زبانحال حضرت لیلی سلام الله علیها
.
.
.
مرحوم غمناک تبریزی
.
.
.
ای خدا گورسم منیم تا بیرده جانانیم گلور
ایلرم بو جانی قربان اوزگه بیر جانیم گلور
.
آیریلیق سالدی منی بو درده دلدن دوشموشم
شربت وصلینی ایچسم اوندا درمانیم گلور
.
بو سپهر سینه ده چون گورسنور آی تک یری
گون گیدور یارب هاچان بس ماه تابانیم گلور
.
گویلومی ابر مصیبت چولقیوب آیا نه وار
چوخ دولوب آغلار گوزوم اشکیله بارانیم گلور
.
قوی دوروم بیرجرعه سو گلسه اله حاضر ایدیم
ایندی بو یولدان منیم بیر تشنه مهمانیم گلور
اگلشوب منده زلیخا تک یول اوسته گوزلرم
چون بو گون مصر بلادن ماه کنعانیم گلور
.
تئز یتور یارب منِ نالانه اوغلوم اکبری
گلمسه ایندی اگر افلاکه افغانیم گلور
.
جانینه جانیم فدا من ویرموشم قربان سنه
ایسترم بیرجه گورم نازیله قربانیم گلور
.
ایسترم باشدان ایاقه قانینه غلطان اولا
قانینه باتسا منیمده جوش ایدر قانیم گلور
.
راضیم کسسونله باشین باغلانام زنجیره من
چون او باشیله منیم بیر شدّه مرجانیم گلور
.
ایتمرم مسکن بو یرده اولسا آباد ابد
گیچسه بو صبحوم سواد شام ویرانیم گلور
.
بوردا اگلشدیم نولور من یاسلیام باری دوروم
غم بساطین ساز ایدیم شام غریبانیم گلور
.
بوگجه یاندیرمارام من خیمه گاهیمده چراغ
چون او قانلی نعش اوسته شمع سوزانیم گلور
.
دسته دسته قانلی اوخلار سینه سینده چوخ یاتار
شمع تیریله دولان قندیل الوانیم گلور
.
من اونون «غمناکیم» یارب بیلورسن سن اوزون
آشکار اولموش اورکدن سرّ پنهانیم گلور
.
قبرینه همدم اولان وقته ویروب بیر تازه دم
ایلیوب احیا بو مرده قلبیمی جانیم گلور
.
.
#اکبریه_شهادت
#ای_خدا_گورسم_منیم_تا_بیرده_جانانیم_گلور
#غمناک_تبریزی
#ترکی
#زبدةالاشعار
.
نظر دهید