پندیات در مذمت دنیا
…
کربلایی محمدرضا صادقی « شیدا »
…
اگر اولیدی بیزیم بو جهانه دقتیمیز
بو قدری اولمازیدی محنت و مصیبتیمیز
فنادی ، عاقبتی یوخدی کیم گلوب گئتدی
بو حتمی سوزدی که واردور بیزیمده فرقتیمیز
وفاسی یوخدی قیلوب کیمسیه وفا بو جهان
ئولومدی آخری ، کور ائتمسه جهالتیمیز
قالان دگول بیزه بو شهرت و مقام و جلال
نجور گلوب گئده جاقدور بو جاه و عزّتیمیز
مقام و ثروت الونده سنون امانتدور
که بیر گونی کسیلر رشتۀ رفاقتیمیز
بو مال و ثروتی دوز یولدا صرف ایله قارداش
که بهره ویرمیاجاق سوندا کی ندامتیمیز
حلال اگر اولا واردور حسابی محشرده
حرام اگر اولا وار آتشه قرابتیمیز
قرانلوق ایوده یتیشمز هرایه آگاه اول
نکیر و منکریله وار او یرده صحبتیمیز
گل ای بشر داخی غفلتده یاتما گئتملیسن
کلام حقّیدی وار بیر گونی قیامتیمیز
قالان جهاندا فقط نام نیک دور بشره
گرک بو باره ده اولسون ئورکده نیّتیمیز
نظرده ساخلیاق آللهی بیر بودور شرطی
بیریده خیر ایشه اولسون گرکدی رغبتیمیز
نه ویرسه لر ویره جاقلار فقط بو اعماله
گلوبدی آیۀ « خیراً یره » عبارتیمیز
ئوزون یازان سوزه « شیدا » ئوزون عمل ایله
عمل گورونمسه ویرمز ثمر کتابتیمیز
#پندیات
#اگر_اولیدی_بیزیم_بو_جهانه_دقتیمیز
#محمدرضاصادقی
#ترکی
نظر دهید