مدح حضرت امیرالمؤمنین (ع)
.
✍️ زبدة الاشعار ✍️
?: @nohe_torki
.
مرحوم حاج رضا صرّاف تبریزی
.
ای جمالی مظهر آیات کبرا یا علی
وی جلالیندن جلال حق هویدا، یا علی
.
فیض جودوندن وجود ماسوا موجود اولوب
ای وجود ماسوایه، فیض عظما یا علی
.
نور حق آیینۀ ذاتینده اولموش جلوه گر
ای صفاتُ اللاهه مرآت تجلّا، یا علی
.
لوح حسنونده یازیلمیش آیۀ «اللهُ نور»
صورتینده کلمۀ «مشکاته» معنا یا علی
.
سن بو مخلوقاته باب علمی مفتوح ایلدون
شاهدیمدور سورۀ «انّا فتحنا» یا علی
.
الف قدّین خلقه لاء نفی اثبات ایلدی
کلمۀ توحیده سنسن الف الّا، یا علی
.
من نئجه وصف ایلیوم، خالق سنه مدّاح اولوب
دولدوروب قرآنی اوصافون سراپا یا علی
.
کمّ و کیف ذاتیوی درک ائتمز اوهام و عقول
ذات پاکوندور مرکّب دن مبرّا یا علی
.
گر دئیَم ممکن سنه، سن تک بشر ممکن دگول
وَر دئسم واجب، اولور کُفروم هویدا یا علی
.
ایله ممکن سن کی واجبدور وجودون عالمه
ای وجودی علّت غائی اشیا، یا علی
.
نار قهروندن اولور نار جهنّم شعله ور
نور مهروندن دولوب فردوس اعلا یا علی
.
پرتو نور جمال بی‌مثالوندان سنون
مقتبس دور آفتاب عالم آرا یا علی
.
ای ولیّ الله اعظم، عالم و آدم سنه
بنده دور، سنسن بو مخلوقاته مولا یا علی
.
خواجۀ قنبر، امیرالمؤمنین، یعسوب دین
فاتح خیبر، شه دنیا و عقبا یا علی
.
ای کلام‌الله ناطق، وی کلید «کُنتُ کَنز»
آشکار اولموش سنیله گنج اخفا یا علی
.
باب شُبّیر و شُبَر، ابن عم خیرالبشر
صاحب محراب و منبر، زوج زهرا یا علی
.
ای دُر بحر شرف، شاهنشه ملک نجف
سرّ حق سندن اولوب عالمده پیدا یا علی
.
پادشاه کون امکان، جسم مخلوقاته جان
سرور مردان، امیر ملک بطحا یا علی
.
قدرت الله حجت الله جانشین مصطفی
آیۀ رحمت، ولیِّ حیِّ یکتا یا علی
.
عالِمِ علمِ «سلونی» معنی «امُّ‌الکتاب»
واقف اسرار و سرّ لیل «اِسرا» یا علی
.
عروةُ الوثقی یه معنا، تاجدار انّما
قفل گنج «هل اتی» مصداق طاها یا علی
.
ای شه والا مکان، پیوسته ایلر آرزو
درگۀن اسفل مقامین عرش اعلی یا علی
.
آب اولور آتش سر کویون هواسیندن سنین
خاک پایین دیر عجب گوگرد حَمرا یا علی
.
آستانِ درگهِ پاکون چراغان ائتمگه
مشعل خورشید اله آلمیش مسیحا یا علی
.
سن صفی‌اللّاهه وئردون زنگ محنتدن صفا
اسم پاکیندور سنین اسماءِ حُسنی یا علی
.
نار نمرودی ائدیب لطفون خلیله گلستان
پور آذر گورمیوب آذردن اوندا یا علی
.
فُلک محنتدن تاپیب نوح نبی الله نجات
اوندا کیم ائتدی سر کویونده مأوا یا علی
.
سن ذبیح اللّاهه مشق عشقی تعلیم ایله دون
وئرمه میش باشون، آلیب تاجِ «فَدَینا» یا علی
.
حضرت موسایه مولاسن تجلّا ایلدون
نور حسنوندن سنون محو اولدی موسی یا علی
.
اولماسایدی حضرت عیسی ایله همدم دمین
هاردا روح الله ائدردی مُرده احیا ، یا علی
.
قاسم الرّزاق سنسن ، خوان جودوندن سنون
قوم اسرائیله گلدی «منّ و سلوا» علی
.
مهر رویون ائتدی موسی دن ید بیضا عیان
ایلدی فرعونی قهرون غرق دریا ، یا علی
.
میزبان اولدون حبیب اللّهه سن معراجده
دگولم منکر ائدم حاشا و کلّا یا علی
.
نازنین آدون سلیمان ایلدی نقش نگین
اولدی جنّ و انسه هر فرمانی مجرا یا علی
.
بیت الاحزان ایچره سن یعقوبه اولدون هم نفس
محنتِ هجره ائدوب صبر و شکیبا یا علی
.
دولدوروب آفاقه حُسنون صوت «ما هذا البشر»
حُسن یوسف ذرّه دور حُسنون یانیندا یا علی
.
ای جمال الله،جمالون اولسا ظاهر پرده دن
پردۀ عصمتده قالماز بیر زلیخا یا علی
.
هر گوزل معشوقه ، بیر عاشق بیابان گرد ائدوب
سن منی ، فرهادی شیرین ، قیسی لیلا ، یا علی
.
عرصۀ محشرده «صرّافین» یئتیش فریادینه
چون سنون مدحون ائدیر املا و انشاء یا علی
.
مطلب و منظوری شاها التفاتوندور سنون
یوخ یقین کؤنلونده بیر اؤزگه تمنا یا علی
.
فکر و ذکری روز و شبده ، ورد «یامحبوب» اولوب
کیمدی سندن اؤزگه محبوب دل آرا یا علی
.
اؤزی بیر مور مُحَقَّر ، دفتری پای ملخ
چوخ سعادتدور اگر مقبول اولونسا یا علی
.
#حیدریه_مدح
#ای_جمالی_مظهر_آیات_کبرا_یاعلی
#صراف_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید