جلالت ارض طوس
شهادت غریب الغربا حضرت امام رضا (ع)
گریز به شهادت حضرت علی اکبر (ع)
.
✍️ #زبدةالاشعار ✍️
.
🆔: @nohe_torki
.
.
مرحوم صحاف تبریزی
.
ای طوس با جلالت وی خاک مشکبو
ایلر ستون جلالتیوی جنّت آرزو
.
خاک رهوندی دیدۀ عشّاقه توتیا
غبطه ایدر بو شوکتوی عرش کبریا
.
کعبه یرینده یوخدی بو عزّ و بو مرتبت
مخصوصدور سنه بو جلال و بو مرحمت
.
باعث همین جلالتیوه بیر وجود دور
مسجود خلق عالم و دریای جود دور
.
آغوشه چکموسن او مقدّس وجودی سن
محبوب ذات حقّیدی شاهنشه زمن
.
بیر نازنین وجود که حقّینده بارها
فرمایش ایلیوب بو سوزی ختم الانبیاء
.
بیر پاره ای منیم جگریمدن آدی رضا
مدفون اولور دیار خراساندا برملا
.
هر کیم زیارت ایلیه اول قبری فرشده
گویا زیارت ایلیوب اللّهی عرشده
.
شخصی سئوال ایتدی امام جواد دن
ای شمس آسمان ولا شاه ممتحن
.
جدّون حسین زیارتی افضلدی یا آتان
فرمایش ایتدی سائله سلطان انس و جان
.
وار دور آتام امام رضانون زیارتی
جدّیم حسین زیارتینه فضیلتی
.
ایلر طواف قبر حسینی صباح و شام
هر بیر مرام و مقصدیله جمله خاص و عام
.
شوط ایلمز امام رضا قبرینی مگر
اون دورت وجوده قائل اولان پاک شیعه لر
.
قبر شریفی وقفه دی زوّاره روز شب
زوّارینون مقامین ایدر انبیا طلب
.
یا ثامن الائمه و یا ملجاء الامم
ای معدن سخاوت و وی منبع کرم
.
قربان اولوم جلالتیوه عز و شأنو
هر گون چخاندا گون دوشنور آستانوه
.
منظوری خاک بوسیدی مقصودی کسب نور
ای مدفن شریفی حقیقتده رشک طور
.
حیران قویوب عقولى بو شأن و جلالتون
الدن آلوب قراریمی شوق زیارتون
.
قبرون دوشنده یاده دولور دل ملال لن
گوز کاسه سی لبالب اولور اشک آل لن
.
مدّ نظرده جلوه لنور لیل و النّهار
اول روضۀ مقدّس او ایوان زرنگار
.
بی اختیار آخار یوزیمه اشگ حسرتیم
قبر شریفون اولمادی بو وقفه قسمتیم
.
قورخوم بودور اجل یتیشه عمر قورتولا
قلبیمده اولما راضی بو بیر حسرتیم قالا
.
گورسم نولور بو جَمعله ای شاه محتشم
بیرده او قبر پاکیوی آغوشه چکمیشم
.
دلدن گیدر نه نوعله بو داغ حسرتون
یاددان چخا محالیدی بیر آن مصیبتون
.
سالدوقجا درد محنتیوی یاده آغلارام
گلّم صباح و شامده فریاده آغلارام
.
یاد ایلرم او ساعتی ای سبط مصطفی
احضار ایدوب حضورینه مأمون بیحیا
.
وارد اولاندا مجلسه سن ای شه انام
دوردی ایاق اوسته چوخ ایتدی احترام
.
یر ویردی اوز یانندا او بی شرم روزگار
دلده نهان عداوتنی قیلدی آشکار
.
بیر خوشه زهردار اوزوم آلدی او دم اله
دوشدی تمام عالم امکانه غلغله
.
اولدی مقام قدسده قدّوسیان ملول
جنّتده باشین آچدی اوغول وای دیدی بتول
.
شرم ایتمدی خدادن او معبود دشمنی
تکلیف ایدوب امامه او مسموم خوشه نی
.
عرض ایلدی نه یاخشی اوزومدور عم اوغلی جان
میل ایله مندن اولما بو نوعیله بدگمان
.
مأمونه باخدی حسرتیله بر غریب امام
فرمایش ایتدی ایلمه قتلیمده اهتمام
.
معذور دوتگلان منی چوخ ایلمه جفا
شاید بهشت میوه سی بوندان لذیذ اولا
.
غربتده اولما راضی چخا عرشه شیونیم
اهل عیالیمون گوزی یوللاردا وار منیم
.
اصرار ایدوب ز بسکه او ملعون نابکار
مجبور میل ایدوب نئچه دانه او شهریار
.
زهر ایلدی اثر دل نور هدایته
تغییر تاپدی رنگی دوشوب اوزگه حالته
.
گول تک سارالدى سولدی جمال منوّری
دوغراندی غنچه لبلری یاندی جگرلری
.
دوردی ایاقه مجلس مأموندن او دم
چکدی عبانی باشینه سلطان غم حشم
.
قلبین اوؤشدوروردی گوتوردوقجا هرقدم
دلدن چکردی آه جگر سوز دمبدم
.
راوی بو ماجرایه أباصلت دور دییَر
گوردوم عبا باشیندا گلور سیّد بشر
.
پوزقوندی حالى قلب شریفینده اللری
مسموم ایدوبله بلدوم او سبط پیمبری
.
زهر جفا الیندن آلوب اختیارینی
سلب ایلیوبدی طاقت و صبر و قرارینی
.
گاهی گلور گهی دایانور ایلور آہ و زار
اشکی آخور عذارینه چون بارش بهار
.
تا صحن خانیه یتشوب شاه دین پناه
حسرتله باخدی ساق و صولا چکدی دلدن آه
.
سسلندی گل دایانما اباصلت انتظار
باغلا قاپونی فرشلری ایله هم کنار
.
اهل وفایه منده وفامی نشان ویروم
جدّیم حسین کیمی یوزی توپراقدا جان ویروم
.
فرض ایلدیم مریض سن ای حجّت خدا
شاید سنون عیادتیوه بیر گلن اولا
.
فرمایش ایتدی سینمی بو تیر غم دلور
آخر غریبی گورماقا غربتده کیم گلور
.
ایتدیم کنار فرشلری دولدوروب گوزین
قویدی کمال حسرتیله توپراقا یوزین
.
بی اختیار اولوب کسیلوب صبر و طاقتی
یاندوردی کایناتی امامون او حالتی
.
حسرت گوزی مدینه ده قلبینده التهاب
سالدی خیاله اوغلی جوادی ایدوب خطاب
.
.
گل ای من غریبه بو غربتده یار اوغول
حسرت گوزوم یولوندا قالوب انتظار اوغول
.
ای نور دیده قلبیمون آرامی هارداسان
اولموش ایشیق گونوز گوزیمه لیل تار اوغول
.
قالمور او قدری من گوزی یوللاردا جان ویرم
گل آیریلوق زمانیدی گل عُذار اوغول
.
آخر نفسده بیرده گوروم گول جمالوی
جان بر لبم یتوبدی دم احتضار اوغول
.
خوشدور اوغول دیزینده آتا باشی جان ویره
قویما منی بو حسرتیله دل فکار اوغول
.
نه وار باجیم یانیمدا نه بر یار نه حبیب
نه دردیمی بلن نه اولان غمگسار اوغول
.
غربت ولایت ایل غمی دشمن شماتتی
آگاهدور بو حالیمه پروردگار اوغول
.
مأمون بیحیانی گوروم کامه یتمسون
حق ایتمسون او سنگدلی کامکار اوغول
.
بیر ظلم ایدوبدی سالدی منی اختیاردن
قلبیمده قالمادی داخی صبر و قرار اوغول
.
دوغراندی زهر کینله یاندی جگرلریم
اودلاندی جسم و جانیم اولوب شعله بار اوغول
.
جان ویرمه میش یتور اوزیوی باشیم استونه
اولموش نظرده پیک اجل آشکار اوغول
.
هنگام وصل گیچدی یتوب موسم فراق
یوخ دلده درد فرقتیوه اصطبار اوغول
.
.
بسکه اوغول اوغول دیدی مسموم زهرکین
توکدی عذاره اشکینی آرتوردی شیونین
.
.
بوغملو ماجرانی اباصلت ایدر بیان
گوردوم که صحن خانه ده بیر هاشمی جوان
.
الده عمامه باشی آچوق دیده اشگبار
دلدن گلوب نوایه چکر آه شعله بار
.
عرض ایلدیم او نوگل باغ وفایه من
اولدون بو صحن خانیه داخل نه نوع سن
.
فرمایش ایتدی ایلمه سن اوزگه بیر خیال
بیر آن واحد ایچره که خلّاق ذوالجلال
.
شهر مدینه دن ایده طوسه منی روان
باغلی قاپونی آچماقا قادردی بی گمان
.
بیلدوم که نور دیدۀ شمس الشّموسدور
آرام جان و صبر دل شاه طوسدور
.
یعقوبه ایستدیم یتورم قالما انتظار
غم ائتمه گلدی یوسفون ای معدن وقار
.
گوردوم آلوبدی دیزلری اوسته آتا باشین
بی فاصله توکر یوزینه قانلو گوز یاشین
.
سوز نهانی قلب بتولی کباب ایدر
گویا غریب آتاسینا بیله خطاب ایدر
.
.
ای زهر کینله جگری دوغرانان بابا
اهل و عیالینه گوزی حسرت قالان بابا
.
اولسون غریب جانوا جانیم فدا سنون
ای درد غربتیله اولان باغریقان بابا
.
قان اولدی باغریم آچ گوزون اوغلون جواده باخ
ایلر نه نوع گور باشون اوسته فغان بابا
.
گلدیم مدینه دن باشون اوسته باش آچماقا
دیندیر بو دل شکسته نی ای مهربان بابا
.
باخدوقجا حالوا جگریم اود دوتار یانار
بی اختیار اولور یوزه اشگیم روان بابا
.
مأمون دون سنی بیله بیر حالته سالوب
اؤز رحم سیزلقین وئره کامل نشان بابا
.
انگور زهرداری سنه نسگل ایلدی
فریاده گلدی آغلادی قان قدسیان بابا
.
اؤد ووردی قلب فاطمیه باغ خلدده
آچدی باشینی خاتم پیغمبران بابا
.
قویدی بالاوی یتیم اول ستم شعار
بو زهر ویرمدی سنه بیر گون امان بابا
.
اهل عیالوون گوزی یوللاردا انتظار
یثربده قالدى ناله کنان موکنان بابا
.
جدّیم حسین کیمی قوری یرلرده جان ویروب
اولدون غریب و بیکس و بی خانمان بابا
.
.
حسرتله آچدی گوزلرینی اول غریب امام
بیر آه چکدی توکدی یوزه اشگ لعل فام
.
گوردی او حالده باشی اوسته جواننی
آغوشه چکدی جان کیمی آرام جاننی
.
سوندوردی اشگ چشمله نار فراقنى
قویدى اوغول دوداقنه قانلو دوداقنی
.
تفویض قیلدی اوغلونا سرّ امامتین
بیر آنیده تمامه یتوردی وصیّتین
.
جان أوسته بیرده قول بویون اولدی آتا بالا
تاپشوردی جان او حالتیله سبط مصطفی
.
غربتده جان ویرنده شه طوس دل غمین
اوغلین یانندا گوردی آچان وقته گوزلرین
.
.
/// #گریز ///
.
گلدی بو یرده بحر ملالیم تلاطمه
گوزده مجسّم اولدی حسین ابن فاطمه
.
خوشدور وئرنده جان آتا اوغلین گوره ئوله
اما حسین نه چکدی دل ایستر اونی بُوله
.
میدان کربلاده الى بئلده دل ملول
قان ایچره گوردی جان ویروری نوجوان اوغول
.
سلب اولدی صبر خاطر سلطان دیندن
بی اختیار آتدی اوزین عرش زیندن
.
جان اوسته سالدی بیر نظر آرام جانینه
یدّى قدم سوروندی یتوب نوجوانینه
.
ای وای اوغول دیدی یوزینه توکدی گوز یاشین
توپراقلار اوستن آلدی دیز اوسته اوغول باشین
.
پاک ایتدی گرد طرّۂ عنبر فشاننی
بیرده دوداقینون دیشینون سیلدی قاننی
.
بو یرده اعتقاد ایلیوب شیخ شوشتری
دوشموشدی احتضاره گورن وقته اکبری
.
باخدوقجا جسمینه باشنا اود دوتوب یانوب
گوردی وجودی تیغیله صد پاره دوغرانوب
.
باشی قلجلانوب بویانوب قانه خطّ و خال
گلدن لطیف جسمی اولوب یرده پایمال
.
آغوشه چکدی جان کیمی اول ماه طلعتی
دلده ولیک سونمدی نار و محبّتی
.
قلبی قرار دوتمادی دلدن گیدوب توان
قویدی یوزین اوغول یوزینه شاه انس وجان
.
گل عارضینده ظاهر اولوب حال احتضار
آز قالدی مرغ روحی قفسدن ایده فرار
.
پیغمبر اوغلی قالدى نه حاله خدا بلر
بیرده او حالی اوغلى ئولن بیر آتا بلر
.
قالدى نه دیزده قوّتی نه دلده طاقتی
جان تاپشوران دمیدی حسینون او ساعتی
.
گوتدی اوغول یوزیندن او دم یوز فغانیله
اولدی آتا محاسنی آغشته قانیله
.
قویدی اوغول باشین یره فرزند بو تراب
یوز دوندروب جوانلارینا ایلدی خطاب
.
حمل ایلیون خیامه بو صد پاره پیکری
گوزلور یولین آناسى قالوب یولدا گوزلری
.
گر چه بو قانه باتماقنا دلخوشام اوزوم
توپراقلار اسوته قویمیون امّا گوره گوزوم
.
جدّیم شبیهی دور بو دل آرام مه لقا
گونلر ایوینده قالماقنا أولمیون رضا
.
باخدوقجا قانلو پیکرینه اود دوشر دله
میدانه حقّى وار آناسی باش آچوق گله
.
قرآن کیمی وجودین ایدوبلر ورق ورق
خندان اولوب یر اوسته قزل گلدی بیر طبق
.
بیکس آناسی عمّه لری گوز تیکوب بولا
ناچار خیمه گاهه گرک نعشی حمل اولا
.
امر امامیله او جوانان گل عذار
اول قطعه قطعه جسمی عبا ایچره یغدیلار
.
بیر نحویله جنازه نی یردن گوتوردیلر
چوخ چوخ مشقّتیله خیامه یتوردیلر
.
خندان اولان او دسته گلی قویدولار یره
عورت اوشاق کنیز و خانم دگدی بیر بیره
.
شور و نوا و غلغله افلاکه سالدیلار
یکسر او دوغرانان بدن اطرافین آلدیلار
.
دولدی فغان و شیون و فریادیله خیام
گویا حرمسرا و قیامت ایدوب قیام
.
باشین آچان فغان ایلین زلفینی یولان
قارداشی اوغلى قانه باتان باغریقان اولان
.
جمله ئولنلرین هامی یاددان چخاتدیلار
وا اکبرا صداسنی عرشه اوجاتدیلار
.
سوز دلی سکینه نون آفاقی داغلادی
قارداش جنازه سین باسوب آغوشه آغلادی
.
پوزدی دوباره حالین او قلبی یانقلارین
بیربیر کناره چکدی او پیکان سنقلارین
.
سو سپدی اشک چشمیله نار فراقنه
قویدی یوزین یوزینه دودافین دوداقنه
.
عرض ایتدی قانلو گوزلرون آچ بیر اویان على
دور گور اولوب ننوع باجون باغریقان على
.
هانسی شل اولموش ال سنی بو حالته سالوب
دلدن توان و طاقت و آرامیمی آلوب
.
گورسون سکینه پیکریوی یرده چاک چاک
قارداش نه نوع ایلمسون اوز اوزین هلاک
.
حسرتله قانلو گوزلریوه گوزلریم باخار
قانلو گوزوم یاشی یوزه بی اختیار آخار
.
ای کاش على ئولیدی بو غم مبتلا باجون
بو نوعی گورمییدی سنی بینوا باجون
.
اهل حرم سیزیلتسی وا اکبرا سسی
درده گتوردی خاطر سلطان بیکسی
.
فرمایش ایتدی زینبه اول وارث خلیل
ای غملریم شریکی جوانیم اولوب قتیل
.
لیلا حیا ایدور گله سن گیت باجی گتور
یوخ حالی دوت الیندن اوغول نعشینه یتور
.
ویردی همین که رخصت او سلطان ممتحن
بولمم نجه چخاتدیلا لیلانی خیمه دن
.
قولتوقلارینا گیردی خانمار فغانیله
دولموشدی جام دیده لر اشگ روانیله
.
یوزده سرشگ آلى یانان قلبیده الى
هر دم دیردی واولدا وای اوغول على
.
بیردن ایاقلاری سورونوردی او حالیلن
یتدی اوغول جنازه سنه چوخ ملالیلن
.
بیر آه چکدی قلب بتوله سالوب شرار
دوتدی یوزین حسینه او بانوی باوقار
.
چوخ چوخ ادبله عرض ایدوب ای وارث خلیل
قربانوی قبول ایلسون خالق جلیل
.
بو کوفیان شقاوتنی ایتدیلر بروز
جدّون شبیهی اکبری ئولدوردیلر سوسوز
.
دوندی اوغول جنازه سینه سالدی بیر نظر
دیز تیتردی اورک دوگونوب آخدی اشگ تر
.
پروانه تک دولاندی اوغول باشنا آنا
آز قالدی غصّه دن جگری اود دوتوب یانا
.
بی اختیار باشدان او دم گوتدی معجرین
آغوشه باسدی جان کیمی صد پاره اکبرین
.
باشدان ایاقه پیکرینه باخدی آغلادی
یاندی اوغول قانین یوزینه یاخدی آغلادی
.
گاهی اؤپردی گوزلرینی گه دوداقلارین
گه سینیه باساردی باشین گه ایاقلارین
.
سسلردی ای امید پناهیم جوان اوغول
دور گور قالوب نه حاله اوغولسوز آنان اوغول
.
قان اولدی غصّه دن جگریم آچ گوزن اویان
قویما على بو قدری اوغ ولوای دیسون آنان
.
گلّم باخاندا پیکرویوه نی کیمی دله
قان آغلاسام ئولنجه یری وار بو نسگله
.
بسکه وروبلا یاره بو بی رحم لر سنه
جسمون اولوبدی رشک گلستانه گلشنه
.
هر رنگ گل آچوبدی بو صد پاره پیکرون
زیبنده منظر اولموش عجب یاره پیکرون
.
بلبل کیمی فغانه گلوب ایلرم نوا
لیلا چتین تاپا بیله گلزار باصفا
.
چکدیم اگر چه من على بیر عمر زحمتون
جان دلیله ایلدیم عالمده خدمتون
.
گوز پرده سینده یر سنه ویردیم صباح و شام
شیرین یوخی گیجه گونوز اولدی منه حرام
.
صد شکر گیتمدی على زحمتلریم هدر
ویردی نهال زحمتیم آخرده خوش ثمر
.
ایتدون عزیز فاطمیه جانوی فدا
مقصودیم اولدی حاصل اله گلدی مدعا
.
دوغراندی گل کیمی بدنون اولدی بندبند
زهرا یانندا اولدوم على منده سربلند
.
«صحاف» ویرمه مطلبه طول ایله اختصار
جنّتده سالدی قلب بتوله بو غم شرار
.
آغلا حسینون اکبرینه اولما دل ملول
بیشک اولور جزاده بو خدمتلرون قبول
.
بیر اعتقاد پاکیله هر صبح و شامده
گل ناله و فغانه عزای امامده
.
هر کیم حسینه آغلیا صدقیله بی گمان
البتّه باشی اوسته گلور جان ویرن زمان
.
.
.
.
#رضویه_صحاف_تبریزی
#رضویه_مدح ٍ#رضویه_شهادت
#ای_طوس_با_جلالت_وی_خاک_مشکبو
#ترکی
.
✍️ #زبدةالاشعار ✍️
.
🆔: @nohe_torki
نظر دهید