زبانحال امام حسین علیه السلام به شمر لعین در قتلگاه
.
✍️ زبدة الاشعار ✍️
?: @nohe_torki
.
مرحوم حاج عبد الرّحیم شباهنگ ( هندی )
.
ای شمر گل باتیرما بو دنیانی ماتمه
بیرده حسین فاطمه گلمز بو عالمه
.
ظالم چکیل کناره که جان اوسته دور حسین
آخر رسول اکرمه وابسته دور حسین
.
باخ گور کیمون باشین کسیسن کیمدی بو غریب
کیمدور بو گلشنی پوزولان بی پر عندلیب
باشدان ایاقه یاره الیندن گیدوب شکیب
کیمدور بو قان ایچینده دوشوب ال ایاق چالان
کیمدور بو تشنه لب قوری صحراده تک قالان
.
هرچند خوش گلور سنه آزار و زحمتیم
گوش ایت که سودمندیدی پند و نصیحتیم
اتمام حجت ایتماق اوچون وار نصیحتیم
بوسینه چوخ یارالیدی ناراحت ایلمه
من ئولمه میش حرملریمی غارت ایلمه
.
ساخلا بو سینه نون ادب و احترامینی
پیغمبرین یاننداکی شان و مقامینی
کفّار بدرین آلما بوگون انتقامینی
بو سینه بوسه گاه رسول الاهدور
هم فاطمه دوداقلارینا جایگاهدور
.
هم بوس ایدردی ذات پیمبر بو سینه دن
هم فاطمه اوپردی مکرر بو سینه دن
هم قان ایچر الونده کی خنجر بو سینه دن
قاتل نه اولدی قتلمه بِل باغلادون بوگون
بیرچوخ یارالی سینه لری داغلادون بوگون
.
ظالم دوشون که من سنه دنیاده نیل دیم
گیچمیش اولان زمانلاری سال یاده نیل دیم
من بی نوا سنون کیمی جلاده نیل دیم
هانسی بنای شرعی حسین پایمال ایدوب
هانسی حرامی خلقه مباح و حلال ایدوب
.
جنّت جوانلاری منه گلگون قبا دئیر
حوران خلد خامس آل عبا دئیر
تاریخ روزگار شه کربلا دئیر
من حضرت خدیجه کبری عزیزیم
صدیقه جلیله زهرا عزیزیم
.
من رهنمای خلقم و نور سعادتم
دریای خون ایچینده چراغ هدایتم
دائم غریق موجم و بی استراحتم
چون کشتی نجاتیده اولاد فاطمه
لازمیدی روز و شب هدف اولسون تلاطمه
.
من کاخ عشقین عشقله بنیان گزاریم
نومیدلر پناهنون امیدواریم
توپراقلار اوستونه دوشه نن خاکساریم
ایستی قوم اوسته باش قویارام پرّ قو کیمی
پیکانی باغریما باسارام آرزو کیمی
.
گوردوم اساس دینی قرین فساد اولور
بی مایه سست پایه و بی اعتماد اولور
شمع امید دست خوش تند باد اولور
ایتدیم حیاتی فدیه ی آئین احمدی
حفظ ایلدیم مبانی دین محمدی
.
باخدیم جهاندا کیمسه ایشیتمز کلاممی
درک ایلمز حقیقت مشی و مراممی
بو صفحه دن قانیله یودوم اسم و ناممی
ال چکدیم هر علاقه دن هر پایبندیدن
گیچدیم بلند و پَستی و پست و بلندیدن
.
چکدیم کناره جامعه دن مرز و حدّیمی
سوق ایلدیم تعادله اوز جزر و مدّیمی
ترک ایلدیم مجاورت قبر جدّیمی
دوتدوم سلوک و سیرده عهد و وفا یولون
بازارجان و مهد روان کربلا یولون
.
دنیاده کیم گوروبدی غزال گریز پا
صیّادین آختاروب دوشه آردینجا پا به پا
من کربلا بساطین اوزوم ایلدیم به پا
صیّاد بی امان گوز آچوب ذوالجلاله باخ
قانی آخان یانقلی باخان بیر غزاله باخ
.
بیر عمردور که من بوگونون انتظاریم
شب تا سحر ستاره شب زنده داریم
چوخ شکری وار که جانه یتوب جان نثاریم
ای جان دایانما گیت چک الون خانمانیدن
گیت بلکه بیر نشان تاپاسان بی نشانیدن
.
باک ایتمرم که بستر تن خون و خاک اولور
رحمت گلنده ابر کرم سینه چاک اولور
قانیم آخار جهان خِرد صاف و پاک اولور
شرع شریفی قانیله جاری ایدر حسین
اسلامی لوثِ کفردن عاری ایدر حسین
.
بیر پادشه یارالی دوشه نیمه راهده
سیل ستم آلوب گوتوره سیلگاهده
مین صفحه غم حکایتی هر بیر نگاهده
عالمده بیر کناره چکن یوخ او بی کسی
امواج خشمگینه قاریشسین حزین سسی
.
بیر برگ زردی خشک ایده گر صَرصَر مَمات
جوی روانه سالسا اونی باد حادثات
بیر چوخ ضعیف موره اولار کشتی نجات
قان ایچره توکدی برگیمی باد خزان زرد
تا کشتی نجات اولا سو اوسته برگ زرد
.
تار ایتمه سون غبار سفر رنگ آلیمی
قان چشمه سی آخوب یودی راه وصالیمی
تاپدیم مقام قربده حدّ کمالیمی
ذرّات چون کماله یتر آفتاب اولار
درویشه درد و محنتلن فتح باب اولار
.
شاهد سن ای عوالمون الله اکبری
ویردیم سنون یولوندا جوان اوغلوم اکبری
من اوز گوزومله گوردوم او گیسوی عنبری
دوشموش نظامدن دوشنوب سطح سینیه
باد صبا یرین ویروب آه سکینیه
.
باخدیقجا اوغلومون او ایپک گیسواننه
که لابه لا یاتوب بولانوب ایسّی قاننه
قلبیم یانوب آلیشدی قسم نازلی جاننه
بو درد بیشمار که یوز دوندروب منه
بیر لطفدور که فضل خدا گوندروب منه
.
ویردیم بو یولدا وارلیغیمی احتشامیمی
دنیای آرزونی جهان خیالیمی
عباس نامداریمی بیکس عیالیمی
هرچند یالقوزام داغیلوب یارویولداشیم
تک باشنه شریعته رونق ویرر باشیم
.
گئت زینبون گوزونده سرشک سجابی گور
طغیان سیل الینده تلاش حبابی گور
باخ سینۀ خراشده چنگ ربابی گور
برپا اولوب قیامت کبری خیامده
بیر جرعه سو نه مشکده واردور نه جامده
.
یازدیم نگاره گرچه ستم چوخ یترمنه
اولسا اگر الیمده قلم اوخ یترمنه
عزّ قبول و گرمی پاسخ یترمنه
شادم کمال لطف و عنایتله گَل دیدی
تیز ویر اگر الونده قالوب باش و ال دیدی
.
بیر خلوت ایسترم آچا طومار رازیمی
شرح ایلیم حدیث نشیب و فرازیمی
هر کلمه اوستونه توکیم اشک نیازیمی
یوخدور کفن حضورینه خلعت گییم گیدیم
بیربیر حکایت غم هجران دییم گیدیم
.
حکم شهادتیم یازلوب چون جبینیمه
قصد خیانت ایلمه گیچمه کمینیمه
ویرم قسم جلالت جان آفرینیمه
قوی آخرین نمازیمی ختم ایلییم گلیم
تا عمریمون ختامینی حَتم ایلیوم گلیم
.
شیر خدا رویّه سینی نشر ایدن منم
خاتم ویروب فقیری جهانبخش ایدن منم
بیر بارماقیله نقش سخا نقش ایدن منم
ویرم کرم الین بو گیجه ساربانیمه
هم خوابگاه راحتی اوز میزبانیمه
.
هندی اگر یوزونده نهاندور رموز غم
نای قلم ده نی کیمی پیدادی سوز غم
آغلا حسینه ایله شبِ عیشی روز غم
گلمیش نشیب شیب گیدوب شادی شباب
ای اشک دیده قویما چکوم منّت گلاب
.
#قتلگاه
#حسینیه_شهادت
#ای_شمر_گل_باتیرما_بو_دنیانی_ماتمه
#هندی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید