی
.
.
رقیه دور سنه مهمان ، گوب ایا شه دین
بو رسم دور که قوناقه ایده له خوشگلدین
قوناقوین نه دی علت سوروشموسان دردین
بدنده یوخدی سنون صاف یرون هاروندان اؤپوم
اجازه ویر بابا قلبونده کی یاروندان اؤپوم
.
.
نه گوندی من گورورم نفرت اولسون ایّامه
نه ال قالوبدی نه باش وار نه باشدا عمامه
قوجاقه آلمیاسان گیتمرم بابا شامه
خیال ایتمه سودان اوتری باشون اوسته گلم
سو ویردیلر بیزه سندن صورا سوسوز دگولم
.
.
خیامدن بورا قاچدوم دوشوب قزون دلدن
آماندی شمر گلور ویرمه فرصتی الدن
منی قوجاقلا دوشور آیری بلبلون گلدن
سالوبدی یاده حسین اوندا فاطمه آناسین
او قطع اولان الی گتدی قوجاقلادی بالاسین
.
.
اوشاقلقندا حسینه غم و محن واریدی
ولی آناسینه کافورلن کفن واریدی
حسینون اوندا نه چوخ نازینی چکن واریدی
آیردلار آناسیندان اونی بهانه ایله
ولی رقیّه جدا اولدی تازیانه ایله
.
.
او وقته شمر یتوب مقتله شقاوتلن
حسین نعشنه قمچی وروب عداوتلن
گوروب رقیه نی ویرمز حسین بو حالتلن
بیر آیرى فکره دوشوب کینه تخمنی اکسین
وورا رقیّه نی بلکه حسین الین چکسین
.
.
بو نیّتیله الین ایلیوب هوایه بلند
آتا او طفلی همان تازیانه ایله کمند
تحمل ایلمیوبدور امام غیرتمند
کسیک بوغازدان ایله سس گلورحزین سویلر :
بالانی گل آتا یانینده وورما ای کافر
.
.
دیردی ظالم اوتان ظلم نقشه سین قورما
بو طفل بیکسیله گل مقابله دورما
آنام شبیهیدی چوخ ایسترم اونی وورما
جهاندا دام اولان آهویه دام قورمازلار
بو قدر بیل که صغیر و یتیمی وورمازلار
.
.
بلی حسینون اگر ئولدی ناتوان آناسی
مدینه ئوز وطنیدی على کیمی آتاسی
ولی رقیّه آتاسیزدی دوغرانوب باباسی
ئوزی اسیر و غریب ئولکه ده وطن یوخدی
باباسی قوملارین اوسته قالوب کفن یوخدی
.
.
بوشرحی نادری ختم ایله یاز بیر آیری رقم
جناب فاطمه نون چکدیگی بلایه قسم
ئور کده تاب و توان قالمادی دایاندى قلم
فقط بو گوز یاشیدور روز حشره سرمایه
بیزی باغشلا خدایا جناب زهرایه
.
.
.
#فاطمیه_نادری
#فاطمیه_شهادت
#او_گون_که_دار_فنانی_وداع_ایدوبدی_بتول
#ترکی
.
✍️ #زبدةالاشعار ✍️
.
🆔: @nohe_torki
نظر دهید