در مدح و مصیبت مجاهد اعظم سید الشهدا (ع)
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
ای لب لعلوه هر لعل بدخشان تشنه
ساغر عشقوه مین خضر لب عطشان تشنه
.
.
ای حسین بن علی منجی دین اسلام
کعبۀ عشقه اولان حاجی خونین احرام
سفرۀ جودوه حیراندی کریم ایّام
قدح بخششوه عالم امکان تشنه
.
.
ای مبارک آدی منشور غمه سرلوحه
قتلگاهینده ایدن ختم پیمبر نوحه
ایلین ورطۀ طوفاندا حمایت نوحه
چشمۀ حکمت و اجلالینه لقمان تشنه
.
.
خاتم مرسلون ای بند دل و دلخواهی
عالمه کعبه مقصود اولان درگاهی
خلّت و خلقى قویان مات خلیل اللهی
جام گفتارینه وی موسی عمران تشنه
.
.
ای ایدن زاهدی سرخوش کرم و نعمتدن
عارفه کرب و بلاسی خوش اولان جنّتدن
صبرینون قیمتی ایّوبی سالان قیمتدن
جاه الطافنه وی یوسف کنعان تشنه
.
.
باش اولان ای باشینون درد و غمی یحیادن
یونسی بطن سمکده قوتاران دریادن
دار نیده گزوب عیسانی سالان کارادن
صوت قرآننه داوود خوش الحان تشنه
.
.
آه و افسوس و صد افسوس همان ساعتدن
یخلوب قتلگهه دوشمشیدون طاقتدن
نهره ساری گوزوی تیکمشیدون حسرتدن
باخار البتّه سویون سمتینه هر آن تشنه
.
.
قزلارون منتظریدی سنه جام اللرده
گل کیمی صفحۀ رخسارلری پژمرده
باغبانون ئوزی منع أولسا سودان هر یرده
امر واضحدى قالار صحن گلستان تشنه
.
.
الده گیسولری صدیقه آنون معناده
قانلو لبلردن ایدوب بوسه گلوردی داده
جان حسینیم بو نه عالمدی گلوب ایجاده
سن چوخور یرده سوسوز خیمه ده طفلان تشنه
.
.
دیلون آغزوندا دولانمور قوریوب گرمادن
نفس آلدوقجا یره قان توکولور اعضادن
چوبالورسان ایله بیل ماهی چخوب دریادن
باشووی قوی دیزیم اوسته سنه قربان تشنه
.
.
سن منیم بسلدیگیم گلسن اولوبسان پرپر
سایه تک سینوی شانشان ایلیوبدور خنجر
گوزلرون سیلمگه گوداله گتوردوم معجر
قوی سیلوم گوزلروی باخ منه جان جان تشنه
.
.
بو فراتون سوئی مهریه آنون زهرایه
بحر تک موج ایلیور جاری اولور صحرایه
چوخ چتین امریدی یانّام بالا بو معنایه
اهرمنلر سو ایچوب قالدی سلیمان تشنه
.
.
آلدى نهرون سویون عباسون حسین همّتدن
مشکی دوشدی خطره حیف بو جمعیتدن
دوندره بیلمدی اخیامه یوزون خجلتدن
حشره تک قالدی سو اوستونده نگهبان تشنه
.
.
بالا جان اوسته آنا آغلیور ایلور ناله
زینبون یوخ خبری مونس اولوب اطفاله
ناگهان قویدی قدم شمر لعین گوداله
زمزمه گوردی ایدور سرور خوبان تشنه
.
.
ایله ظنّ ایلدی شام أهلینه ایلور نفرین
ظنّنون عکسینی درک ائتدی ولی اول بی دین
شیعه سین گوردی دعا ایلور او سبط یاسین
دامن حقّه اولوب دست به دامان تشنه
.
.
آل هاشمدن آخان قانلارا خاطر یارب
ره عشقونده چخان جانلارا خاطر یارب
خیمه ده زلفی پریشانلارا خاطر یارب
منتظر قزلارا که قالمش هراسان تشنه
.
.
حقّیمه عارف اولان شیعه مه امداد ایله
سر فکنده ایلمه حشریده دلشاد ایله
نار دوزخدن آلوب جنّته آزاد ایله
قویما محشرده قالا دیده سی گریان تشنه
.
.
ائتمورم شکوه بو سینمده یارام چوخ چوخدور
خانه خانه ایلین قلبیمی اوچ پر اوخدور
ایستیدنده سنه بیر ذرّه گلایم یوخدور
یانارام هر نقدر امر ایلسون یان تشنه
.
.
من حسینم غمه صابر دوزرم هر درده
پیر کنعان دگلم غمدن اولام افسرده
آغلیوب یوسفی یاددان چخادام محشرده
کوثره نفسیم اولا ای حق منّان تشنه
.
.
شمر ایشیتدی او مناجاتی دوشوب تشویشه
نفسی اما غلبه ائتدی او کافر کیشه
گل خیرالبشره ایستدی ورسون تیشه
شاه عشقی ائلسون قاننه غلطان تشنه
.
.
قان دولان گوزلرینی آچدی حسین زحمتله
درک ایدوب قاتل خونخواری نه کیفیتله
من حسینم دیدی شمره منه باخ دقتله
یخموسوز قتلگهه قلب ایوی شانشان تشنه
.
.
شاهد بزم ولا علت موجودم من
پنجم پنج تنم حجت معبودم من
سینه پروردۂ پیغمبر محمودم من
قوریان لبلریمه چشمۀ رضوان تشنه
.
.
مظهرم حسن صفاتیمله حق سبحانه
فاطمه مام کباریم من اونا ریحانه
فاتح خیبر آتامدی دگلم بیگانه
ئولدورورسن نیه ای ظالم و نادان تشنه
.
.
حرمتین شرع نبی واجب ایدوب مهمانون
شرعه توهین ایدوسن یوخدی مگر ایمانون
بی مروت نجه انصاف ایلیور وجدانون
میزبان سو ایچه اما قالا مهمان تشنه
.
.
دیمورم آل نظره حجت سبحانم من
دیمورم حرمت ایله منجی انسانم من
فرض ایله بیر عربم فرد مسلمانم من
ئولدوروب هانسی مسلمانی مسلمان تشنه
.
.
گوروسن جان ویرورم یوخدی توانا منده
قویمیوب اکبریمون ئولمگی یارا منده
یوخدی طاقت دوروب اگلشمگه حتی منده
باری قوی ئوز باشیما جان ویروم آسان تشنه
.
.
نه عطشسن نه یارون وار اولاسان دلخسته
خستیم من نفس اما چکورم آهسته
زینبه منتظرم هی باخورام تل اوسته
خیمه دن ایندی گلر زلفی پریشان تشنه
.
.
عجبا مشتری سن لکّۀ دامن گیره
سینم اوستن یره دوش قتلیمی سال تأخیره
گورسه شمشیروی زینب ال آتار شمشیره
دگل انصاف الیندن توکوله قان تشنه
.
.
نقدر یازماقا پر ذوق اولا انور خامه
دگل امکان باشا یتسون بو مصیبت نامه
نه گلور حدّ و عیاره نه گلور ارقامه
هانسی شاهون کسیلوبدور باشی دالدان تشنه
.
.
#حسینیه_انور_اردبیلی
#حسینیه_شهادت #قتلگاه
#ای_لب_لعلوه_هر_لعل_بدخشان_تشنه
#ترکی #یادگار_انور
.
.
✍️ #زبدةالاشعار ✍️
.
🆔: @nohe_torki
نظر دهید