زبانحال بانوی باوفا حضرت رباب (س)
در شام غریبان
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
ایچدوم ای سو سنی قلبیم اودی خاکستر اولا
دوشلریمدن صود آخور کاش علی اصغر اولا
.
.
من کچن شب که اونی عاجزیدوم ساخلاماقا
تاپمادوم صبحه کیمی چاره او دیلسیز اوشاقا
یوز دوتوب قبلیه قنداقین اوزاتدوم قاباقا
آرزو سنده یانان خیمه ده الساعه وارام
گلسه آغوشیمه شرمنده لیگیندن چخارام
.
.
سالارام صاق دوشیمه صول دوشیمه من پی هم
وار صودیم هر ایکیسینده دیرم ایلمه غم
صودیم اولمادی کچن شب عوضین بو گیجه ام
قالموسان شدت گرماده دونندن یوخوسوز
یوم گوزون منده یاتوم سن یوخوسوز من یوخوسوز
.
.
الى قویننده قویوب حرمله نون ظلمی منی
نیلمیشدوم بالامی آلدى الیمدن او دنی
نیلورم من بو صودی ایندی که یوخدور امنی
ذرّه قسمت که بو صوددن یوخوموش اصغریمه
قان اولیدی نیه بس دولدی منیم دوشلریمه
.
.
دوشیمون آغریسی مخیمده سالوب پیچ و خمه
دورورام اگلشورم مانعم اهل حرمه
هیچ دیمورسن که گیدم خیمه ده یالقوز ننه مه
ولی من زمزمه ائتدوقجه اوغول وای دیرم
یوخوون وقتیدی گلسون سنه لای لای دیرم
.
.
آلتی آیدور منی راغب ائلمیشدون ئوزوه
قلبیده غصّم اولان وقته باخیدوم یوزوه
بو گیجه هاردا یاتوبسان ننه قربان گوزوه
ایتوروبسن منی اولما یریمی بیلمورسن
یا گورورسن که قرانقدی ایویم گلمورسن
.
.
حقلیسن گلمیسن چون سنی خوش ساخلامادیم
کور اولونجا گرک آغلیدیم اوغول آغلامادیم
الیوی باغلادیم اما یاراوی باغلامادیم
گورمدون منده وفا سینمی ترک ائتدون على
گیتدون اما بیلورم قلبی سنق گیتدون على
.
.
یاره لندون سنی قیتردی آتون خیمه لره
بالام ئولدی دیدی زینب یغشون دور و بره
آغلیون چوللری صودسوز دولانان صودامره
بیلنه بیلمینه غم خبرین تئز یتورون
گیدون اول بوش بشگین گوز قاباقندان گوتورون
.
.
یوزووی گورمگه هر چند ایدوردوم عجله
آنوا اولمادی ممکن باشوون اوسته گله
مهربان عمّه لرون وئردی سنی الدن اله
یارون اوسته آپاروب معجریمی سرمدیلر
قرمزی دو شلوگوی هیچ منه گوسترمدیلر
.
.
سن گیدن وقتیده قربانگهه ای طفل صغیر
رتبه سیز بیر اوشاقیدون غم ایامه اسیر
پیر عشقون قوجاقندان ایلدون سیر کبیر
مرتبون اولدی ز بس بزم شهادتده جلی
آنوون یتمدی دامانوه رجعتدہ الی
.
.
هاردا ای گنج شفاعت سنی شاه ائتدی نهان
یوزوی قویدی قرا تپراقا ای مونس جان
بالاجا قبروی عمّون منه گر وئرسه نشان
قالمارام خیمه ده گلّم اورگیم داغلیارام
صودیمی قبروون اوسته ساغارام آغلیارام
.
.
قوش کیمی خوردا مزاره آچارام شهپریمی
یوممارام صبحه کیمی بو یوخوسوز گوزلریمی
آی باتاندان صورا باشدان آچارام معجریمی
آل قصاصیم دیرم یارب ئوزون حرمله دن
منی بو چولده او ظالمدى الهی مَلَدن
.
.
اولا ایکاش کمان مثلی اونون قدی کمان
آتدوقی اوخ تک اوخا یا که اولا قلبی نشان
بیله اوچ شعبه اوخون زحمتین اوندان وئره جان
اوخ آتانلار گوره مظلوم قانین صاحبی وار
بلکه بوندان صورا دیلسیزلره اوخ وورمیالار
.
.
دیل بیلن رحم ایلیور رسمیدی دیل بیلمینه
چونکه دیل بیلمینون حاجتی وار دیل بیلنه
سنکه دینموردون او ظالم نیه اوخ وردی سنه
هانسی جلادون او قدرتدہ کمان چکدی الى
هانسی طفلون بوغازین اوچ پر اوخ اوچ بؤلدى على
.
.
کاش او پیکان خطاکار دگیدی ئوزومه
سانجلیدی اورگیم باشینه یا صاق گوزومه
سیل خون جاری اولوب قان توکولیدی یوزومه
ئولمگیم چوخ خوشیدی هجروه یانماقدان اوغول
گیجه گوندوز الى قوینوندا دولانماقدان اوغول
.
.
وای قرا بختیمه بوندان صورا احوالیمه وای
وای گوزومدن توکولن اشکیمه اقبالیمه وای
وای الیمدن آلنان نعمت و اجلالیمه وای
وای بو قلبیمده که مرحمسیز اولان یاره مه وای
وای قالان عمریمه ایوای کسیلن چاره مه وای
.
.
«انورا» طاقت انسانی آلان سوزدی بو سوز
ساده دور لیکن أورک پارچالیان سوزدی بو سوز
نوحه خوانلاره اولان ورد زبان سوزدی بو سوز
آغلادان گوزلری سوز یوخ سوزوون نسگلیدور
گوئیا أوغلى ئولن بیر آنانون ئوز دیلیدور
.
.
#شام_غریبان #انور_اردبیلی
#اصغریه_اصغریه_شهادت
#ایچدوم_ای_سو_سنی_قلبیم_اودی_خاکستر_اولا
#یادگار-انور
#ترکی
.
✍️ #زبدةالاشعار ✍️
.
🆔: @nohe_torki
سبک این نوحه آیا تک سینه است ؟