زبانحال امام حسین (ع) به حضرت زینب(س)راجع به شهادت حضرت ابوالفضل (ع)
.
✍️ #زبدةالاشعار ✍️
.
🆔: @nohe_torki
.
مرحوم عاصی تبریزی
.
ای منیم غملی گونومده یار و غمخواریم باجی
گل بوکولدی قامتیم ئولدی علمداریم باجی
.
.
واریدی تا قارداشیم من غالبیدیم دشمنه
ال تاپامازدی بو چولده قوم کین پرور منه
قارداشیم ئولدی داخی دشمن یتشدی ایمنه
شام و کوفه اهلینه کشف اولدی اسراریم باجی
.
.
ائیلدی تا قارداشیم عباسی دشمن لر شهید
اوز حیاتیمدن داخی بالمرّه اولدوم نا امید
دیزلریم گلمور اورک تیترور باجی چون برگ بید
حال زاریم تک منیم پوزقوندی افکاریم باجی
.
.
وئر خبر یکسر قرا معجرلر آچسون لار باشین
اوخشاسون اوغلی ئولن اوغلون باجی اوز قارداشین
تشنه سقایه سبیل ائتسونله یکسر گوز یاشین
شیونه گلسون تماماً آل اطهاریم باجی
.
.
بی سبب ایتموب منی بو غم بئله پژمرده حال
آگهم زینب ندور اوّلده بو کاره مآل
دستگیر ائیلر بو صحراده سیزی قوم ضلال
بستۀ زنجیر اولور ظلمیله بیماریم باجی
.
.
قیل نظر باجی منیم قانه دونن گوز یاشیمه
گل منیله اوخشیاخ ماتم دوتاخ قارداشیمه
باغبان مرده سارالموش گوللری یغ باشیمه
گئتدی الدن باغبان و باغ و گلزاریم باجی
.
.
من باجی نه نوعی دلده حل ائدیم بو مشکلی
قویدولار آغلار خزان دیده پریشان بلبلی
باغبان ئولسه بو واضحدور ایاقلالار گولی
بی سبب قان آغلامور بو چشم خونباریم باجی
.
.
قصدیم اولدی نعشینی من ایلیم حمل خیام
اولمادی ممکن گوتورماق قالدی دلده بو مرام
بسکه ویرموشدی یارا اوستن یارا اشرار شام
حدّسیز یاره گوتورموشدی علمداریم باجی
.
.
سهلدور یکسر وجودی قطعه قطعه دوغرانوب
باش سینوب قوللار گیدوب بیدق یاتوب مشک اوخلانوب
نعشینه باخدوقجا من دل اودلانوب قلبیم یانوب
غصّه دن قانه دونوبدور خاطر زاریم باجی
.
.
من دیمم سیز ال چکون بو قانلو باشدان آغلیون
منله هم ناله اولون بو غمده باشدان آغلیون
باش آچون شیون ائدون اما یاواشدان آغلیون
ائتمسون طعن و شماتت خصم خونخواریم باجی
.
.
باشی اوسته من یتنده گوردوم او جان اوسته دی
بولدوم اعدا چوخ یوروب قارداشیمی چوخ خسته دی
خیمه گاهه گلماقا مندن باجی عذر ایسته دی
بولدی گوزلر سو یولی لب تشنه قیزلاریم باجی
.
.
عمده بو غمدور اورکده بئله پوزموش حالیمی
دوندروبدور قانه زینب گوزده اشگ آلیمی
گئت اسیر اولماقلیقا آماده قیل اطفالیمی
گورموسن قانه بویاندی بس هواداریم باجی
.
.
قارداشیم ئولماقلیقی معنانی سالدی صورته
غزّتوز بوندان صورا تبدیل اولوبدور ذلّته
شام و کوفه اهلی گوز تیکمشدیلر بو ساعته
بولدولر واضح پوزولدی وضع پرگاریم باجی
.
.
آغلا «عاصی» حضرت عباسه هر شام و سحر
شور گوز یاشون وئرور آخر سنه شیرین ثمر
قارداشی ئولموش بولر بو سوزده واردور نه اثر
ای منیم غملی گونومده یار و غمخواریم باجی
.
#عباسیه_عاصی_تبریزی
#عباسیه_شهادت
#ای_منیم_غملی_گونومده_یار_و_غمخواریم_باجی
#ترکی
.
✍️ #زبدةالاشعار ✍️
.
🆔: @nohe_torki
نظر دهید