تنور خولی
.
✍️زبدة الاشعار✍️
?: @nohe_torki
.
مرحوم غمکش
.
ایلیوب خولی منی کوفیه دعوت بو گئجه
گل آنا مطبخه گؤر بزمیمی خلوت بو گئجه
.
میزبانون بو گئجه حرمتی آرتوب منه چوخ
قوناقا خولی تک حرمت ائلین دهریده یوخ
یوخدی دورمده داخی نیزه ویران یا آتان اوخ
یاتموشام بو کولون اوسته ائله راحت بو گئجه
.
سنه بو حالیمی گؤرمک اولاجاق گر چه گران
ولی راحتدی آنا منزلیم اولما نگران
یاتموشام گر چه کول اوسته ولی یوخ یاره ویران
سویموشم راز و نیازه بئله عزلت بو گئجه
.
منی گؤرمک لیگه گلسون آنا لطفیله اگر
سال یولون کرببلا عرصه سینه ایله گذر
گؤر نئجه جسمیم اولوب تیریله پیکانه سپر
پیکریمده نئچه مین واردی جراحت بو گئجه
.
ئولدوروب کوفه لیلر یاوریمی ائللریمی
سولدوروب دست جفا گلشن ارا گللریمی
ساربان ایندی گلوب قطع ائلیوب اللریمی
سالموشام یاخشی اله من ولی فرصت بو گئجه
.
درک ائدنمز شرر عشقی آنا اهل مجاز
دستماز آلمیشام اوردا قیلیرام بوردا نماز
کوللر اوسته ائدورم یاریمیلن راز و نیاز
چون وئروب شمر جفاجو منه مهلت بو گئجه
.
پیشواز ایلیرم من سنی بو باشیمیلن
یوارام مقدموین گردینی گؤزیاشیمیلن
دوشموشم چون آرالی من باجی قارداشیمیلن
گله سن خوشدی ائدم تا سنه صحبت بو گئجه
.
آنا جان قانه بوتون یاور و یاریم بویانوب
یانارام، خیمه لریم آتش جوریله یانوب
قیزلاریم باجیلاریم ناله سی عرشه دایانوب
کربلا زینبیمه اولدی قیامت بو گئجه
.
گل آنا شام غریبانیمی سن ساخلاماقا
وای حسین وای دئمگه نوحه ائدوب آغلاماقا
مطبخ خولیده قانلی گؤزومی باغلاماقا
یارالی اوغلوا قیل مهر و محبّت بو گئجه
.
خوشدی آغوشه آلوب باشیمی لای لای دئیه سن
باخاسان غصّه لی احوالیمه ای وای دئیه سن
گویلوم ایستور منه مطبخده حسین وای دئیه سن
عالمی ایلیه سن غرق مصیبت بو گئجه
.
گئجه نی صبحه کیمین «غمکش» ائدر آه و نوا
واردی قلبینده غمی ایستیور اول درده دوا
گویلو واردی ائله سین بیر سفر کرببلا
قلبی القانه دؤنر اولماسا قسمت بو گئجه
.
#سبک_یارالی_جان_یارالی (4سبک)
.
#تنور_خولی
#غمکش
#ایلیوب_خولی_منی_کوفیه_دعوت_بوگئجه
#نوحه_های_محرم_غمکش
#ترکی
.
✍️ #زبدةالاشعار ✍️
?: @nohe_torki
نظر دهید