حضرت علی اصغر علیه السلام
.
✍️ #زبدةالاشعار ✍️
.
🆔: @nohe_torki
.
ابوالفضل عباسی معروفان
.
ای حرمله شرم ایله آهو بالاسین وورما
یوللاردا گؤزی آغلار قویما آناسین وورما
.
دیلسیز بالامی وورسان باشی اوزولر تندن
اوچ پر اوخون آیا کیم باغلار یاراسین وورما
.
.
بیر جرعه سو احسان ائت دین و شرفه خاطر
گل غنچه می سولدورما هرزه علفه خاطر
قوی دیلده آدون قالسین عالی هدفه خاطر
اوچ پر اوخووی گیزلت شاه نجفه خاطر
آیریلسا کمانیندن گر تیر شرر بارین
جسمینده توان قالماز بو طفل لبن خوارین
.
.
ووردون بو اوخون مثلون عباسه او شیریدی
عباس سپاهیمده سالار و امیریدی
سرهنگ کبیریدی غیرتلی وزیریدی
اوچ پر اوخا تاب ائتدی سردار دلیریدی
اما بو زبان بسته اوچ پر اوخا تاب ائتمز
ئولسه بالاسی طاقت واللهی رباب ائتمز
.
.
.
کیم قویسا آدین مؤمن دین و شرفین ساتماز
دنیانی آتار باشدان گردابه یقین باتماز
اوچ گوندی دوداقلاری عطشاندی بالام یاتماز
باخ ! باغلیدی قوللاری والله سنه اوخ آتماز
قرآندان اوتان ظالم گل قدریمی سیندرما
عباسیمی ئولدوردون دیلسیز بالامی وورما
.
.
.
گئت مصحف قرآندا آیاتی مرور ایله
گؤر هاردا یازیب قران هم دینوه زور ایله
ننگین عملیندن گل بیر لحظه خطور ایله
اوچ پر اوخا آماج ایت ئوز نفسوی کور ایله
یوخسا صود امر وورماق لایق دگول انسانه
کافرده کمان آچماز بیر طفل لب عطشانه
.
.
.
آلدیم نه امیدیلن من اصغری مادردن
هم شرم ائلدیم اوندان هم غمزده خواهردن
گتدیم سووا سربازیم سیراب اولا ساغردن
بیر شرم و حیا ایله ظالم قوری لبلردن
ای خانه خراب آخر اصغر سیزه مهماندی
رحمت ائت بیر ایچیم سو ویر ششماهه بالام یاندی
.
.
.
مرغ دل بی تابیم سینمده دوشوب بنده
فکریم بودی لب تشنه اوغلوم قالا ایمنده
اما گورورم یوخدور آثار حیا سنده
مظلوم آناسیندان گل ائتمه منی شرمنده
بو عرصه ده جانیمدن ال چکمگه مشتاقم
یولسه بالام اللرده من یولمگه مشتاقم
.
.
.
یول وئر منه بیر لحظه زهرا آناما خاطر
پیغمبره خاطر یا حیدر آتاما خاطر
سینمده اوغول داغی گیزلین یاراما خاطر
بیر لحظه گیدیم نهره عطشان بالما خاطر
علقمده سودان ایچسون بیر جرعه بالام گلسین
اخیامه گئدیب بلکه گهواره ده دینجلسین
.
.
.
واللهی علی اوغلی بیگانیه یالوارماز
قالماز ئوزی مشکلده چاره یولی آختارماز
سینم گلی رام اولسا غملر سینمی یارماز
قورخما نقدر ایچسه دریا سویی قورتارماز
آغلار گؤزی مخیمده چاره یولومی کسدی
تر اولسا دوداقلاری والله بالاما بسدی
.
.
.
ای مرد قوی پنجه وجدانوی ایت قاضی
قصدوندن اگر دؤنسن اللهدا اولار راضی
سرهنگیمی ئولدوردون گل وورما بو سربازی
گلشنده بوداقیندن قیرمازلا گل نازی
اما بو گل نازه رحمون گؤرورم یوخدی
بیر صودامر آهویه واللهی بو اوخ چوخدی
.
.
.
قالدی سؤزی آغزیندا سلطان سرافرازین
آیریلدی کماندان اوخ ساز ایلدی پروازین
حلقیندن ئوپوب پیکان اول غنچه گل نازین
دوتدی قانینی الده شه خورداجا سربازین
سپدی گویه آهسته حلقیندن آخان قانی
سسلندی قبول ایله الله قوزی قربانی
.
#اصغریه_معروف_اهری
#اصغریه_شهادت
#ای_حرمله_شرم_ایله_آهو_بالاسین_وورما
#ترکی
.
✍️ #زبدةالاشعار ✍️
.
🆔: @nohe_torki
نظر دهید