وصیتهای حضرت زهرا (س) به فضه
.
✍️ زبدة الاشعار ✍️
.
🆔: @nohe_torki
.
مرحوم نادری میانجی
.
ای غم گونومون یاوری هم محنتی فضه
گل فاطمه نون وار سنه بیر صحبتی فضه
.
.
اوّل بودوکی من گیدورم دار فنادن
نالانم اگر قورتارورام جور جفادن
بو چرخ فلک چکموری ال آل عبادن
وقت اولدی بو گون عالم عقبایه گیدوم من
آخر حسنینیله خداحافظ ایدوم من
.
.
من فضه بو گون ایلمشم منزلی خلوت
واردور سنه چوخ قورخولی بیر غملو وصیت
بو کوینکی آل ساخلاگلان مندن امانت
بیر گون گلجک سنبل غارتدی بو کوینک
محشر گونی اسباب شفاعتدی بو کوینک
.
.
اولگون که یاغار بارش غم دشت بلاده
غم قافله سی لنگ اولاجاق کرب و بلاده
اوغلوم بو حسین نعشی قالان وقته اراده
عریان بالاما حایل اوگون پیرهن اولسون
اللرده ئولن اوغلوما کوینک کفن اولسون
.
.
سینم گلیدور فضه بیلورسن بو حسینیم
من سیز دوشه جک زحمته بو نور دوعینیم
دریای غمه غرق اولاجاقدور حسنینیم
زهریله حسن خانه سی ویران اولاجاقدور
یالقوز بو حسین قاننه غلطان اولاجاقدور
.
.
بیرگون گلجک قالّام او گون فضه اوغولسوز
علقمده دوشر اوغلوم ابالفضلده قولسوز
اول وقته قالار تشنه حسین عرصه ده یالقوز
حالی اولاسان اوندا ئوزون مطلبه فضه
بلدورمیه سن کوینک ایشین زینبه فضه
.
.
هر وقته حسین ایستدی بو کوینگی آلسون
وقتی باباوای ناله سیدور عرشه اوجالسون
کیمدور او زمان زینبیمین قیدینه قالسون
زینب باش آچوق قتلگه ساری قاچاندا
قارداش باشی اوستونده باجی باشین آچاندا:
.
.
حیدر قیزییام رحم قیل ای شمر اماندور
بیر جرعه سو ویر قارداشیمون حالی یاماندور
لشگر داغیلوب اوغلی اولوب قدی کماندور
بو یاره لی نون آز گل گلزارینی سولدور
ظالم بو حسینون یرینه گل منی ئولدور
.
.
ای فضه یانار قلبیم اوگون نور دو عینه
فرمان ویریلر آت چاپالار نعش حسینه
نه حاله قالار زینب بیچاره سکینه
جهد ایله اوگون زینبه امداد ایده سن سن
امداده ابالحارثی فریاد ایده سن سن
.
.
یاز «نادری» بو مطلب ایدوب باغریمی القان
زهرا بالاسی تشنه حسین قورخولی میدان
گون ایستی قوم اوسته بدن یاره لی عریان
شرم ایلمیوب فاطمه دن قوم عداوت
زهرا ویرن اول کوینگیده ایتدیله غارت
.
.
.
#سبک_ای_باد_صبا
#سبک_ای_شمر_دنی_قیزلاری_معجرسیز_آپارما
#سبک_وقتیکه_دگوب_فرق_علی_اکبره
#سبک_افلاکه_چخوب_همهمه و …
#سبک_ما_درس_سحر_در_ره_میخانه_نهادیم
#سبک_مقصود_تویی_کعبه_و_بتخانه_بهانه
.
.
#فاطمیه_شهادت
#ای_غم_گونومون_یاوری_هم_محنتی_فضه
#نادری
#ترکی
.
✍️ #زبدةالاشعار✍️
.
🆔: @nohe_torki
نظر دهید