زبدةالاشعار

ای دل تفکّریله بو کون و مکانه باخ #مناجات #حصنی_خویی

توحید
گریز به وداع امام حسین (ع)
.
✍️ #زبدةالاشعار ✍️
.
🆔: @nohe_torki
.
مرحوم میرزا محمد حسین حصنی خوئی
.
ای دل تفکّریله بو کون و مکانه باخ
اوضاع عالمه بو نظام جهانه باخ
.
بیر آفتاب انوره بیر ارض هیئته
هم سیر شش جهانده بیر آسمانه باخ
.
افلاک سبعه سیرنی ایت بیر دقیق وار
سیاره و ثوابت اولان اخترانه باخ
.
واردور قوای جاذبه و دافعه میان
هیئت ده بیر علوم بدایع نشانه باخ
.
جوّ سماده گور متحرک کواکبی
بو باره ده تأمل ایدوب منصفانه باخ
.
اوز خلقتونده ایله تفضّل ملاحظه
قابل حواس باطنه فکر وگمانه باخ
.
صحن و چمنده کاج و صنوبر ده ایله فکر
موزون قامتیله او سرو روانه باخ
.
انواع گللره که اولوب رنگ مختلف
زیبا بنفشه یاسمن و ارغوانه باخ
.
هم عطر دلپذیر ریاحین و اطلسه
فکر منوّریله گل و گلستانه باخ
.
ترتیبله گورنلری گور، هم معادنی
فیروزه و زبرجد – عقیق یمانه باخ
.
انواع میوه لر هره سی رنگ رنگ ،خوش
اولموش مناسبتله فصول اوانه باخ
.
لازم دوشوب یقین که اثردن مؤثره
بوخلقت عظیمدن اول لامکانه باخ
.
عقل تمیز حاکم مطلقدی بوسوزه
بیر التفات حاصله شرح و بیانه باخ
.
معمارسیز بناء رفیع ، امر دور محال
عقلی دلیل امر ایلین کن فکانه باخ
.
واضح کلامدورکه طبیعتده یوخ شعور
بعض اختلاف عادته فصل زمانه باخ
.
هر بیر وجود ثابت ایدر فاض موجدی
ایجاد ایدن عدمدن حقِ مستعانه باخ
.
هر قوّۀ ضعیف حکایت ایدر صریح
ذی قوّه واردی ، فوق قوا، دوستانه باخ
.
ابر کرمده کیمدی قویان بو تحرّکی
باران فیض جوده گوزوم مشفقانه باخ
.
برگ درخت نکتۀ توحیدی فاش ایدر
ممتاز عقل و هوشله ، وصفِ لسانه باخ
.
اظهردی امر حضرت باری مثال شمس
ای اهل حق بو عالم آرا منکرانه باخ
.
بومطلبی صراحتله تقویت ایدر
کرب و بلا وقایعی امر کرانه باخ
.
قاطع دلیل امر شهادتدی بر ملا
یتمش ایکی نفرده او فکر نهانه باخ
.
مردان آزموده و اشخاص باکمال
شجعان روزگارده مخصوص شانه باخ
.
نه حسّ ایتدیلر که تماماً علاقه نی
مقطوع ایتدیلر ایله بیر امتحانه باخ
.
بیر زاد دوشوندولر که یقین ایتدیلر او جمع
ایثار ایدوبله ماملکی عاشقانه باخ
.
#گریز به #وداع
.
مجموع خاطریله حسینون ودامنی
دلده تصور ایله او أمر زمانه باخ
.
اعوان ناصری هامی جام اجل ایچوب
چکمزله ال او بیکَسِدن کوفیانه باخ
.
دوردی خیم مقابلی چون شاه تشنه لب
ایتسون وداع عیالنی اول مهر بانه باخ
.
اوّل نِداده زینب کبرانی سسلدی
کلثوم هم رقیه نی اوُل باغری قانه باخ
.
بو آخرین کلامدی هم آخرین سلام
بو حرفی استماع ایلین بانوانه باخ
.
چخدی خیامدن هامی بیر اضطرابیله
اطرافین آلدیلار او شهون الأمانه باخ
.
بیر ایله شورش اولدی قیامت نمونه دور
بو حالتی مؤثر اولوب شامیانه باخ
.
اهل و عیالدن مگر آساندى افتراق
بالخاصّه هم سکینه او شیرین زبانه باخ
.
بیر اشکبار چشمله بیر داغلی قلبله
عرض ایلیوب عرایضین أول نازدانه باخ
.
عرض ایلدی بابا بیزی قویما بو دشتده
دشمنده رحم یوخدی دل مشرکانه باخ
.
قیتر بیزی مدینۀ پیغمبره بابا
بو باره ده محل امین و امانه باخ
.
فرمایش ایتدی ای بالا هیهات بوسوزون
ممکن اولان دگل بو بیانِ عیانه باخ
.
گر قویسالار قطا قوشینی هرگز ایلمز
اوز اختیاری ایلن او ترک آشیانه باخ
.
یاندیرما قلبمی بو سرشگ روانیله
حسرتله وار نقدر بو روحیم، بو جانه باخ
.
اول وقتده که قتله یتشدیم بو آغلاماق
اَلزَمدې ایمدی گلمه بو نوعِ فغانه باخ
.
اظهار ایدوبله هر کس او مظلومه درد دل
اشک بصرله زینب بی خانمانه باخ
.
یوخ بیر نفر او جمعه پناه و معین اولا
عورت اوشاقدا جامعۀ بیکسانه باخ
.
الله بُلر او ساعتی بیرده امام اوزی
نه سخت ساعت اولدی شه تشنه گانه باخ
.
یازمور قلم الیمده او شرح قضیه نی
مبهوت محض اولدی بیان و معانه باخ
.
قادر دوزور بو نظم لری «حصنی» ده یازور
منظومی ئیله ناظمه بیرده یازانه باخ
.
#مناجات #حصنی_خویی
#وداع_حسینیه_وداع
#ای_دل_تفکریله_بو_کون_و_مکانه_باخ
#ترکی

متن پیشنهادی:  بابا دایانما داده گل یارالیم یارالیم #اکبریه_صافی_تبریزی

.
✍️ #زبدةالاشعار ✍️
.
🆔: @nohe_torki

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی