مدح و شهادت حضرت امام کاظم علیه السلام
#گریز به زبانحال حضرت رقیه (س) در #شام_غریبان
. ..
..
مرحوم عابد تبریزی
..
ای شهریار مُلک جان وی یوسف زندان غم
چرخ هدایتده یوزون شمسُ الضُّحی بدرُ الظُّلم
..
..
ای آستان عزّتون مسجود سکّان فلک
وی اسم پاکون ذکرینه رَطبُ اللّسان فوج مَلَک
یمن وجودوندان سنون رشک سِماک اولموش سمک
سنسن سبب گر ایلیوب دنیانی حق غرق نِعم
..
..
ره پوی صحرای وفا سرگرم شور عشقسن
سودایی عشق لقا محو حضور عشقسن
مدهوش حُسن یار اولان موسای طور عشقسن
حادث سن امّا سنده وار آثار اسرار قِدَم
..
..
جان و دل اهل دله تعویذ اکبردور آدون
هر قلبیده شور غمون، هر دلده ازبردور آدون
باب الحوائج شهرتون موسی بن جعفردور آدون
بو اسمیده مکتوم دور تفصیل معنای حِکَم
..
..
سنسن هدایت اهلینه هادی عَلی وَجهِ السَّبیل
عطشاندی فیض لعلیوه تسنیم و کوثر سلسبیل
سنسن فروغ لطفیله ظلماتیده خضره دلیل
سنسن کلیمه راهبر سنسن ویرن عیسایه دم
..
..
چوگان عزمونده سنون گوی معلّق نُه طبق
باب جلالون حلقۀ زرّینی ماه متّسق
فیض وجودوندان یتوب دنیای امکانه نَسَق
بو دستکاه محتشم لطفوندن اولموش منتظم
..
..
سن هفت خطّ عزّته میر فلک خرگاهسن
اورنگ مُلک عصمته فرمانرواسن شاهسن
عکس صفات ایزدی مشکات نور اللهسن
سنسن جهان خلقته کهفُ الوری غوت الامم
..
..
تا خلقته تصمیم ایدوب خلّاص بی مانند و چون
آفاقی پرشور ایلدی ترمی لفظ کاف و نون
موج حجاب تیره دن مهر رخون اولدی برون
آئینۀ ایجادیدن پاک ایلدی زنگ عدم
..
..
سندندی هر آزاده لیق درک ایلسه اهل ولا
امّا عجبدور که اوزون اولدون اسیر ابتلا
اولدی نصیبون چرخیدن زنجیر و زندان بلا
سالدی فشاره قلبیوی جور گروه بدشیم
..
..
هر ظلم و هر بیداده سن دوزدون ره جانانیده
پایانه ویردون عمریوی اندوه بی پایانیده
یاد ایلدوقجا حالیوی ظلمتگه زندانیده
تسخیر ایدر دل مُلکینی فوج ملال و درد و غم
..
..
بام و در زندان غم شاهددی سوز و سازیوه
هم آشنادور گوش جان بانگ بیان رازیوه
مجذوبیدی مسحوریدی ذرّات کون آوازیوه
سسلردون اول موقعده که یا ذَالمَعالی و الکرم
..
..
چوخ امتنانیم وار خدا اولدی نصیبیم مدّعا
حال رضا و سِلم ده عشّاقه نعمتدور بلا
بو من بو زنجیر ستم بو گوشۀ زندان سرا
نه نوع شکر ایلوم سنه ای خالق لوح و قلم
..
..
زنجیر کین هرگز دیمم، طوق عبودیّتدی بو
احباب آرا معمول اولان سررشتۀ الفتدی بو
جانیله هم آوازدور قلبیله هم صحبتدی بو
بیجا دگول وار الفتیم هر حلقه سیله دمبدم
..
..
من عرض حاجات ایلرم یاحق دیر هر دانه سی
قلبیمده شور ایلر فزون جانبخش و روح افزا سسی
بیر لحظه اولموب ترک ایده زندانیده من بی کسی
همدمدی جسم و جانیله هر شامگاه و صبحدم
..
..
یوخدور منه همراز اگر بسدور بو سنگین سلسله
منله بیان راز ایدر آوای شورانگیزیله
غربت غمیندن هر زمان دلتنگ اولوب گلسم دله
باشلار تسلّای دله هر گونه آهنگ و نَغَم
..
..
بیر سبحۀ اخلاصدور لیل و نهار اذکارینه
نظم تمامیله دوزوب دست قضا جان تارینه
بیر یاخشی عنواندور منه یار اسمینون تکرارینه
ذرّات جسمیم دل آچوب یاحق دیر چکدوقجا دم
..
..
عاشق اولان بو رسمیدور بیر بزم خلوت آختارار
دلداریله بیگانه سیز هنگام صحبت آختارار
ابراز راز ایتماقلیقا جانانه فرصت آختارار
خلوتسرای انسدور بو یر، نه زندان ستم
..
..
بولمم هارا یتدی جفا ای شهریار انس و جان
بالمرّه تاراج ایلدی قلبوندن آرام و توان
ایلردون اوزگه طرزیله ذکر و مناجاتون بیان
سویلردون ایلردی گوزون دامانیوی اشکیله یَم
..
..
ظلمات بطن حوتیدن ای یونسی آزاد ایدن
سِجن بلادن یوسفی آزاد ایدوب دلشاد ایدن
هر عامله بیر لفظیله امکان ویروب ایجاد ایدن
قورتار بو زنداندان منی یوخ دلده یارای اَلَم
..
..
سیل بلا اولدی روان اقطاریدن ارکانیدن
معمورۀ صبر و سکون ویران اولوب بنیادیدن
آگاهسن دویدون داخی جان و دلیله جانیدن
دل مُلکینی هر سمتیدن دوتدی زبس افواج غم
..
..
هر صحبتیم زندانیده بو اشک طوفان خیزدور
شمع حریم خلوتیم آه شرار انگیزدور
خون دلیله جام دل صبح و مسا لبریزدور
عمر و حیاتیله اولوب اندوه و محنت ملتزم
..
..
شام غم هجرانیده صبح لقانی گوزلرم
جان برلبم اندوهیدن, آرام جانی گوزلرم
مشتاق وصل دلبرم اوغلوم رضانی گوزلرم
شوقیندن آز قالموش اولا بنیان هستی مخترم
..
..
معصومه درد فرقتی ایلوب منی خونین جگر
مرآت دلده آختارار گوز عکس حسنین هر نظر
ایستر صبادن حالینی شوریده دل آلسون خبر
افسوس بو زندانه یول تاپماز نسیم صبحدم
..
..
قویموب وصالونله فلک یتسون قیزون آمالینه
یاندوردی قلبین, جسمینی غرق ایتدی اشک آلینه
شایسته دور بو یرده دل یانسون رقیّه حالینه
تاپدی آتاسین اونداکی ایتموشدی طغیان بحر غم
..
..
بزم لقایه تاپدی یول دویدی ولیکن جانیدن
بو وصل بِالله سختدور مینلر غم هجرانیدن
گوردی شهنشه مصرعی دریایه بنزر قانیدن
توپراقلار اوسته گوئیا نقش غم اولموش مرتسم
..
..
قان بسترینده نازیله سلطان انس و جان یاتوب
موج شفقده گوئیا قرص مه رخشان یاتوب
قان ایچره باشسیز جسمیله شاهنشه عطشان یاتوب
چرخ معلّی دامنین بار غمی ایلوبدی خم
..
..
آخدی سرشکی دامنه، اودلاندی دل، گلدی دله
ویردی اجازه شوریله موج سرشک سائله
سسلندی ای عشقی منه هر یولدا زاد و راحله
قان اولدی قلبیم نطقه گل ای کشتۀ قوم ظُلم
..
..
بو آستان رحمته من بیر امیده گلموشم
وصلون سراغین آلماقا هجران کشیده گلموشم
مخیمده کی دیداریوه من بازدیده گلموشم
دل سوزینی ایلر عیان بو یوزده کی گلرنگ نم
..
..
ای نوح طوفان بلا وی عالمه فلک نجات
ای تشنه لعلینده نهان مین چشمۀ آب حیات
نعشونده قانلی یاره لر ایلور تجلّی چون بنات
امّا شفق رنگ ایلیوب انوارینی سیّاله دم
..
..
هجرون اگرچه تاب آلوب بو خاطر رنجوریدن
امّا وصالون حسرتی گیتمز دل پرشوریدن
تاپدیم دل ظلماتیده فرصت شب دیجوریدن
تجدید دیدار ایتماقا بو وقتی بولدوم مغتنم
..
..
#کاظمیه_مدح
#کاظمیه_شهادت #کاظمیه
#ای_شهریار_ملک_جان_وی_یوسف_زندان_غم
#عابد_تبریزی #ترکی #زبدةالاشعار
نظر دهید