حالات حضرت ابوالفضل (ع)
.
✍️ #زبدةالاشعار ✍️
.
🆔: @nohe_torki
.
مرحوم معزی اردبیلی
.
ای بنی هاشم اَشجَع النّاسی
حیدرین با شجاعت عبّاسی
.
صنعت شاهکار صنعتگر
خلقتون شمع بزم و اجلاسی
.
زادۀ مرتضی سلام الله
دلگشا قامت دل آراسی
.
شخص وارسته و عظیم الشأن
حُسنه آئینه ماه سیماسی
.
ذرّیدہ سرور شهیدانون
گورسنن لوحه سینده امضاسی
.
حامل پرچم رسول الله
قیزلارین عالی رتبه سقّاسی
.
صولتون مثل موج اقیانوس
شهرتون قاف عشق عنقاسی
.
انتخاب ایلیوبدی ماه سنی
آسمانینده نور دنیاسی
.
پرچمون پرچمیدی اوچ گوشه
هفت شکلینده طرح زیباسی
.
هفته گر شهر عشق اضافه اولا
دوز گلور بس بو جمله معناسی
.
پرچمون هفت شهر عشقه علم
شقّه ده کلمۀ فَتَحناسی
.
سایۀ پرچمونده دالدالانوب
اکبرین دلشکسته لیلاسی
.
گلدی گفتاره موقع حسّاس
اَرفَعَ اللهُ رَأیَتَ العَبّاس
.
.
.
کربلا مهد کیمیا گرلر
کربلا مأمن دلاورلر
.
نصب اولوب خیمه گاه هاشمیان
اگلشوب شیر تک مظفّرلر
.
شب عاشور عاشقان گلدی
غسل عشق ایتدیلر مطهّرلر
.
حبّذا سجده گاهیده قویولوب
تپراقا صورت منوّرلر
.
مقتدا کیمدی سیّد العُشّاق
اقتدا ایلین پیمبرلر
.
رهبرین امرین ایلیور اجرا
پادگاننده زُبده افسرلر
.
باغلیوب اسلحه سلحشوران
تیز اولور خیمه لرده خنجرلر
.
عشق مشّاطه سی ویرور زینت
بزه نور مصطفایه بنذرلر
.
دخت حیدرده ذرّه واهمه یوخ
جان دیور سسله ننده حیدرلر
.
باغلیوب باشه معجر زربفت
غارته گیتمیوبدی معجرلر
.
سو سراغینده ووردیلار سوسو
گزدیلر ماهتابی اخترلر
.
کربلا نامداری عبّاسه
گوز تیکوب جام الینده دخترلر
.
تشنۀ جام عشقیدور الیاس
اَرفَعَ اللهُ رَأیَتَ العَبّاس
.
.
.
عشق سلطانینه سپهسالار
حامی دین احمد مختار
.
زینبون خیمه سینده تاپدی حضور
من دیدی ای علیّۀ هوشیار
.
آستان بوس شاه تشنه لبم
اولمیشام لطف اوزیله پرچمدار
.
یاری ام جان نثاری ام چوخدان
جاریدور امر حیدر کرار
.
یرلرین گوستروب شهیدانین
باغ جنّتده سیّد الاخبار
.
قولّاریم دوشسه پر گلر منه ده
أوچارام مثل جعفر طیّار
.
زینبا خواهشیم واریم سندن
اولمیشام اهل بیته خدمتکار
.
غملی صحراده یوخدی امّ بنین
ایلورم قلبی مون سوزین اظهار
.
ام کلثومه سن خبر ویره سن
مثل ام البنین منی اوخشار
.
شهر یثربده گورسون عبدالله
باشلیوب ایوده پرمحن گفتار
.
توپ یوزون سیل گوزون دانیشدیراوزون
اولماسون غملی بلبل گلزار
.
نوکرین اوغلی غملی نوکر اولار
گوگلینی آلسون عترت اطهار
.
تز دیدی زینب ای شجاع النّاس
اَرفَعَ اللهُ رَأیَتَ العَبّاس
.
.
.
ای منیم قارداشیم امیر سپاه
عترت بوترابه پشت و پناه
.
ماه رخشندۀ بنی هاشم
زینت محفل جلالت و جاه
.
سوزلرون گتدی قلبیمه هیجان
اولموشام غرق بحر محنت و آه
.
مکریلن گتدی شمر امان نامه
گئتمه دون سیندی مثل هرزه گیاه
.
قولووا قدّووه باجون قربان
نیلرم سالسا تندن اهل گناه
.
سن کیمی محترمدی اوغلوندا
خاطرین ایسترم خدادی گواه
.
الغرض قورتاروب شب عاشور
مغربه گیتدی آسمانیده ماه
.
داغ داشا گلستانه اسدی نسیم
گلشنه چتر زرین آچدی پگاه
.
سسلنوب خاک و باد و آتش و آب
وَحدَه لا إِلهَ إِلّا الله
.
گون چیخوب سالدى داغ داشا نورین
ماهیلن دالدالاندی کلّ ستاه
.
یرده کی شمس و ماه و سیّارات
سیریدن آز قالور دوشه الله
.
ماهین اطرافین آلدی اولدوزلار
گلدی لر نطقه یوزده گوزده میاه
.
باغلیوب نهرى فرقه خنّاس
اَرفَعَ اللهُ رَأیَتَ العَبّاس
.
.
.
سولدولار فاطمه هزاره لری
پوزدولار عرشده ستاره لری
.
قوش کیمی بال و پر آچوب صود امر
آغلادوب حالی شیر خواره لری
.
محضر رهبره وزیری گلوب
یاندیروب عالمی نظاره لری
.
خم ایدوب قامتین سلام ویروب
گلدی گفتاره دیلده یاره لری
.
اذن آلوب سوزلرین بیان ایله سون
قویماسون تشنه ماه پاره لری
.
من دیدی صبر ایدنمورم آقاجان
تشنه دور فاطمه بهاره لری
.
لطف ائله ویر منه اجازۀ جنگ
تپراقا قوی سالوم سواره لری
.
کیم گوروم باغلیوب سویون یولونی
غرق ایدوم قانه هیچ کاره لری
.
اصغرین حالینه رباب آغلار
آختارور طفله راه چاره لری
.
آچدی دیل صحبته امام همام
جنگینه اولمادی اشاره لری
.
قیزلاریم تشنه دور بویوردی حسین
اوجالوب آهینون شراره لری
.
بیر قدر سو گیدوب تهیه ایله
یانماسون قلب پاره پاره لری
.
ظلم ایدوب لشگر خدانشناس
اَرفَعَ اللهُ رَأیَتَ العَبّاس
.
.
.
بو تراب اوغلی بو تراب کیمی
شرقیدن چیخدی آفتاب کیمی
.
سینه سی اَنّی مرکبیدی عقاب
آچدی پر اوچماقا عقاب کیمی
.
تلّیده گورسنوب اباالفضلون
گل جمالینده تر گلاب کیمی
.
اندی میدانه حمله سینده دیدی
گلمیشم جنگه بو تراب کیمی
.
کوفیان چشمۀ حیاتم من
گورورم سیزلری سراب کیمی
.
جنگیمه سعدین اوغلى الساعه
ایلسه ایتسین انتخاب کیمی
.
گر چکم تیغ تیز و آتشبار
گورسنر برقی بیر شهاب کیمی
.
ایلیر مثل ذوالفقار علی
جسموزی آهن مذاب کیمی
.
باشلاروز برگ تگ یره توکولر
یاغدیرار قان یره سحاب کیمی
.
قان ویرور زخمدار پیکرلر
قان آخار نهرلردن آب کیمی
.
بحر ذلّتده ال ایاق چالوسوز
محو سوز عاقبت حُباب کیمی
.
ماسوی زینتی حسین دور حسین
یوخدی باعزّت أُول جناب کیمی
.
بیر اله آلدی خنجر الماس
اَرفَعَ اللهُ رَأیَتَ العَبّاس
.
.
.
بانگ تکبیری دوشدی صحرایه
ایله دی حمله فوج اعدایه
.
شیری روباهیلر گوروب قاچدی
آفرین یکّه تاز هیجایه
.
پرچمین ووردی نهر علقمده
باخدی سقا سویا، سو سقایه
.
مرتضی اوغلونون خیالینده
قیزلارین عکسی دوشدی دریایه
.
گوردی جام اللرینده تشنه لری
ناله لر چیخمیش عرش اعلایه
.
ویرمادی دیل سووا اورک یاندی
مهریدن سالدی صیت دنیایه
.
دولدوروب مشکی نهریدن چیخدی
خضرلر یوز قویوب تماشایه
.
راوی اظهار ایدوب اوزوم واریدیم
اهل کین ال ووراندا غوغایه
.
های و هو قوزانوب چالوبلار طبل
شاد اولوب فرقۀ فرومایه
.
چیخدی بیر یاره لی نیستاندان
روی زیباسی بنذیور آیه
.
یارہ دن قانی، مشکیدن سو آخار
رحم ایدن یوخدی قولسوز اعضایه
.
ساخلیوب سینه سینده پرچمینی
عشقینه پرچمیدی سرمایه
.
یارہ دن زحمت ایلمور احساس
اَرفَعَ اللهُ رَأیَتَ العَبّاس
.
.
.
یتمیوب صدمه و خطر گوزینه
شامون اشراری گورسنر گوزینه
.
آغلا قان یابن العسکری عمووا
جدّوون دولموش اشک تر گوزینه
.
باشینه ووردولار آغیر یاره
قان چکوب پرده سربه سر گوزینه
.
گوزلرین ایلدی هدف اوخ آتان
کول گوروم اولسون اهل شر گوزینه
.
اوخ ووران قصدی یاره وورماقیدی
آتدی، یوخ فرقی دگسه هر گوزینه
.
مقصد اوخ ولی گوز ئوپمگیدی
سالدی الحاصل اوخ گذر گوزینه
.
مرتضی ئوپدوگی گوز اولدی یارا
اولمادی قول دوتا سپر گوزینه
.
ای خدا بیلمورم نجه باخدی
قتلگاهینده گون قمر گوزینه
.
قیزلاری خیمه گاهیده نگران
یوُخ یوخی طفل خونجگر گوزینه
.
اوچ گیجه آغلیوب یورولموشدی
سایه گلمیشدی صود امر گوزینه
.
شعری یاز دمبدم «معزى» دئنن
جان فدا مفخر بشر گوزینه
.
ئوپدی گل صورتین اباالفضلین
آغلادی ایله دی نظر گوزینه
.
ساخلارام من دیدی ئولونجن یاس
اَرفَعَ اللهُ رَأیَتَ العَبّاس
.
.
#عباسیه_معزی_اردبیلی
#عباسیه_مدح #عباسیه_شهادت
#ای_بنی_هاشم_اشجع_الناسی
#ترکی
.
✍️ #زبدةالاشعار ✍️
.
🆔: @nohe_torki
نظر دهید