در مدح و شهادت امام جعفر ضادق (ع)
.
✍️ #زبدةالاشعار ✍️
.
🆔: @nohe_torki
.
مهدی فعال
.
ایستورم باده ویرام باده ی سرشار اولسا
دیرم سریمی گر محرم اسرار اولسا
ساتارام گوهریمی خبره خریدار اولسا
چوخ سوزوم واردی اگر گوش بدهکار اولسا
اگموری باش قلمیم گر طرفی شاه اولسون
ولی منت چکور آل اللهه مداح اولسون
.
.
اهل بیتین ز ازل تا به ابد یوخدی تایی
هرکیمون نطفه سی پاک اولسا ولایتدی پایی
فاطمه هیأته یوللور بیزی اون ایکی آیی
عالمی مست ائلیوبدور بو شفاخانه چایی
دم دوتور جوشه گلور بند دلی محکملور
حیدره آند ایچرم بو چایی زهرا دملور
.
.
گر مدد ائتسه منه حضرت صدیقه ئوزی
ائدرم صادق آل اللهه مخصوص سوزی
علمه تدریس خصوصی ائلیور قاره گوزی
گجه نی زلفی یارالدوبدی جمالی گونوزی
مکتب فاطمه نون عاشقی ام نوکری ام
لطف حق شامل اولوب حالیمه که جعفری ام
.
.
نیلسون عاشق بیچاره که عاشقدی فقط
هر نه یار امر ائلسه دیل اونا ناطقدی فقط
یاری که عرض ائدورم حضرت صادقدی فقط
انبیا بو شهه نوکرلیقا لایقدی فقط
درگهی حضرت موسانین اولوب مأواسی
تا کلام ئورگده موسایه بونون موساسی
.
.
او کی اولدی قلمی فاتح شمشیر بودور
او کی باخدی سؤزینه وحشی اولان شیر بودور
شیخ اولاد نبی میکده ده پیر بودود
خانه ی دینی ائدن علمیله تعمیر بودور
بودور اول کس که اونا دهریده همتا یوخدی
گونه امر ائتسه غروب ائت سوزینه لا یوخدی
.
.
عالم اول کس دی ئورگشدیقینا عاملدور
منکر نور علی ناره طرف مایلدور
گئتسه گر مدرسه ی حقه گینه باطلدور
شافعی مین ایل اگر درس اوخیا جاهلدور
ئوزینی سن دئمه پروانه ی بو شمع ائلیوب
بو شهین سفره سینون آرتیقینی جمع ائلیوب
.
.
مجلس درسینه علامه لر اولموش راهی
نوری جذب ایلوری هر عاشق خاطرخواهی
واردی صادقده ده شأن أبی عبداللهی
نوه سی عالمه سلطاندی خراسان شاهی
گرچه گونلر قاباقیندا ئوزینون چوخدی غمی
ولی گور اوغلی رضانین نه گوزل دور حرمی
.
.
آه یابن الحسن اسرار نهاندان نه دیوم
آل اطهاره اولان ظلم گراندان نه دیوم
قان اولان قلبیله چشم نگراندان نه دیوم
ظلم منصور او ملعون زماندان نه دیوم
ظلمینی وارد هر دهکده و شهر ائلدی
فاطمه سوگلینه زندگی نی زهر ائلدی
.
.
عمدا ایستوردی اذیت چکه اول آزاده
چکدی یثربدن اونی هی طرف بغداده
یوللار آواره سی اولموشدی او شه دنیاده
من دیوم روضه سن اول آغلاماقا آماده
بیر گجه یاری گلوب قلبینی قان ایلدیلر
پابرهنه باش آچوخ قصره روان ایلدیلر
.
.
او گجه باشینه عمامه قویا قویمادیلار
ائو لباسیله چوله گتدی اونی فرقه ی نار
ریسمانیله قولون جدی کیمی باغلادیلار
شه پیاده؛ هره سی ئوز آتینا اولدی سوار
بلبل علم و حدیثون دیلی سسدن دوشدی
آت دالیجا او قدر قاچدی نفسدن دوشدی
.
.
راوی نقل ایلور امامه غم اوقدر ائتدی اثر
جسمی تحلیله گئدوب گون به گون اولدی لاغر
چوریوب نعشه شبیه اولدی او جسم اطهر
دری قالموشدی او پیکردن او آخر گونلر
قوجا سید داخی نی تک قوری بیر پیکریدی
باخانا غصه گلوردی او قدر لاغریدی
.
.
وار سراغیمده همان شهریده بیر جسم شریف
آدی زهرا بدنی حوریه لردنده لطیف
اوج دوران جوانی ده اوقدر اولدی نحیف
عاقبت اولمادی مسمار یاراسیله حریف
یومدی آخر گوزین اول کالبد حیدره جان
مرتضی عمر بویی سسلدی جان فاطمه جان
.
.
فدکین غصبینه پهلولری مدرک قالدی
بیر گؤزینده خانمون قانیله بیر لک قالدی
یادگاری قیزینا بوقچادا کؤینک قالدی
او که گؤز یومدی داخی شیر خدا تک قالدی
سرنوشتیدی ولی وصلیده سیر اولمادیلار
پای هم حیدریله فاطمه پیر اولمادیلار…
.
.
#صادقیه_مدح
#صادقیه_شهادت
#ایستورم_باده_ویرام_باده_سرشار_اولسا
#ترکی
.
✍️ #زبدةالاشعار ✍️
.
🆔: @nohe_torki
نظر دهید