زبدةالاشعار

ای دشت نجابتده گوزل لاله ی خوشبو #رضویه_سیدبشیرحسینی

مدح و میلادیه حضرت امام رضا علیه السلام
.
✍️ زبدة الاشعار ✍️

?: @nohe_torki
.
سید بشیر حسینی میانجی
.
ای دشت نجابتده گوزل لاله ی خوشبو!
وی ملکِ کرامتده اولان، دردلره دارو!
ال مندن اتک سندن او پاک آدیوه قوربان
ایله نظر ای یار علی نام و نبی خو!
یاضامن آهو! یاضامن آهو!
.
.
بو گونده آقا! قلب پیمبر سؤینیبدی
هم فاطمه هم حضرت حیدر سؤینیبدی
شکر ایلوب آتان موسیِ جعفر سؤینیبدی
فرمایش ائدیبدیر ائویمین زینتیدیر بو
یاضامن آهو! یاضامن آهو!
.
.
تا ئوپدی ایاقوندن او گون خاکِ مدینه
بیر اؤزگه صفا تاپدی دلِ پاکِ مدینه
یادلاره دوشوبدور شهِ لولاکِ مدینه
دیللرده او دم ازبر اولوب آیه ی صلّوا
یاضامن آهو! یاضامن آهو!
.
.
اُول گونده یقین یثرب اوشاقلاری سؤیندی
گوللر کیمی گول آشدی دوداقلاری سؤیندی
نجمه آناوین عرشی قوناقلاری سؤیندی
تبریک دییرکن دئدیلر شوریله «یاهو»
یاضامن آهو! یاضامن آهو!
.
.
اولجاق آنادان وردون اولوب جمله ی تهلیل
جدّون آدینی ذکر ائدوب ائتدون اونی تجلیل
اُول ذکرلرون اولدی علی آدیله تکمیل
دانماز بونی نه گبر و نه ترسا و نه هندو
یاضامن آهو! یاضامن آهو!
.
.
اُول لحظه کی گلدون بیزیم ایرانه طرف سن
وئردون قدمونله بو بویوک مُلکه شرف سن
ایرانّیلارا آیینه ی شاه نجف سن
سن سن بوتون عاشقلره هر باره ده الگو
یاضامن آهو! یاضامن آهو!
.
.
گول، گول یوزیوی گوردی یوزیندن مثل اولدی
دعبل، سنه سوز قوشدی سوزیندن مثل اولدی
آهو، گوزیوه باخدی گوزیندن مثل اولدی
بو عاشقیده باری حساب ایله بیر آهو
یاضامن آهو! یاضامن آهو!
.
.
دیل، اُول در و درباریوه عاشقدی رضاجان!
گون، گورملی رخساریوه عاشقدی رضاجان!
قلبیم قوشی، قوشلاریوه عاشقدی رضاجان!
بیر گوشه ده قیلاّم اودی قُمری کیمی کوکو
یاضامن آهو! یاضامن آهو!
.
.
سقّاخاناوین قطره سینی زمزمه وئرمم
عشق اهلی بیلر ارزشی چوخدور کمه وئرمم
حتّی حرمون عکسینی مین عالمه وئرمم
حوریلر ائدیر صحنینی مژگانیله جارو
یاضامن آهو! یاضامن آهو!
.
.
عشق عطرینی بو میهنه سن لطف ائلیوبسن
بو طبع روانی منه، سن لطف ائلیوبسن
شعریمده کی دُوز وار، یئنه سن لطف ائلیوبسن
لطفونله آخور طبع روانیم ائله بیل سو
یاضامن آهو! یاضامن آهو!
.
.
قمدا صله می دولتِ معصومه دن آلاّم
قبرون ایینی تربت معصومه دن آلاّم
من حاجتیمی حضرت معصومه دن آلاّم
بنزر کرمینده سنه البتّه بو بانو
یاضامن آهو! یاضامن آهو!
.
.
گون چیخجاق اونون گنبدی اوسته شاخور آقا!
آیینه لی صحنی سنه ساری باخور آقا!
هجرونده یئنه باجوون اشکی آخور آقا!
باخ، مشهده ساری باخوری مثل پرستو
یاضامن آهو! یاضامن آهو!
.
.
تاپشور باجیوا سالمیا گوزدن بو حقیری
چون باب حوائج قیزیدی یوخدی نظیری
لطفیله سالار دیللره او، شعر «بشیر»ی
سیزدندی نه واریمدی منیم ای شه مه رو!
یاضامن آهو! یاضامن آهو!
.
.
#رضویه_مدح
#رضویه_میلادیه
#ای_دشت_نجابتده_گوزل_لاله_خوشبو
#سیدبشیرحسینی
#ترکی
.
✍️ #زبدةالاشعار ✍️

متن پیشنهادی:  گل آچدی سؤلدی فصل خزان گلدی گلمدون #مهدیه_کریمی_مراغه_ای

?: @nohe_torki

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی