غلام سیاه «شهادت جون غلام حضرت سیدالشهداعلیه السلام»
.
✍️ زبدة الاشعار ✍️
🆔: @nohe_torki
.
مرحوم عابد تبریزی
.
ای صحبتی عزّت سوزی عزّت اوزی عزّت
خاک حرمی جوهر اکسیر سیادت
.
.
ای سنله میسّر هامویه عزّت و اعزاز
اسمون کتب عزّته عنوان و سرآغاز
ای دودۀ آدم سنیله رتبه ده ممتاز
شأن و شرفون مایۀ فخر بشریّت
.
.
ای ثقل وقارونله زمین عرشه مباهی
ای خلقه وجودون اثر فیض الهی
اسلامده قولون سبب هدم مناهی
آفاقده فعلون ثمری نشر فضیلت
.
.
ای خاک درون کعبۀ مقصود خلایق
ای سنله عیان پرتو انوار حقایق
ای پرتو حسنیله صفا صبحنه فالق
ای بارقۀ رحمتله کاشف ظلمت
.
.
ای سن گل شاداب بهشت ازلیّت
ای سن مه رخشان سپهر ابدیّت
ای سن اثر رحمت ذات احدیّت
ای سن هامی دنیایه اولان علّت خلقت
.
.
ای شمس فلک شمسۀ ایوان جلالون
ای ماه افق مهچۀ اعلام کمالون
ای کاهکشان مصطبۀ صفّ نعالون
ای ثابت و سیّاره سنه فوج جلالت
.
.
ای درج نبوّتده اولان گوهر نایاب
ای شرق امامتده چیخان مهر جهانتاب
ای رشحۀ فیضونله شریعت گلی سیراب
افسوس سنی تشنه شهید ایتدی بو امّت
.
.
باللّهی تحیّرده دی بو نکته ده اوهام
شیرازه دن اولموب نه سبب دفتر ایام
خضرا گنه دور ایلدی غبرا دوتوب آرام
خشگ اولدی عطشدن لب سرچشمۀ رحمت
.
.
ای گون که مدینیدی سنه مشرق انوار
دور ایلدی وارونه ز بس گنبد دوّار
باتدون افق ماریه ده اولدی جهان تار
دوتموشدی او گون عالمی ظلمات جهالت
.
.
آزاده دگون قید بلاده اولا دلتنگ
کونین ده مملوک لرون صاحب اورنگ
مملوک لروندن بیری بیر عبد سیه رنگ
بیر بنده که آزاده لره مایۀ حسرت
.
.
شه لطفی اولوب بنده سینین حالنه شامل
افتاده سنه بذل ایلدی رحمت کامل
آزاده لریله اونیدا دوتدی مقابل
ایتدی اونی شایستۀ تشریف شهادت
.
.
مأذون ایلدی قانه باتا راه وفاده
بذل ایلیه جان شوقله میدان بلاده
حشره گله محشر گونی سلک شهداده
باشه قویا اکلیل مباهات و شرافت
.
.
بو اذن اولوب بندیه منشور سیادت
چتر آچدی باشی اوسته اونون طایر دولت
باشدان ایاقا شوق و شعف جذبه و حالت
میدانه ایدوب قصد جهادیله عزیمت
.
.
بالیده لنوب اوز اوزونه شوق و شعفدن
جان فارغ اولوب سلطۀ اندوه و اسفدن
باش عرشه اوجالدیبدی بو اکرام و شرفدن
توفیق خدادندی دییردی بو سعادت
.
.
پیغمبرین اوغلی نه گوزل ایلدی احسان
بولدی منیده لایق قربانی جانان
مین جان اولا گر منده ایدم بو شهه قربان
اولماز عوض بیر بله احسان و کرامت
.
.
گه اوج سعادتده یتوب قلبنه تردید
یا رب اولی که ذرّه اولا چشمۀ خورشید
یا سنگ سیه ده گورونه جلوۀ ناهید
یا برگ خزان دیده تاپا لطف و طراوت
.
.
بو حال عجب اولمیه پندار و تخیّل
چون بوتۀ خار اولماز اولا خرمن سنبل
بو عزّته هر قدر ایدورم فکر و تأمّل
من بندۀ ناچیزده یوخ قدر و لیاقت
.
.
بیر سلکه دوزولمز خزف و لؤلؤ شهوار
بیر اولماز اولا باد دی و نفخۀ اسحار
یکساندی هاچان چهرۀ صبحیله شب تار
یوخ خاکله افلاک آرا سنخیّت و نسبت
.
.
من بیر حبشی بنده سیه رو و مقیّد
بو بیر شه اونا عرش خداونددی مسند
من عبد، او کونین ده سلطان مؤیّد
من پست، اونا افلاک کمین پایۀ رفعت
.
.
بو روی سیه قرمزی قانیله بویانسا
بو سوخته عشق آتشنه شوقله یانسا
قان اولماقینی دل ره جاناندا اینانسا
احساس غروریله اولار خفّتی عزّت
.
.
قانیم قاریشار پاک لرین قاننه یا رب؟
قربان اولی جانیم بو شهین جاننه یا رب؟
ممکن اولی که اَل یته داماننه یا رب؟
قسمتدی خدایا منه آخرده بو دولت؟
.
.
جنگ ایلدی کفّاریله باشینده بو سودا
توپراقه سالیب چوخلارینی یکّه و تنها
یاره گوتوروب قالمادی دلده داخی یارا
آتدان یخلوب جسمده بی حدّ جراحت
.
.
گورموشدی او صحرای بلاده شهدانی
هر تک تکی ترک ایلیه ایستردی جهانی
فریادنه سسلردی شه تشنه لبانی
اول شاهدن آخر نفس ایستردی حمایت
.
.
شه رأفتله جمله سین ایتمیشدی اجابت
هر تک تکی اولموشدولا مشمول عنایت
سالمیشدی او شه باشلارینا سایۀ رحمت
یوخ اونلاریلا منده ولی وجه شباهت
.
.
اونلار هامی آزاده دی من بندۀ مسکین
من خار مغیلانم اولار لاله و نسرین
ممکندی خدایا گوره سن پادشه دین
سایر شهدا تک منیده ایتسون اجابت
.
.
چوخ خجلتله سسلدی ای بنده نوازیم
ای خاک درون سجده گهیم مهر نمازیم
تشریفوه شاها بولوسن چوخدی نیازیم
احسان ایله ای آیت احسان و مروّت
.
.
موج ایلدی بحر کرم و لطف الهی
سالدی باشنا بنده سینین سایۀ شاهی
آلدی دیزی اوسته سر مملوک سیاهی
چکدی او غلامین یوزونه دست محبّت
.
.
شاه ایتدی غلامین ایکی دنیاده سرافراز
گوی سمتنه یوز دوتدی دعا ایلدی آغاز
ای خالق من ای هامی دنیایه سبب ساز
ای حکموه مقهور، قوانین طبیعت
.
.
یا رب بو سیه عارضه ویر جلوۀ بیضا
قلبی کیمی رخسارینیده ایله مصفّا
پاکیزه اولا رایحۀ جسمی خدایا
ویر بو بدنه رایحۀ نافۀ جنّت
.
.
دلجولوقا وار گوردی او شه حاجت محسوس
محتاجنی دریای کرم ایتمدی مأیوس
روشن گونوزی ایتدی شب تارله ممسوس
بیر قانله آغشته اولوب هر ایکی صورت
.
.
ای بنده سنه عزّت کونین ایدن اعطا
بیر نوکرون ایلوبدی جهان ترکنی شاها
اخلاصیدی ایمانیدی عشقونده سراپا
مستظهر احسانون ایدردی سنه خدمت
.
.
حاشا کرموندن تاپا یأس و اولا نومید
واضحدی که فیّاضدی هر ذرّیه خورشید
یوخدور قسم اوز جانوه بو نکته ده تردید
لطفون یته جاق نوکروه روز قیامت
.
.
#ای_صحبتی_عزت_سوزی_عزت_اوزی_عزت
.
✍️ #زبدةالاشعار✍️
🆔: @nohe_torki
نظر دهید